ဗီယက်နမ်နိုင်ငံမြောက်ပိုင်းတွင် မကြာသေးမီက တိုက်ခတ်ခဲ့သော တိုင်ဖွန်းမုန်တိုင်းဒဏ် ကြောင့် မုန်တိုင်းသင့်ဒေသများတွင် ပျက်ဆီးဆုံးရှုံးမှုများ ဆက်လက်ဖြစ်ပေါ်နေပြီး ဆုံးရှုံးမှုကိန်း ဂဏန်းများ မြင့်တက်လျက်ရှိရာ ဗီယက်နမ်ဒေါင်ထရီလျံများစွာဆုံးရှုံးမှုနှင့် ရင်ဆိုင်နေရပါသည်။ တိုင်ဖွန်းမုန်တိုင်း ဒဏ်ခံရသော Luc Ngan ခရိုင်အတွင်းရှိ Huu အပါအဝင် တောင်သူများသည် စပါးစိုက်ခင်းများ၊ ဥယျာဉ်ခြံများနှင့် ပင်လယ်ငါးဖမ်းကိရိယာများ အပါအဝင် ၎င်းတို့၏ လုပ်ငန်းများ ပြန်လည်ထူထောင်ရေးအတွက် အရေးတကြီးဆောင်ရွက်နေကြပါသည်။ မုန်တိုင်းနောက်ဆက်တွဲ အဖြစ် နှစ်စဉ် လိမ္မော်သီးနှင့် ကျွဲကောသီးတန်ချိန် (၃၀၀) ထွက်ရှိသော Huu ၏ ဥယျာဉ်ခြံ (၁၀) ဟက်တာခြံသည် အသီးတန်ချိန် (၁၀၀) ခန့် မြေကြီးပေါ် ကြွေကျကုန်သဖြင့် သိသိသာသာပျက်စီး ဆုံးရှုံးမှု ကိုတွေ့မြင်ရပါသည်။ ပျက်ဆီးဆုံးရှုံးမှုများ ဖြစ်ပေါ်နေသော် လည်း Huu နှင့် သူ၏ခြံဝန် ထမ်းများသည် ကြွေကျသော အသီးများကို လျှော့ဈေးဖြင့် ရောင်းချ မည်ဖြစ်ပြီး ခရီးသွားများကို ဥယျာဉ်ခြံသို့လှည့်လည်ကြည့်ရှုခြင်းကို ကြိုဆိုနိုင်ရေးစတင်နိုင်ရန် တတ်စွမ်းသမျှဆောင်ရွက်နေကြ ပါသည်။

Yen Dung Clean Vegetable Cooperative မှ ဗီယက်နမ်ဒေါင် (၂၀) ဘီလီယံ  ပျက်စီး ဆုံးရှုံးခဲ့ကြောင်းနှင့် အခြေခံအဆောက်အဦ ပျက်စီးဆုံးရှုံးမှုမှာ ဗီယက်နမ်ဒေါင် (၁၅)ဘီလီယံ ဖြစ် ကြောင်း သတင်းထုတ်ပြန်ကြေငြာချက်အရ သိရှိရပါသည်။ လက်ထောက်ညွှန်ကြားရေးမှူး Tran Thi Thu Trang က တိုင်ဖွန်းမုန်တိုင်းလွန်ပြီးနောက် စိုက်ပျိုးမှုနှင့် စီးပွားရေးလုပ်ငန်းများ ပြန်လည် စတင်နိုင်ရန် ကြိုးပမ်းနေမှုများကို ပြောကြားခဲ့ပါသည်။အလားတူပင် Quang Ninh ရှိ Van Don ငါးမွေးမြူရေးစင်တာမှ Dang Trung Hoi သည် မုန်တိုင်းကြောင့် ကမာဖောင်များနှင့် ငါးဖမ်း ပိုက်ကွန်လှောင်အိမ်များအပါအဝင် ဗီယက်နမ်ဒေါင် (၂၀) ဘီလီယံ ဆုံးရှုံးခဲ့ရာများပြားသော ဆုံးရှုံးမှု များနှင့် ရင်ဆိုင်ခဲ့ရကြောင်းသိရှိရပါသည်။

ယခုအခါ တောင်သူများနှင့် လုပ်ငန်းပိုင်ရှင်များသည် အပျက်အဆီးများကို ရှင်းလင်းခြင်း နှင့် ပြန်လည်အသုံးပြုရနိုင်သည့် ပစ္စည်းများအား စစ်ဆေးပြုပြင်ခြင်း လုပ်ငန်းများကို အဓိကဆောင် ရွက်နေကြပါသည်။ အများစုက ၎င်းတို့၏ အသက်မွေးဝမ်းကျောင်း လုပ်ငန်းများ ပြန်လည်ထူထောင် ရန်အတွက်  ဘဏ်များမှ ဦးစားပေးချေးငွေများကဲ့သို့သော ငွေကြေးပံ့ပိုးမှုများလိုအပ်ကြောင်း ဖော်ပြ ကြပါသည်။  Van Don ခရိုင်၊ Ha Long commune မှ ငါးပုစွန်မွေးမြူရေးပညာရှင် Nguyen Van Thanh သည် တိုင်ဖွန်းမုန်တိုင်းကြောင့် ပိုင်ဆိုင်မှု အားလုံးကို ဆုံးရှုံးခဲ့ရပြီးနောက် ၎င်း၏လုပ်ငန်းကို ပြန်လည်စတင်ရန် စိန်ခေါ်မှုများရှိနေကြောင်း အလေးအနက်ပြောကြားခဲ့ပါသည်။

ဗီယက်နမ်မြောက်ပိုင်းဒေသရှိ မုန်တိုင်းဒဏ်ထိခိုက်ခံစားရသော လူမှုအသိုင်းအဝိုင်း များ သည် ပြန်လည်ထူထောင်ရေးအတွက် လုပ်ဆောင်နေချိန်တွင် ၎င်းတို့၏ စိုက်ပျိုးရေးနှင့် ရေထွက် ပစ္စည်းလုပ်ငန်းများ ပြန်လည်ထူထောင်ရေးနှင့် ပြန်လည်စတင်ရန်အတွက် ငွေကြေးအကူအညီနှင့် ပံ့ပိုးမှုများ လိုအပ်လျက်ရှိကြောင်း (၃-၁၀-၂၀၂၄) ထုတ် Freshplaza သတင်းဆောင်ပါးအရ သိရှိ ရပါသည်။

Source https://www.freshplaza.com/asia/article/9664471/typhoon-impacts-on-agriculture-in-vietnam-s-north/

တင်ပြသူ ဒေါ်လင်းလဲ့ရည်အောင်၊ စိုက်ပျိုးရေးဦးစီးဌာန

ရက်စွဲ ၂၀၂၄ ခုနှစ်၊ အောက်တိုဘာလ ( ၉ ) ရက်

တည်းဖြတ်သူ ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန