တန်ဇန်းနီးယားနိုင်ငံ၏ လယ်ယာထွက်ကုန်တင်ပို့မှုကို မြှင့်တင်ရန် ကြိုးပမ်းမှုအနေဖြင့် စိုက်ပျိုးရေးဝန်ကြီးဌာနသည် စားနပ်ရိက္ခာနှင့်စိုက်ပျိုးရေးအဖွဲ့(FAO)နှင့် ပူးပေါင်းကာ တန်ဇန်း နီးယား အပင်ကျန်းမာရေးနှင့် ပိုးသတ်ဆေးအာဏာပိုင်အဖွဲ့ (TPHPA) နှင့် STREPHIT စီမံကိန်းတို့မှ တဆင့် ဥရောပသမဂ္ဂ (EU) မှ ရန်ပုံငွေ ပံ့ပိုးပေးထားသည့် နိုင်ငံပေါင်း(၁၄)နိုင်ငံကို ပစ်မှတ်ထား၍ ဦးစားပေးသီးနှံ (၈)မျိုးအတွက် ကျယ်ပြန့်စွာ စျေးကွက်ချိတ်ဆက်နိုင်ရေးအတွက် စာရွက်စာတမ်း များကို အောင်မြင်စွာ စတင်နိုင်ခဲ့သည်။

ဤအစီအစဉ်သည် ခန့်မှန်းတန်ဖိုး ကန်ဒေါ်လာ (၃.၄)ဘီလီယံတန်ဖိုးရှိသော စျေးကွက် များသို့ ထိုးဖောက်ဝင်ရောက်နိုင်ခဲ့ပြီး တန်ဇန်းနီးယားအတွက် စီးပွားရေးနှင့် စိုက်ပျိုးရေးဆိုင်ရာ တိုးတက်မှုဆီသို့ သိသာထင်ရှားသော ခြေလှမ်းတစ်ရပ်ကို ကိုယ်စားပြုနေပါသည်။ 

တန်ဇန်းနီးယားနိုင်ငံ၏ မြို့တော် Dodoma တွင် မကြာသေးမီက တင်ပြခဲ့သည့် အစီရင် ခံစာအရ ဦးစားပေးသီးနှံ (၈)မျိုးတွင် ထောပတ်၊ သစ်ခွ၊ ငရုတ်ကောင်း ၊  နာနတ်၊  လေးညှင်း၊ ကိုကိုး၊ ငှက်ပျောနှင့် အိုင်းရစ်အာလူးများ ပါဝင်ပါသည်။

ဤသီးနှံများသည် ဉရောပသမဂ္ဂ(EU)အဖွဲ့ဝင်နိုင်ငံများ၊ အမေရိကန်၊ ဇမ်ဘီယာ၊ ပါကစ္စတန်၊ တောင်အာဖရိက၊ အိန္ဒိယ၊ ဘရာဇီး၊ မက္ကဆီကို၊ စင်္ကာပူ၊ တရုတ်၊ မလေးရှား၊ ကနေဒါ၊ တာကီယဲလ်၊ အီရတ်နှင့် အစ္စရေးနိုင်ငံတို့ ပါဝင်သည့် စျေးကွက်များအတွက် ရည်ရွယ်ပါသည်။

စိုက်ပျိုးရေးဒုတိယဝန်ကြီး Mr David Silinde က တန်ဇန်းနီးယားတောင်သူများအတွက် စျေးကွက်ချိတ်ဆက်နိုင်မှုနှင့် နိုင်ငံတကာစျေးကွက်တွင်ရပ်တည်နိုင်ရေးအတွက် အားဖြည့်ပေးနိုင်မှု သည် ပဏာမခြေလှမ်းအလှည့်အပြောင်းတစ်ခုအဖြစ်  မီးမောင်းထိုးပြခဲ့သည်။ 

Zanzibar မှ Mr Idrisa Abdallah က လေးညှင်းကဏ္ဍအတွက် သီးခြားအကျိုးကျေးဇူးများ ကို ထောက်ပြခဲ့ပြီး စိုက်ပျိုးရေးကဏ္ဍ၏ GDP နှင့် Zanzibar ၏ ပို့ကုန်ဝင်ငွေအပေါ် အပြုသဘော ဆောင်သော အကျိုးသက်ရောက်မှုများကို အလေးပေးဖော်ပြခဲ့သည်။

STREPHIT စီမံကိန်းသည်လေးနှစ်တာကာလအတွင်းစိုက်ပျိုးရေးကုန်သွယ်မှုကို ကန့်သတ် ရန်နှင့် စားနပ်ရိက္ခာဖူလုံမှုနှင့် အစားအစာ ဘေးအန္တရာယ်ကင်းရှင်းမှုကို ထိခိုက်စေသည့် အပင် ကျန်းမာရေးဆိုင်ရာ စီမံခန့်ခွဲမှုနှင့် နည်းပညာဆိုင်ရာ အတားအဆီးများကို ဖြေရှင်းရန် အာရုံစိုက် ထားသည်။

အထူးသဖြင့် EU နှင့် အခြားသော ကမ္ဘာ့ဈေးကွက်များသို့ ပိုမိုတင်ပို့နိုင်စေရန် ရည်ရွယ် ထားသည့် တန်ဇန်းနီးယား၏ စိုက်ပျိုးရေးပို့ကုန်များတွင် နိုင်ငံတကာအပင်ပိုးမွှားရောဂါ ကင်းရှင်း ရေးစံနှုန်းများကို လေးစားလိုက်နာခြင်းသည် အဓိကရည်မှန်းချက် ဖြစ်သည်။

နိုင်ငံတကာစံချိန်စံညွှန်းများနှင့် ကိုက်ညီရန် TPHPA ညွှန်ကြားရေးမှူးများ၏ စွမ်းရည်ကို မြှင့်တင်မှုများ၊ အပင်ကျန်းမာရေးစစ်ဆေးရေးမှူးများ၏ ကျွမ်းကျင်မှုကို မြှင့်တင်ပေးခြင်း၊ လုပ်ငန်း လည်ပတ်နိုင်ရန်  အရည်အသွေးစစ်ဆေးမှုနှင့်  ခြေရာခံနိုင်မှုစနစ်များကိုစီမံခန့်ခွဲခြင်းနှင့်  ခေတ်မီ အချက်အလက် စုဆောင်းခြင်းနှင့် လွှဲပြောင်းခြင်း အလေ့အကျင့်များ ဖွံ့ဖြိုးတိုးတက်လာအောင် ဆောင်ရွက်ခြင်း စသည့်တို့သည် ထင်ရှားသောရလဒ်များဖြစ်သည်ကို (၂၇.၉.၂၀၂၄)ရက်နေ့တွင် ဖော်ပြထားသည့် www.freshplaza.com ကွန်ယက်၏ သတင်းဆောင်းပါးမှတဆင့် သိရှိခဲ့ရသည်။

Source https://www.freshplaza.com/latin-america/article/9662107

/tanzania-s-agricultural-export-prospects-enhanced-by-strephit-project/

တင်ပြသူ ဦးဖုန်းမြတ်ဝင်းမောင်မောင်၊ ဒု-လ/ထဦးစီးမှူး၊ စိုက်ပျိုးရေးဦးစီးဌာန

ရက်စွဲ ၂၀၂၄ ခုနှစ်၊အောက်တိုဘာလ(၂) ရက်

တည်းဖြတ်သူ ဦးသောင်းထိန်၊ လက်ထောက်ညွှန်ကြားရေးမှူး၊ စိုက်ပျိုးရေးဦးစီးဌာန