မြန်မာနိုင်ငံသည် အကောက်ခွန်ကင်းလွတ်ခွင့်ဖြင့် ထိုင်းနိုင်ငံသို့ ပြောင်းတင်ပို့မှု စတင် နေပြီဟု ပြောင်းကုန်သည်များက ပြောကြားခဲ့ပါသည်။ ထိုင်းနိုင်ငံသည် ဖေဖော်ဝါရီလ (၁)ရက်နေ့မှ သြဂုတ်လ (၃၁)ရက်နေ့အထိ အကောက်ခွန်မဲ့ (Form D)ဖြင့် ပြောင်းတင်သွင်းမှုအတွက် ခွင့်ပြုထား ပါသည်။

သို့သော် ထိုင်းနိုင်ငံ၏ ပြောင်းစိုက်ရာသီတွင် တင်သွင်းပါက ပြောင်းစိုက်ပျိုးသူများ၏ အခွင့်အရေးကို ကာကွယ်ရန်အတွက် ပြောင်းတင်သွင်းမှုအပေါ် အမြင့်ဆုံးအခွန်နှုန်း (၇၃)ရာခိုင်နှုန်း ချမှတ်ထားပါသည်။

ထို့ကြောင့် ကုန်သည်များက ပြောင်းကို အကောက်ခွန်ကင်းလွတ်ခွင့်ဖြင့် တင်ပို့နိုင်ရန် ပြောင်းကို သိုလှောင်ထားကြပါသည်။ မြန်မာ့ပြောင်းကို ပင်လယ်ရေကြောင်းကုန်သွယ်မှုမှ တစ်ဆင့် ဖိလစ်ပိုင်၊ ဗီယက်နမ်နှင့် အိန္ဒိယသို့ အဓိကတင်ပို့ကြပြီး၊ အဆိုပါနိုင်ငံများမှလည်း ၎င်းတို့နှင့် နယ် နိမိတ်ချင်း ထိစပ်နေသော အိမ်နီးချင်းနိုင်ငံများသို့ တင်ပို့ကြပါသည်။

၂၀၂၄-၂၀၂၅ ဘဏ္ဍာရေးနှစ် ဧပြီလ (၁)ရက်နေ့မှ စတင်၍ ရှစ်လအတွင်း ပြောင်းတန်ချိန် (၁.၈၈)သန်း တင်ပို့ခဲ့ပြီး အမေရိကန်ဒေါ်လာ (၄၇၇)သန်း ရရှိခဲ့ကြောင်း မြန်မာနိုင်ငံပဲမျိုးစုံ ပဲ၊ ပြောင်းနှင့်နှမ်းကုန်သည်များအသင်းမှ သိရှိရပါသည်။ မြန်မာနိုင်ငံသည် ပြောင်းတန်ချိန် နှစ်သန်းခန့် တင်ပို့လျက်ရှိပါသည်။

ပြောင်းကို ရှမ်းပြည်နယ်၊ ကချင်ပြည်နယ်၊ ကယားပြည်နယ်၊ ကရင်ပြည်နယ်နှင့် မန္တလေး၊ စစ်ကိုင်းနှင့် မကွေးတိုင်းဒေသကြီးတို့တွင် စိုက်ပျိုးကြပြီး၊ မြန်မာနိုင်ငံတွင် ပြောင်းစိုက်ပျိုးသည့် ရာသီ သုံးရာသီ (ဆောင်း၊ နွေနှင့် မိုး)ရှိကြောင်းနှင့် မြန်မာနိုင်ငံတွင် နှစ်စဉ် ပြောင်းအထွက်နှုန်းမှာ တန်ချိန် (၂.၅)သန်းမှ (၃)သန်းအထိ ရှိကြောင်း (၁၄-၂-၂၀၂၅) ရက်နေ့ထုတ် Global New light of Myanmar သတင်းဆောင်းပါးအရ သိရှိရပါသည်။

Source

https://www.gnlm.com.mm/myanmar-begins-zero-tariff-maize-exports-to-thailand/#article-title

တင်ပြသူ ဒေါ်လင်းလဲ့ရည်အောင်၊ စိုက်ပျိုးရေးဦးစီးဌာန

ရက်စွဲ ၂၀၂၅ခုနှစ်၊ ဖေဖော်ဝါရီလ (၁၉ ) ရက်

တည်းဖြတ်သူ ဦးသောင်းထိန်၊ လက်ထောက်ညွှန်ကြားရေးမှူး၊ စိုက်ပျိုးရေးဦးစီးဌာန