စိုက်ပျိုးရေးနှင့် မြေယာပြန်လည်ထူထောင်ရေးဝန်ကြီး Alaa Farouk နှင့် သဘာဝ ပတ်ဝန်းကျင် ထိန်းသိမ်းရေးဝန်ကြီး Yasmine Fouad တို့သည် စိုက်ပျိုးရေး စွန့်ပစ်ပစ္စည်းနှင့် တိရစ္ဆာန် အညစ်အကြေးများကို အော်ဂဲနစ်တိရစ္ဆာန်အစာနှင့် ဓာတ်မြေသြဇာထုတ်လုပ်ရန်အတွက် အကောင်းဆုံး မဟာဗျူဟာချမှတ်ရန် တွေ့ဆုံခဲ့ကြကြောင်းနှင့် ဤပဏာမခြေလှမ်းသည် ရေရှည် တည်တံ့ခိုင်မြဲစေရန်နှင့် တိရစ္ဆာန်အစာတင်သွင်းမှုအပေါ်မှီခိုမှုကို လျှော့ချရန် ရည်ရွယ်ကြောင်း သိရှိ ရပါသည်။

အကောင်အထည် ဖော်ဆောင်ရာတွင် အဆင်ပြေချောမွေ့စေရန်နှင့် စည်းမျဉ်းစည်းကမ်းများ သို့မဟုတ် ထောက်ပံ့ ပို့ဆောင်ရေးဆိုင်ရာ အတားအဆီးများကို ဖယ်ရှားနိုင်ရန်အတွက် သဘာဝ ပတ်ဝန်းကျင် ထိန်းသိမ်းရေးဝန်ကြီးဌာနနှင့် ပူးပေါင်းဆောင်ရွက်ရန် ဝန်ကြီး Farouk က ဌာနမှ တာဝန်ရှိသူများကို ညွှန်ကြားခဲ့ပါသည်။ စိုက်ပျိုးရေးဝန်ကြီးဌာနသည် ၎င်း၏ သုတေသနစင်တာများ မှတဆင့် နည်းပညာပိုင်းဆိုင်ရာများ ပံ့ပိုးကူညီရန် အဆင်သင့်ဖြစ်ကြောင်း အာမခံချက်ပေးကာ ပုဂ္ဂလိကကဏ္ဍ ရင်းနှီးမြှုပ်နှံမှုကို အားပေးခဲ့ပါသည်။

ဝန်ကြီး Fouad က စိုက်ပျိုးရေးဆိုင်ရာ စွန့်ပစ်ပစ္စည်းများ စီမံခန့်ခွဲရေး ကဏ္ဍအတွက် အစိုးရ၏ ရင်းနှီးမြှုပ်နှံမှုကို ထပ်မံအတည်ပြုခဲ့ပြီး အဆိုပါ မဟာဗျူဟာမူဘောင်ကို ဝန်ကြီးချုပ်ထံ တင်ပြထားပြီးဖြစ်ကြောင်း သိရှိခဲ့ရပါသည်။ 

ဥပဒေပြုရေးဆိုင်ရာ တိုးတက်မှုများ၊ စည်းမျဉ်းစည်းကမ်းဆိုင်ရာ ပြုပြင်ပြောင်းလဲမှုများနှင့် ရိုးပြတ်များမီးရှို့ခြင်းကဲ့သို့သော အန္တရာယ်ရှိသော အလေ့အကျင့်များကို တားဆီးရန် ရည်ရွယ်သည့် အသိပညာပေးလှုံ့ဆော်မှုများ အပါအဝင် သဘာဝပတ်ဝန်းကျင် ဝန်ကြီးဌာန၏ ဆောင်ရွက်မှုများကို ၎င်းက အလေးပေး ဖော်ပြထားပါသည်။ ကောက်ရိုး (၉၀%)ခန့်ကို စနစ်တကျ ကျစ်ကျစ်လစ်လစ် စုဆောင်းနိုင်ခဲ့ခြင်းသည် ရိုးပြတ်မီးရှို့ခြင်းနှင့်ပတ်သက်၍ လေထုညစ်ညမ်းမှုဆိုင်ရာ ကောင်းမွန် အောင်မြင်သည့် စီမံခန့်ခွဲရေးစနစ်ဖြစ်ပြီး ဝန်ကြီးဌာန၏ အဓိကအောင်မြင်မှုများအနက်မှ အောင်မြင် မှုတစ်ခုလည်း ဖြစ်ကြောင်း၊ သို့ဖြစ်၍ စွန့်ပစ်ပစ္စည်း စုဆောင်းရေးဆိုင်ရာ အထူးကိရိယာများနှင့် ပတ်သက်၍ ကန်ထရိုက်များကို ပံ့ပိုးပေးခြင်းဖြင့် ရင်းနှီးမြှုပ်နှံမှုဆိုင်ရာ အခွင့်အလမ်းများ ဖန်တီး ပေးခဲ့ကြောင်း သိရှိရပါသည်။

ဗျူတိန်း ဓာတ်ငွေ့ဆလင်ဒါ (၈၆,၀၀၀)နှင့်ညီမျှသော ဓာတ်ငွေ့ (၂.၁၅၂)သန်း ကုဗမီတာ နှစ်စဉ်ထုတ်လုပ်ပေးနိုင်သည့် ဇီဝဓာတ်ငွေ့ (၁,၉၂၁)ယူနစ်တပ်ဆင်မှုကို အကြောင်းပြု၍ ဇီဝစွမ်းအင် (ဇီဝဓာတ်ငွေ့) ထုတ်လုပ်မှုအတွက် ဝန်ကြီးဌာန၏ တွန်းအားပေးမှုကို Fouad က မီးမောင်းထိုး ပြသ ခဲ့ပါသည်။ အဆိုပါ ယူနစ်များသည် ဇီဝစွန့်ပစ်ပစ္စည်း (၅၃.၈)တန်ကို တန်ဖိုးမြှင့်တင်ကာ အော်ဂဲနစ် မြေဩဇာ တန်ချိန် (၅၀,၀၀၀)ခန့် ထုတ်လုပ်နိုင်ခဲ့ကြောင်း သိရှိရပါသည်။

စိုက်ပျိုးရေးဆိုင်ရာ စွန့်ပစ်ပစ္စည်းကဏ္ဍ၌ ရင်းနှီးမြှုပ်နှံမှု အခွင့်အလမ်းများသည် ဆွေးနွေး မှုအတွက် အဓိက ဗဟိုချက်ဖြစ်ကြောင်း၊ အဆိုပါ အစီအစဉ်များ၌ သစ်အချောထည် ထုတ်လုပ်ရန် အတွက် New Valley တွင် တည်ရှိသည့် ယူရို သန်းပေါင်း (၇၀)တန်ဖိုးရှိ အုန်းလက်/အုန်းရွက်များ ပြန်လည်သုံးစွဲထားသည့် ပစ္စည်းများ ထုတ်လုပ်ပေးသည့်စက်ရုံ၊ သစ်တော်သီးအစေ့များမှ ဆီထုတ်ရန် ဆောင်ရွက်ခြင်း၊ ကောက်ရိုးမှ ပုံဆောင်မဲ့ ဆီလီကာ ထုတ်လုပ်ရန် ကြိုးပမ်းခြင်းတို့ ပါဝင်ကြောင်း၊ ထို့အပြင် စိုက်ပျိုးရေးဆိုင်ရာ စွန့်ပစ်ပစ္စည်းများမှ ရရှိသော မိရိုးဖလာမဟုတ်သည့် တိရစ္ဆာန် အစာများ ဖွံ့ဖြိုးတိုးတက်လာစေရန် ဖော်ထုတ်ခြင်းတို့ ပါဝင်ကြောင်း သိရှိရပါသည်။

တွေ့ဆုံစဉ် တာဝန်ရှိသူများက စိုက်ပျိုးရေးဆိုင်ရာ စွန့်ပစ်ပစ္စည်းများ သုံးစွဲရာတွင် စိန်ခေါ် မှုများကို ပြန်လည်သုံးသပ်ပြီး အဖြေရှာရန် ဆွေးနွေးခဲ့ကြကြောင်း၊ အသေးစိတ်တင်ပြချက်တစ်ခု၌ အီဂျစ်နိုင်ငံသည် စိုက်ပျိုးရေးဆိုင်ရာ စွန့်ပစ်ပစ္စည်း တန်ချိန်ပေါင်း (၄၀-၄၅)သန်း နှစ်စဉ် ထွက်ရှိ ကြောင်း၊ အဆိုပါ စွန့်ပစ်ပစ္စည်းများကို မြေဆွေးထုတ်လုပ်ခြင်း၊ ဇီဝစွမ်းအင်ထုတ်လုပ်ခြင်းနှင့် သစ် အချောထည် ထုတ်လုပ်ခြင်းကဲ့သို့သော စက်မှုလုပ်ငန်းများတွင် အသုံးပြုကြောင်း တင်ပြထား ပါသည်။

ဝန်ကြီးများသည် အဆိုပါ အစီအစဉ်များကို ကျယ်ကျယ်ပြန့်ပြန့်ဆောင်ရွက်ရန်၊ လုပ်ငန်း ခွင်၌ စည်းကမ်းဘောင်များ အားကောင်းလာစေရန်နှင့် စိုက်ပျိုးရေး စွန့်ပစ်ပစ္စည်းများ အသုံးချမှု၏ စီးပွားရေးနှင့် သဘာဝပတ်ဝန်းကျင်ဆိုင်ရာ အကျိုးကျေးဇူးများ အများဆုံး ရရှိရန်အတွက် ရင်းနှီး မြုပ်နှံသူများ ပိုမိုဆွဲဆောင်ရန် ကတိကဝတ်များကို ထပ်မံအတည်ပြုခဲ့ကြောင်းကို (၁၅. ၃. ၂၀၂၅) ရက်နေ့တွင် ထုတ်ပြန်သည့် www.dailynewsegypt.com သတင်းအရ သိရှိရပါသည်။

Source https://www.dailynewsegypt.com/2025/03/15/government-partnership-transforms-agricultural-waste-into-sustainable-feed-fertilizer/

တင်ပြသူ ဒေါ်နှင်းရီဝင်း၊ စိုက်ပျိုးရေးဦးစီးဌာန

ရက်စွဲ ၂၀၂၅ ခုနှစ်၊ မတ်လ (၁၉) ရက်

တည်းဖြတ်သူ ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန