တောင်ကိုရီးယားနိုင်ငံသည် လက်ရှိဖြစ်ပေါ်နေသော အပူလှိုင်းအခြေအနေများကြောင့် ဟင်းသီးဟင်းရွက်ဈေးနှုန်းများ မြင့်တက်မှုကိုရင်ဆိုင်နေရပြီး ယခင်နှစ်နှင့် နှိုင်းယှဉ်လျှင်  မုန်ညှင်း ဖြူထုတ်ဈေးနှုန်းများ (၇၀%)နီးပါး မြင့်တက်လာခဲ့ပါသည်။ ကင်ချီပြုလုပ်ရာတွင် မရှိမဖြစ် လိုအပ် သော မုန်ညှင်းဖြူတစ်ထုပ်၏ လက်လီဈေးနှုန်းသည် ကြာသပတေးနေ့တွင် (၉၃၃၇)ဝမ်  (ဒေါ်လာ-၇.၀၂)ရှိကြောင်း ကိုရီးယား လယ်ယာ၊ သားငါးနှင့် အစားအစာကုန်သွယ်မှုမှတ်တမ်းအရ သိရှိရပါ သည်။ အဆိုပါဈေးနှုန်းသည် လွန်ခဲ့သော (၃)နှစ် ပျမ်းမျှဈေးနှုန်းထက် (၃၂.၇%)နှင့် ယခင်နှစ် ကာလတူဈေးနှုန်းနှင့် နှိုင်းယှဉ်လျှင် (၆၉.၅%)မြင့်တက်လာကြောင်း တွေ့ရှိရပါသည်။

ကိုရီးယားနိုင်ငံ၏ ပူပြင်းခြောက်သွေ့သော ရာသီကာလကြာမြင့်သည့် အခြေအနေများ သည် အရည်အသွေးကောင်းသော ဟင်းသီးဟင်းရွက်များကိုရှားပါးစေပြီး စိုက်ပျိုးရေးထွက်ကုန်များ ၏ ပျမ်းမျှဈေးနှုန်းကိုမြင့်တက်လာစေပါသည်။ ယခုဖြစ်ပေါ်နေသောအခြေအနေကို အပူနှင့်ငွေကြေး ဖောင်းပွမှုကြောင့် ဖြစ်သောအကျိုးသက်ရောက်မှုဟု သတ်မှတ်ကြပါသည်။

လယ်ယာထွက်ကုန်နှင့် ရေထွက်ပစ္စည်းများအတွက် အစိုးရ၏ ဈေးလျော့ပေးသည့် အစီ အစဉ်ပြီးဆုံးသည့် ချုဆော့ပိတ်ရက်နောက်ပိုင်းတွင် မုန်ညှင်းဖြူထုပ်ဈေးနှုန်းများ မြင့်တက်လာ ပါသည်။ ဩဂုတ် (၂၉)ရက်နေ့မှ စက်တင်ဘာ (၁၈)ရက်နေ့ အရောင်းမြှင့်တင်ရေး ကာလအတွင်း ဝယ်လိုအား မြင့်တက်မှုကြောင့် စက်တင်ဘာ (၆)ရက်နေ့တွင် မုန်ညှင်းဖြူတစ်ထုပ်လျှင် (၇၀၀၀)ဝမ် ဖြစ်ပြီး၊ စက်တင်ဘာ (၁၃)ရက်နေ့တွင် (၈၀၀၀)ဝမ်အထိ မြင့်တက်လာခဲ့ပါသည်။

အခြားဟင်းသီးဟင်းရွက်များ၏ ဈေးနှုန်းများလည်း မြင့်တက်လျှက်ရှိပါသည်။  ကြာသပတေး နေ့တွင် မုန်လာဥနီဈေးနှုန်းများသည် ယခင်နှစ်ထက်(၆၅.၄%)မြင့်တက်ခဲ့ကြောင်း၊ မုန်လာဥနီတစ်ဥ လျှင် (၃၈၂၆)ဝမ်ရှိကြောင်းသိရှိရပါသည်။ အေးမြသော ရာသီဥတုကို ကြိုက်နှစ်သော ဟင်းနုနွယ် ရွက် (၁၀၀)ဂရမ်၏ လက်လီဈေးနှုန်းမှာ (၃၇၂၈) ဝမ်ဖြစ်ပြီး ယခင်နှစ်ထက် (၄၈.၅%) မြင့်တက်ခဲ့ ပါသည်။ ဆလပ်ရွက်(အနီ)နှင့် သခွားသီး ဈေးနှုန်းများလည်းမြင့်တက်ခဲ့ရာ ဆလပ်ရွက် (အနီ) (၁၀၀) ဂရမ်လျှင်(၂၁၂၂)ဝမ် ဖြစ်ပြီး ယခင်နှစ်ထက်(၂၂.၆%)မြင့်တက်ခဲ့ကြောင်း၊ သခွားသီး(၁၀)လုံး လျှင် (၁၃,၅၄၀)ဝမ်ဖြစ်ပြီး ယခင်နှစ်ထက် (၁၇.၁%)မြင့်တက်လာကြောင်း သိရှိရပါသည်။ ချွန်းယန်း ငရုတ်သီး (၁၀၀) ဂရမ်လျှင် (၁၈၂၉) ဝမ်ဖြင့်ရောင်းချလျှက်ရှိပြီး တစ်နှစ်ထက်တစ်နှစ် (၁၈.၈%)မြင့် တက်လာကြောင်း (၂၅-၉-၂၀၂၄) နေ့ထုတ် Freshplaza သတင်းအရသိရှိရပါသည်။

Source https://www.freshplaza.com/asia/article/9660876/cabbage-prices-in-south-korea-surge-70-percent-amid-heat-wave/

တင်ပြသူ ဒေါ်လင်းလဲ့ရည်အောင်၊ စိုက်ပျိုးရေးဦးစီးဌာန

ရက်စွဲ ၂၀၂၄ ခုနှစ်၊ အောက်တိုဘာလ ( ၂ ) ရက်

တည်းဖြတ်သူ ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန