ကန်ဒါဟာ (အာဖကန်နစ္စတန်နိုင်ငံ၏ ဒုတိယအကြီးဆုံးမြို့) မှ အမေရိကန်ဒေါ်လာ (၂) သန်း တန်ဖိုးရှိသော ကြက်သွန်နီတန်ချိန် (၉,၅၀၀)ကို အိန္ဒိယနှင့် ပါကစ္စတန်နိုင်ငံများသို့ မကြာ သေးမီက တင်ပို့ခဲ့ပြီး ၎င်းတင်ပို့မှုသည် ဒေသတွင်း စိုက်ပျိုးရေးထွက်ကုန်ဆိုင်ရာ ကုန်သွယ်မှုတွင် သိသာထင်ရှားသော လုပ်ဆောင်ချက်တစ်ခုအဖြစ် အသိအမှတ်ပြုခဲ့ပါသည်။ ကန်ဒါဟာ ရင်းနှီးမြှုပ်နှံ မှုနှင့် ကုန်သည်ကြီးများအသင်းသည် ပြည်ပဈေးကွက်များတွင် ပြည်နယ်၏ လက်ရှိ တည်ရှိမှုကို မြှင့်တင်နိုင်ရေးအတွက် စိုက်ပျိုးရေးပို့ကုန် တင်ပို့မှုအား ချဲ့ထွင်ရန် တက်ကြွစွာ ကြိုးပမ်းဆောင်ရွက် လျက် ရှိပါသည်။ ရင်းနှီးမြှုပ်နှံမှုနှင့် ကုန်သည်ကြီးများအသင်း၏ ဒုတိယ ဥက္ကဌဖြစ်သူ Abdul Baqi Binaသည် ကြက်သွန်နီများ အောင်မြင်စွာ တင်ပို့နိုင်မှုအား အလေးပေး ပြောကြားခဲ့ပြီး ကန်ဒါဟာ၏ ပို့ကုန်ရည်မှန်းချက်များ ပြည့်မီစေရန် အလေးပေး ကြိုးပမ်းအားထုတ် လျက်ရှိကြောင်း ပြောကြားခဲ့ ပါသည်။

Mohammad Younis နှင့် Abdul Rahman အပါအဝင် ဒေသခံတောင်သူများသည် ၎င်းတို့၏ ထွက်ကုန်များအတွက် ပြည်ပဈေးကွက်များ၏ အရေးပါမှုကိုဖော်ပြခဲ့ပြီး အရည်အသွေး မြင့်မားသော ကြက်သွန်နီများ တင်ပို့နိုင်ခြင်း၏ စီးပွားရေးအကျိုးအမြတ်များကို မီးမောင်းထိုး ပြသခဲ့ပါသည်။ လက်ရှိ နှစ်အတွက် ကြက်သွန်နီ အထွက်နှုန်း တန်ချိန် (၆၈,၀၀၀)ထွက်ရှိရန် မျှော်မှန်းပြီး ကြက်သွန်နီ စိုက်ဧက ဟက်တာ (၁,၉၀၀)ကျော် စိုက်ပျိုးထားကြောင်း ကန်ဒါဟာ စိုက်ပျိုးရေးနှင့် ဆည်မြောင်းဦးစီးဌာနက ပြောကြားခဲ့ပါသည်။ အဆိုပါ ကိန်း ဂဏန်းအချက်အလက် များအရ ပြည်နယ်၏ စိုက်ပျိုးရေးကဏ္ဍ ခိုင်မာမှုကို မြင်သာစေပြီး ပို့ကုန်တင်ပို့မှုမှတဆင့် စီးပွားရေး ဖွံ့ဖြိုးတိုးတက်မှုကို အထောက်အကူဖြစ်စေသည့် အလားအလာရှိကြောင်းကို အလေးပေးဖော်ပြ ထားကြောင်း (၁၈-၁၀-၂၀၂၄) ရက်နေ့တွင် ထုတ်ပြန်ခဲ့သော https://www.freshplaza.com ၏ သတင်း အချက်အလက်များအရ သိရှိရပါသည်။

Source https://www.freshplaza.com/north-america/article/9669625/kandahar-exports-over-9-500-tons-of-onions-to-india-and-pakistan/ 

တင်ပြသူ ဒေါ်နွေးနွေးအောင်၊ စိုက်ပျိုးရေးဦးစီးဌာန

ရက်စွဲ ၂၀၂၄ ခုနှစ်၊ အောက်တိုဘာလ (၂၃) ရက်

တည်းဖြတ်သူ ဦးသောင်းထိန်၊လက်ထောက်ညွှန်ကြားရေးမှူး၊စိုက်ပျိုးရေးဦးစီးဌာန