Aegean အကောက်ခွန်နှင့် နိုင်ငံခြားကုန်သွယ်မှုဒေသဆိုင်ရာ ညွှန်ကြားရေးမှူးရုံး အောက်တွင် "Satsuma လိမ္မော်သီးမျိုး၏ ခူးဆွတ်ခြင်းနှင့် တင်ပို့သည့်ရက်စွဲများ သတ်မှတ်ခြင်း ဆိုင်ရာကော်မရှင်"မှ မကြာသေးမီက ဆုံးဖြတ်ချက်တစ်ခုတွင် Satsuma လိမ္မော်သီးမျိုးစိတ်အတွက် ခူးဆွတ်သည့်ရက်စွဲအား ၂၀၂၄ ခုနှစ်၊ အောက်တိုဘာလ (၁၄)ရက်နှင့် တင်ပို့သည့်ရက်စွဲအား ၂၀၂၄ ခုနှစ်၊ အောက်တိုဘာလ (၁၈)ရက်သို့ ပြောင်းလဲသတ်မှတ်ကြောင်း ဆုံးဖြတ်ခဲ့ပါသည်။  ဤဆုံးဖြတ် ချက်သည် Izmir ၏ ခရိုင်များရှိ အသေးစိတ်စစ်ဆေးမှုများနှင့် ခွဲခြမ်းစိတ်ဖြာမှုများကို လိုက်နာပြီး အနာဂတ် ပို့ကုန်လုပ်ငန်းများအတွက် စံနမူနာတစ်ခုချမှတ်ရန် ရည်ရွယ်ပါသည်။

Aegean Exporters' Association ၏ ဒုတိယဥက္ကဋ္ဌနှင့် Aegean Fresh Fruiter and Vegetable Exporters' Association ၏ ဥက္ကဋ္ဌ Hayrettin Uçak သည် တာကီယဲနိုင်ငံ၏ နှစ်စဉ် ထုတ်လုပ်မှု တန်ချိန် (၁.၉)သန်းရှိကြောင်း ဖော်ပြခဲ့ပါသည်။ Uçak သည် ချမ်းအေးသောလများ၌ ကျန်းမာရေး အကျိုးကျေးဇူးများရရှိရန် နေ့စဉ် လိမ္မော်သီး (၂-၃)လုံး စားသုံးခြင်းဖြင့် ပြည်တွင်း စားသုံးမှုကို အားပေးခဲ့ပါသည်။ ကမ္ဘာလုံးဆိုင်ရာ လိမ္မော်သီးထုတ်လုပ်မှုတွင် တာကီယဲရှယ်ယာ (၅%)ရှိပြီး လိမ္မော်သီးသည် လတ်ဆတ်သော သစ်သီးဝလံနှင့် ဟင်းသီးဟင်းရွက်ကဏ္ဍတွင် ၂၀၂၃ ခုနှစ်တွင် ထိပ်တန်းပို့ကုန်ဖြစ်ပြီး ပမာဏမှာ အမေရိကန်ဒေါ်လာ (၅၇၆)သန်းရှိကြောင်း ၎င်းက ထောက်ပြခဲ့သည်။ အထူးသဖြင့် ပါးလွှာသော အခွံနှင့်အနံ့ကြောင့် လူသိများသော satsuma လိမ္မော်သီးများသည် ပို့ကုန်တန်ဖိုး အမေရိကန်ဒေါ်လာ (၁၃၄)သန်းရှိပါသည်။ (၂၀၂၄)ခုနှစ်အတွက် ရည်မှန်းချက်မှာ လိမ္မော်သီးတင်ပို့မှု စုစုပေါင်း အမေရိကန်ဒေါ်လာ သန်း (၆၀၀)သို့ တိုးမြှင့်ရန် ဖြစ်ပြီး satsuma လိမ္မော်သီးများသည် အမေရိကန်ဒေါ်လာ သန်း (၁၅၀)ရှိလာရန် မျှော်မှန်းထား ပါသည်။

Izmir ရှိ satsuma လိမ္မော်သီးများထုတ်လုပ်မှုသည် တစ်နှစ်အတွက် တန်ချိန် (၁၆၆ဝဝဝ) ရှိပြီး မြေထဲပင်လယ်ရှိ သီးထိုးယင် အကောင်အရေအတွက်ကို လျှော့ချပြီး ပြည်ပသို့ တင်ပို့ရန် အတွက် လိမ္မော်သီး အရည်အသွေး မြှင့်တင်ရန် ပံ့ပိုးထားကြောင်း၊ ရုရှားဖက်ဒရေးရှင်း၊ ယူကရိန်းနှင့် ဆားဘီးယားတို့သည် (၂၀၂၃)ခုနှစ်တွင် တာကီယဲ satsuma လိမ္မော်သီးများကို ထိပ်တန်း တင်သွင်း သူများ ဖြစ်ကြပြီး နိုင်ငံပေါင်း (၄၇)နိုင်ငံသို့ တင်ပို့ရောင်းချခဲ့ကြောင်း (၁၄.၁၀.၂၀၂၄) ရက်နေ့တွင် ထုတ်ပြန်ခဲ့သော Railly News သတင်းဆောင်းပါးအရ သိရှိရပါသည်။

Source https://www.freshplaza.com/north-america/article/9668025/turkey-sets-export-dates-for-satsuma-mandarins/

တင်ပြသူ ဒေါ်ဟေမာန်အောင်မင်း၊ စိုက်ပျိုးရေးဦးစီးဌာန

ရက်စွဲ ၂၀၂၄ ခုနှစ်၊ အောက်တိုဘာလ (၂၃) ရက်

တည်းဖြတ်သူ ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန