အိန္ဒိယနိုင်ငံသည် မတ်ပဲ (urad) အတွက် အခွန်လွတ်တင်သွင်းခွင့်မူဝါဒအား ၂၀၂၆ခုနှစ်၊ မတ်လအထိ သက်တမ်းတိုးချဲ့ခဲ့ကြောင်း အိန္ဒိယအစိုးရ၏ ကူးသန်းရောင်းဝယ်ရေးနှင့် စက်မှုဝန်ကြီး ဌာန၊ နိုင်ငံခြားကုန်သွယ်မှု၏ ညွှန်ကြားရေးမှူးမှ မတ်လ (၁၀)ရက်နေ့တွင် ထုတ်ပြန်ကြေညာခဲ့ပါသည်။

အဆိုပါမူဝါဒသည် အိန္ဒိယနိုင်ငံ၏ မြင့်တက်လာသော ဝယ်လိုအားကို ဖြည့်ဆည်းပေးနိုင်ရန် ဖြစ်ကြောင်း ကုန်သည်များက အလေးပေး ပြောကြားခဲ့ပါသည်။ အိန္ဒိယနိုင်ငံသည် မြန်မာနိုင်ငံမှ မတ်ပဲနှင့် ပဲစဉ်းငုံ အဓိကဝယ်ယူသည့် နိုင်ငံတစ်နိုင်ငံ ဖြစ်ပါသည်။ ထို့ကြောင့် မတ်ပဲနှင့် ပဲစဉ်းငုံ ဈေးနှုန်းများသည် အိန္ဒိယနိုင်ငံ၏ ဝယ်လိုအားနှင့် အဓိကဆက်စပ်နေပါသည်။

မြန်မာနိုင်ငံသည် လက်ရှိ (၂၀၂၄-၂၅)ဘဏ္ဍာရေးနှစ်၏ ဧပြီလမှ ဒီဇင်ဘာလအတွင်း ပြည်ပ နိုင်ငံများသို့ ပဲမျိုးစုံ တန်ချိန် (၁.၅)သန်းအထက် တင်ပို့ခဲ့ကြောင်း မြန်မာနိုင်ငံ ပဲမျိုးစုံ၊ ပြောင်းနှင့် နှမ်းကုန်သည်ကြီးများအသင်းအရ သိရှိရပါသည်။

မြန်မာနိုင်ငံသည် အိန္ဒိယနိုင်ငံသို့ မတ်ပဲ၊ ပဲတီစိမ်းနှင့် ပဲစဉ်းငုံများကို အဓိကတင်ပို့ပါသည်။ ၎င်းတို့အနက် မတ်ပဲနှင့် ပဲစဉ်းငုံများကို အိန္ဒိယသို့ အဓိက တင်ပို့ပြီး ပဲတီစိမ်းများကို တရုတ်နှင့် ဥရောပသို့ အဓိကတင်ပို့ပါသည်။

အိန္ဒိယနိုင်ငံတွင် မတ်ပဲနှင့်ပဲစဉ်းငုံ ဝယ်လိုအားနှင့် စားသုံးမှုလိုအပ်ချက်များ တိုးလာလျက် ရှိပါသည်။ ၂၀၂၁ ခုနှစ်၊ ဇွန်လ (၁၈)ရက်နေ့တွင် မြန်မာနှင့် အိန္ဒိယနိုင်ငံ အကြား လက်မှတ်ရေးထိုး ခဲ့သည့် နားလည်မှုစာချွန်လွှာအရ (၂၀၂၁-၂၂)ဘဏ္ဍာရေးနှစ်မှ (၂၀၂၅-၂၆)ဘဏ္ဍာရေးနှစ်အထိ (၅) နှစ်အတွင်း အိန္ဒိယနိုင်ငံသည် မြန်မာနိုင်ငံမှ မတ်ပဲတန်ချိန် (၂၅၀,၀၀၀)နှင့် ပဲစဉ်းငုံတန်ချိန် (၁၀၀,၀၀၀) တင်သွင်းမည် ဖြစ်ပါသည်။ ဤ G-to-G စာချုပ်သည် အိန္ဒိယနိုင်ငံမှ သတ်မှတ် ထားသည့် ပဲမျိုးစုံ နှစ်စဉ်တင်ပို့ခွင့်ပြုသည့် ပမာဏအပေါ် သက်ရောက်မည် မဟုတ်ပေ။ မြန်မာနိုင်ငံမှ တင်ပို့သူများ အနေဖြင့် နှစ်စဉ်သတ်မှတ်ထားသည့် ပမာဏအတိုင်း အိန္ဒိယနိုင်ငံသို့ ပဲမျိုးစုံ တင်ပို့ခွင့်ရှိပါသည်။

အိန္ဒိယနိုင်ငံမှ အဓိကဝယ်ယူသည့် မတ်ပဲများကို မြန်မာနိုင်ငံတွင်သာ တွေ့ရှိရပြီး ပဲစဉ်းငုံ၊ ပဲတီစိမ်းနှင့် ကုလားပဲများကို အာဖရိကန်နိုင်ငံများနှင့် ဩစတြေးလျတို့တွင် စိုက်ပျိုးကြကြောင်း မြန်မာ နိုင်ငံ ပဲမျိုးစုံ၊ ပြောင်းနှင့် နှမ်းကုန်သည်ကြီးများအသင်းအရ သိရှိရကြောင်း (၁၆.၃.၂၀၂၅) ရက်နေ့တွင် ထုတ်ပြန်ခဲ့သော https://www.gnlm.com.mm ၏ သတင်းအချက်အလက်များအရ သိရှိရပါသည်။

Source https://www.gnlm.com.mm/india-extends-one-year-free-import-policy-for-urad/#article-title 

တင်ပြသူ ဒေါ်နွေးနွေးအောင်၊ စိုက်ပျိုးရေးဦးစီးဌာန

ရက်စွဲ ၂၀၂၅ ခုနှစ်၊ မတ်လ (၁၉) ရက်

တည်းဖြတ်သူ ဦးသောင်းထိန်၊လက်ထောက်ညွှန်ကြားရေးမှူး၊စိုက်ပျိုးရေးဦးစီးဌာန