ပြင်သစ်နိုင်ငံနှင့် ဥရောပသမဂ္ဂသို့ ကမ္ဘောဒီးယား စားသောက်ကုန်နှင့် စိုက်ပျိုးရေး ထွက်ကုန်များ တင်ပို့နိုင်ရေးအတွက် ကမ္ဘောဒီးယားနိုင်ငံ ဖွံ့ဖြိုးတိုးတက်ရေးကောင်စီနှင့် ကမ္ဘော ဒီးယား Oknha အသင်းတို့ ဆွေးနွေးခဲ့ကြပါသည်။

အဆိုပါအစည်းအဝေးကို ကမ္ဘောဒီးယားနိုင်ငံ ဖွံ့ဖြိုးတိုးတက်ရေးကောင်စီဥက္ကဌ၊ ဒုတိယ ဝန်ကြီးချုပ် Sun Chanthol နှင့်အတူ ပြင်သစ်နိုင်ငံမှ Smart Edan ရင်းနှီးမြှုပ်နှံမှု ကုမ္ပဏီနှင့် ကိုယ်စားလှယ် အဖွဲ့ကို ဦးဆောင်သည့် ကမ္ဘောဒီးယားနိုင်ငံ Oknha အသင်းမှ အတွင်းရေးမှူးချုပ် Hun Lak တို့က ပူးတွဲသဘာပတိအဖြစ် ဆောင်ရွက်ခဲ့ပါသည်။

Lak ၏ အဆိုအရ Smart Eden သည် အလားအလာရှိသော စိုက်ပျိုးရေးထွက်ကုန် (၃)ခု ဖြစ်သည့် ဆန်၊ သီဟိုဠ်စေ့နှင့် သရက်သီးခြောက်များကို ကမ္ဘောဒီးယားမှ ပြင်သစ်သို့ တင်ပို့ရန် သဘောတူညီချက်များ ရရှိထားသည့် ပြင်သစ်ကုမ္ပဏီတစ်ခုဖြစ်ပါသည်။

လယ်ယာထွက်ကုန်များ ပြည်ပသို့ တင်ပို့ရန်အတွက် ၎င်း၏ ပံ့ပိုးမှုများကို ဖော်ပြရာ၌ Chanthol သည် သီဟိုဠ်စေ့၊ သရက်သီး၊ သကြား၊ ထန်းလျက် သကြား နှင့် ငရုတ်ကောင်း အစ ရှိသည့် ဥရောပသမဂ္ဂအဖွဲ့ရှိ ပြည်ပဈေးကွက်သို့ တိုးမြှင့်တင်ပို့ရန် အလားအလာရှိသည့် စိုက်ပျိုးရေး ထွက်ကုန်များကို အလေးပေးပြောကြားခဲ့ပါသည်။

ကမ္ဘောဒီးယား အစားအစာနှင့် စိုက်ပျိုးရေးထွက်ကုန်များ ပြည်ပဈေးကွက်သို့ ပိုမိုတင်ပို့ ရောင်းချခြင်းဖြင့် စီးပွားရေးပူးပေါင်းဆောင်ရွက်မှုအသစ်များ ထူထောင်ရန် ပုဂ္ဂလိကကဏ္ဍအား ထပ်မံ ပြောကြားခဲ့ပါသည်။

၎င်းတို့၏ စိုက်ပျိုးရေးထွက်ကုန်များနှင့် တန်ဖိုးမြှင့်စားသောက်ကုန်များသည် ပြည်ပ ဈေးကွက်သို့ ပိုမိုတင်ပို့နိုင်မည့် အလားအလာရှိကြောင်း၊ ယင်းထုတ်ကုန်များသည် ကမ္ဘောဒီးယား နိုင်ငံ၏ စီးပွားရေးတိုးတက်မှုနှင့် ဖွံ့ဖြိုးတိုးတက်မှုကို သိသိသာသာ အထောက်အကူဖြစ်စေမည့် အလားအလာရှိကြောင်း၊ ပြည်တွင်း အလုပ်အကိုင်အခွင့်အလမ်းများ မြှင့်တင်နိုင်ရန်အတွက် အခြား ပို့ကုန် ဦးစားပေး လယ်ယာ ထွက်ကုန်များ၌လည်း ဆက်လက် ရင်းနှီးမြှုပ်နှံရန် ပုဂ္ဂလိက ကုမ္ပဏီ များအား တိုက်တွန်းလိုကြောင်း၊ ကမ္ဘောဒီးယားနိုင်ငံ ဖွံ့ဖြိုးတိုးတက်ရေးကောင်စီနှင့် ကမ္ဘောဒီးယား 

- ၇ -

Oknha အသင်းတို့ ဆွေးနွေးပွဲ၌ စိုက်ပျိုးရေးပို့ကုန်များနှင့် ကမ္ဘောဒီးယား၏ စီးပွားရေး လုပ်ငန်းအသီးသီးကို မြှင့်တင်ရေးအတွက် အစိုးရ၏ ကတိကဝတ်ကို အလေးပေး ဖော်ပြခဲ့ပါသည်။

Smart Eden ၏ CEO ဖြစ်သူ Laurent Strauch သည် ကြာသပတေးနေ့တွင် ပုဂ္ဂလိက ကဏ္ဍမှ Tropicam Fruit and Vegetable Co နှင့် ဆန်၊ သီဟိုဠ်စေ့နှင့် သရက်သီးခြောက်များ အပါအဝင် ကမ္ဘောဒီးယားနိုင်ငံ၏ စိုက်ပျိုးရေးထွက်ကုန် (၃)မျိုးအား ပြင်သစ်နိုင်ငံ ဈေးကွက်သို့ တင်ပို့ရန် သဘောတူညီမှု လက်မှတ်ရေးထိုးခဲ့သည်။

ကမ္ဘောဒီးယားနိုင်ငံ စီးပွားရေးနှင့် ကူးသန်းရောင်းဝယ်ရေး ဝန်ကြီးဖြစ်သူ Cham Nimul ၏ ရှေ့မှောက်တွင် လက်မှတ်ရေးထိုးခဲ့ပြီး ၎င်းက ပြင်သစ်ဈေးကွက်သို့ စားသောက်ကုန်နှင့် လယ်ယာထွက်ကုန်များ တင်ပို့ရာတွင် လုပ်ငန်းပူးပေါင်းဆောင်ရွက်မှုအသစ်တစ်ရပ် ထူထောင် နိုင်သည့် ကုမ္ပဏီနှစ်ခုအား ချီးကျူးဂုဏ်ပြုခဲ့ပါသည်။

၂၀၂၄ ခုနှစ်၊ ပထမ (၉)လတွင် ကမ္ဘောဒီးယားနိုင်ငံသည် ဆန်တင်ပို့သည့်လုပ်ငန်း (၅၄)ခုမှ နိုင်ငံပေါင်း (၆၅) နိုင်ငံသို့ ဆန်တန်ချိန် (၄၄၅,၉၁၃)တန် တင်ပို့ခဲ့ကြောင်း၊ ဥရောပနိုင်ငံ (၂၆)နိုင်ငံသို့ ဆန်တန်ချိန် (၂၂၈၇၃၁)တန် တင်ပို့ခဲ့ကြောင်းနှင့် အဆိုပါကာလအတွင်း အမေရိကန်ဒေါ်လာ (၁၈၆.၆၇)သန်း ရရှိခဲ့ကြောင်း(၂၁. ၁၀. ၂၀၂၄)ရက်နေ့တွင် ထုတ်ပြန်သည့် KHMER TIMES သတင်း အရ သိရှိရပါသည်။

Source https://www.khmertimeskh.com/501577093/private-sector-urged-to-boost-food-agricultural-exports/

တင်ပြသူ ဒေါ်နှင်းရီဝင်း၊ စိုက်ပျိုးရေးဦးစီးဌာန

ရက်စွဲ ၂၀၂၄ခုနှစ်၊ အောက်တိုဘာလ (၂၃) ရက်

တည်းဖြတ်သူ ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန