ထိုင်းနိုင်ငံ၏ မူရင်းမျိုးဖြစ်သည့် အုန်းချိုမွှေးသည် ချိုမြိန်သောအရည်၊ နူးညံ့ချောမွေ့သော အုန်းဆန်သားနှင့် သင်းပျံ့သောရနံ့ရှိသဖြင့် လူကြိုက်များရေပန်းစားလျက်ရှိပါသည်။ ထိုင်းနိုင်ငံတွင် အုန်းချိုမွှေးပျိုးပင်များ ပြည်ပသို့ တင်ပို့ခြင်းကို တားမြစ်ထားပါသည်။ အုန်းချိုမွှေး အပင်နုချိန်တွင် (၂၂-၂၆)ရက် တစ်ကြိမ် အသီးသီးပြီး တစ်နှစ်ပတ်လုံး အသီးထွက်လျက်ရှိပါသည်။

သို့သော်လည်း မကြာသေးမီက ရာသီဥတုအပြောင်းအလဲ သက်ရောက်မှုများကြောင့် ထိုင်း အုန်းချိုမွှေး ရောင်းဝယ်ဖောက်ကားမှုကို ကာလရှည် ကန့်သတ်ထားခဲ့ပါကြောင်း၊ ထိုင်းအုန်းချိုမွှေး တင်ပို့၊ တင်သွင်းသူ CTF Thailand ၏ အကြီးအကဲ Jason က လက်ရှိ ဈေးကွက်အခြေအနေနှင့် ပတ်သက်ပြီး သိသာမြင်သာရှိစေရန် ရှင်းလင်းပြောကြားခဲ့ပါသည်။

၂၀၂၃ နှင့် ၂၀၂၄ ခုနှစ်များတွင် ထိုင်းနိုင်ငံ၏ အုန်းသီးထွက်ရှိရာ ဒေသများသည် အယ်လ်နီညို နှင့် လာနီညာ သက်ရောက်မှုကြောင့် အုန်းသီးပြတ်လပ်မှုကို ဆိုးရွားစွာ ကြုံတွေ့ ခဲ့ရသည်။ အဆိုပါ အကျိုးသက်ရောက်မှုများကြောင့် ရောင်းလိုအားကို ဆက်လက် ထိခိုက်စေ ပါသည်။ ပုံမှန်အားဖြင့် အောက်တိုဘာလမှ ဇန်နဝါရီလအထိ အုန်းသီးထွက်ရှိမှု ကျဆင်းပြီး ဈေးနှုန်း များသည်လည်း အနိမ့်ဆုံး ဖြစ်နေပါသည်။ သို့သော်လည်း ယခုရာသီတွင် အုန်းသီး ထွက်ရှိမှုမှာ နည်းပါးနေသေးပြီး စိုက်ခင်း ပေါက်ဈေးများမှာလည်း ယခင်နှစ်များနှင့် နှိုင်းယှဉ်ပါက နှစ်ဆ ပိုများကြောင်း Jason မှ ရှင်းပြခဲ့ပါသည်။

စျေးကွက်ဈေးနှုန်းများ မြင့်တက်လာသော်လည်း စိုက်ခင်းပေါက်ဈေးများကဲ့သို့ သိသိ သာသာ မြင့်တက်ခြင်း မရှိပေ။ ယခုကာလပေါက်ဈေးသည် ယခင်နှစ်များထက် (၄၀-၅၀)% ပိုများ ပါသည်။ တရုတ်နိုင်ငံတွင် အုန်းချိုမွှေး (၉)လုံးပါသော ဂျပ်ဖာတစ်ပုံးလျှင် (၉၀ - ၉၅)ယွမ် ခန့်ဖြင့် ရောင်းချခဲ့ပါသည်။ ထို့အပြင် တရုတ်နိုင်ငံရှိ ဒေသအသီးသီးတွင် အပူချိန်နိမ့်ကျမှုကြောင့် အုန်းသီး စားသုံးမှု အမြင့်ဆုံးရာသီကို နှောင့်နှေးစေခဲ့ပြီး၊ ဈေးနှုန်းများ မြင့်တက်ခြင်းကြောင့် အရောင်း မသွက်ဘဲ အေးနေခဲ့ပါသည်။

ရာသီဥတုအခြေအနေ တည်ငြိမ်လာသည်နှင့်အမျှ အုန်းသီးထွက်ရှိမှုမှာ မတ်လလယ်မှ မတ်လနှောင်းပိုင်းလောက်တွင် ပုံမှန်ပြန်ဖြစ်လာမည်ဟု မျှော်လင့်ထားပြီး ရောင်းလိုအား သိသိသာသာ

တိုးလာမည်ဟု Jason က မျှော်လင့်ပါကြောင်း၊ ထို့အပြင် ယခင်နှစ် ဧပြီလမှ ဇွန်လအထိ ဖြစ်ပေါ်ခဲ့သော ဈေးနှုန်းအတက်အကျများသည့် အခြေအနေကဲ့သို့ ဖြစ်နိုင်မည်ဟု မမျှော်မှန်းထား ပါကြောင်း၊ ပြီးခဲ့သည့်နှစ်က စျေးကွက်ပြတ်လပ်မှုကြောင့်သာ ထိုင်းအုန်းချိုမွှေး ဈေးနှုန်းသည် သမိုင်းတစ်လျှောက် မြင့်မားသော အဆင့်သို့ တွန်းပို့ခဲ့သော်လည်း ယခုနှစ် ဈေးကွက် အခြေ အနေသည် ပိုမိုတည်ငြိမ်မည်ဟု မျှော်လင့်ပါသည်။

မကြာသေးမီက ရောင်းလိုအား စိန်ခေါ်မှုများရှိနေသော်လည်း ထိုင်းအုန်းချိုမွှေး ဝယ်လိုအား ကောင်းနေပြီး ပို့ကုန်ပမာဏသည်လည်း တဖြည်းဖြည်း မြင့်တက်လာသည်။ အုန်းသီး၏ အသုံးဝင်မှုမှာ  ပုံစံအမျိုးမျိုးဖြင့် ရှိနေပါသည်။ အုန်းရည်သည် အားကစားသမားများနှင့် ကျန်းမာရေးကို ဂရုစိုက်သော စားသုံးသူများ နှစ်သက်သည့် သဘာဝ အီလက်ထရိုလိုက် ဓာတ် ကြွယ်ဝသော ဖျော်ရည်ဖြစ်ပြီး အုန်းသီးကို အစားအသောက်ဝန်ဆောင်မှု လုပ်ငန်းများတွင် တွင်ကျယ်စွာ အသုံးပြုနေပါကြောင်း၊ ဤအချက်များသည် ထိုင်းအုန်းချိုမွှေး၏ ဈေးကွက် အလား အလာကို ရေရှည် အထောက်အကူ ဖြစ်စေပါကြောင်းနှင့် ထိုင်းနိုင်ငံတွင်  အုန်းမွှေးခြံများကို စဉ်ဆက်မပြတ် တိုးချဲ့နေပါကြောင်းအား (၂၆-၂-၂၀၂၅)ရက်နေ့ထုတ် Fresh plaza သတင်း ဆောင်းပါးအရ သိရှိရပါသည်။

Source https://www.freshplaza.com/north-america/article/9708116/thai-fragrant-coconut-supply-is-expected-to-normalize-by-mid-to-late-march/

တင်ပြသူ ဒေါ်ဥမ္မာထွန်း၊ စိုက်ပျိုးရေးဦးစီးဌာန

ရက်စွဲ ၂၀၂၅ ခုနှစ်၊ မတ်လ  (၅) ရက်

တည်းဖြတ်သူ ဒေါ်ဟန်နွယ်စိုး၊ ဦးစီးအရာရှိ၊ စိုက်ပျိုးရေးဦးစီးဌာန