ဥဇဘက်ကစ္စတန်သည် လုပ်ကွက်ငယ်တောင်သူများနှင့် တစ်နိုင်တစ်ပိုင်စိုက်ခင်းများအား ပံ့ပိုးပေးရန် အတွက် စီမံချက်အသစ်များကို မိတ်ဆက်ကာ သစ်သီးထုတ်လုပ်မှု တိုးချဲ့ခြင်းနှင့် ပို့ကုန် တိုးမြှင့်ခြင်း တို့ကို အာရုံစိုက်လျက်ရှိသည်။ ဖေဖော်ဝါရီ (၁၄) ရက်တွင် သမ္မတ Shavkat Mirziyoyev သည် စိုက်ပျိုးရေး ဖွံ့ဖြိုးတိုးတက်မှု မြှင့်တင်ရန် ရည်ရွယ်သည့် အစီအစဉ်ကို အတည်ပြု ခဲ့သည်။

အလုပ်သမားရေးရာနှင့် ဆင်းရဲနွမ်းပါးမှုလျှော့ချရေး ဝန်ကြီးဌာနသည် သီးနှံစိုက်ပျိုး ထုတ်လုပ်မှုကိုခြေရာခံရန်နှင့် မျိုးစေ့ချစိုက်ပျိုးခြင်း၊ ဖန်လုံအိမ်တည်ဆောက်ခြင်းနှင့် ပို့ကုန် ဦးစားပေး စိုက်ပျိုးခြင်းတို့ကိုစောင့်ကြည့် ကြီးကြပ်ရန်၊ တောင်သူများမှ ပိုမိုထိရောက် ကောင်းမွန် သော စိုက်ပျိုးရေးဆိုင်ရာ အလေ့အကျင့်များကိုလိုက်နာရန်အတွက် ကြိုးပမ်းဆောင်ရွက်သွားမည် ဖြစ်သည်။

လုပ်ကွက်ငယ်တောင်သူများကို ပံ့ပိုးကူညီရန်နှင့် ပို့ကုန်အရည်အသွေးမီ ထုတ်ကုန်များ ပိုမို ထုတ်လုပ်နိုင်စေရန်အတွက် စိုက်ပျိုးရေးကောင်စီအသစ်ကို ဖွဲ့စည်းမည်ဖြစ်သည်။ အစိုးရသည် ပန်းသီး၊ သစ်တော်သီးနှင့် သံပုရာသီးတို့ကဲ့သို့ ဝယ်လိုအားများသော အသီးအနှံများနှင့်အတူ တရုတ်ဆီးသီး၊ စပျစ်သီး၊ မက်မွန်သီးနှင့် ချယ်ရီသီးများ ထုတ်လုပ်မှုကို တိုးမြှင့်ရန် ရည်မှန်းထား သည်။

ပို့ကုန်တိုးတက်စေရန်အတွက် ဥဇဘက်ကစ္စတန် သည် လယ်ယာထွက်ကုန်များအတွက် အရည်အသွေး စံနှုန်းများကို မိတ်ဆက်ရန် စီစဉ်နေပြီး လုပ်ကွက်ငယ်လယ်ယာနှင့် ငှားရမ်းထား သော စိုက်ပျိုးမြေများ၏ အနည်းဆုံး (၇၅) % သည် အဆိုပါစံနှုန်းများနှင့် ကိုက်ညီရမည်ဖြစ်သည်။ အဓိကကျသော စိုက်ပျိုးရေးဒေသများမှ အောင်မြင်သော အလေ့အကျင့်များကို တစ်နိုင်ငံလုံးအတိုင်း အတာအထိ တိုးချဲ့သွားမည်ဖြစ်သည်။

ကောင်စီသည် ပို့ကုန်အာရုံစိုက်သော စိုက်ပျိုးရေးကုမ္ပဏီများကို တည်ထောင်ခြင်းဖြင့် စီးပွားရေးလုပ်ငန်းများ နိုင်ငံတကာဈေးကွက်သို့ ဝင်ရောက်ရန် ကူညီပေးမည်ဖြစ်သည်။ ဤကုမ္ပဏီ များသည် နိုင်ငံတော် လယ်ယာထုတ်ကုန်အမှတ်တံဆိပ်များ ဖန်တီဖော်ဆောင်ခြင်းနှင့် ထုတ်ကုန် အရည်အသွေး မြှင့်တင်ခြင်းအတွက် တာဝန်ယူရမည်ဖြစ်ပါသည်။

- ၁၅ -

ထို့အပြင် အစိုးရသည် ဖန်လုံအိမ်နှင့် ခေတ်မီစိုက်ပျိုးရေးနည်းပညာများတွင် ရင်းနှီးမြှုပ်နှံ သည့် တောင်သူလယ်သမားများအတွက် ငွေကြေးထောက်ပံ့ပေးမည်ဖြစ်သည်။ လယ်ယာထွက် ကုန်များ သိုလှောင် သယ်ယူပို့ဆောင်ရန် အသေးစားနှင့် အလတ်စား စိုက်ပျိုးရေး ထောက်ပံ့ပို့ ဆောင်ရေး စင်တာများ တည်ဆောက်သည့် စီးပွားရေး လုပ်ငန်းများအတွက် ချေးငွေနှင့် ငှားရမ်းမှု အစီအစဉ်သစ်များ ရှိလာမည်ဖြစ်သည်။

စွမ်းဆောင်ရည်နှင့် ယှဉ်ပြိုင်နိုင်စွမ်းကို အားပေးရန်၊ အကောင်းဆုံးလုပ်ဆောင်နိုင်သော လယ်ယာများ၊ ဖန်လုံအိမ်များနှင့် မွေးမြူရေးအသင်းအဖွဲ့များကို အာရုံစူးစိုက်လာစေရန် အဆင့် သတ်မှတ်ပေးသည့်စနစ်တစ်ခုကို မိတ်ဆက်ပေးသွားမည်ဖြစ်သည်။ ဤစနစ်သည် အရည်အသွေး မြင့်ထုတ်ကုန်များ မြှင့်တင်ရန်နှင့် စိုက်ပျိုးရေးလုပ်ငန်းများကို မြှင့်တင်ရန်ရည်ရွယ်သည်။

မတ်လ (၁) ရက်မှ စတင်၍ လယ်ယာထွက်ကုန် တင်ပို့သူများအား ရောင်းခွန်စည်းမျဉ်း များကို ရှင်းလင်းပြောကြားစေမည်ဖြစ်သည်။ အခွန်အာဏာပိုင်များထံတင်သွင်းသည့် အီလက် ထရွန်းနစ် မှတ်တမ်းများကို ယခုအခါ တရားဝင်ပြေစာများအဖြစ် လက်ခံမည်ဖြစ်ကာ တောင်သူများ အတွက် ၎င်းတို့၏ထွက်ကုန်များကို ပြည်ပသို့ရောင်းချရာတွင် ပိုမိုလွယ်ကူစေမည်ဖြစ်ပါ ကြောင်း အား (၁၉.၂.၂၀၂၅) ရက်နေ့တွင် ထုတ်ပြန်ခဲ့သော Horti daily သတင်းဆောင်းပါးအရ သိရှိရပါသည်။

Source https://www.hortidaily.com/article/9706591/uzbekistan-to-support-small-farmers-and-expand-agricultural-exports/

တင်ပြသူ ဒေါ်အေးအေးခိုင်၊ စိုက်ပျိုးရေးဦးစီးဌာန

ရက်စွဲ ၂၀၂၅ ခုနှစ်၊ ဖေဖော်ဝါရီလ  (၂၆) ရက်

တည်းဖြတ်သူ ဒေါ်ဟန်နွယ်စိုး၊ ဦးစီးအရာရှိ၊ စိုက်ပျိုးရေးဦးစီးဌာန