ပြည်တွင်းစားသုံးမှု များလာခြင်းနှင့် ပြည်ပဝယ်လိုအား ခိုင်မာသည့်အတွက် ယခုနှစ်တွင် မိုးနှမ်းအထွက်နှုန်း ကျဆင်းသော်လည်း နှမ်းဈေးနှုန်းများ မြင့်တက်လျက်ရှိပါသည်။ နှမ်းရိတ်သိမ်း ရာသီ နောက်ပိုင်းကာလတွင် နှမ်းများ အရောင်းအဝယ်သွက်သည့်အတွက် စိုက်ပျိုးထုတ်လုပ်သူ တောင်သူများအတွက် အမြတ်အစွန်းများစွာ ရရှိခဲ့ကြောင်း မကွေးတိုင်းဒေသကြီး စားသုံးသူရေးရာ ဦးစီးဌာန၏ သတင်းထုတ်ပြန်ချက်အရ သိရှိရပါသည်။

မကွေးတိုင်းဒေသကြီး မင်းလှမြို့နယ်၊ ပန်းတော်ပြင်ကျေးရွာအုပ်စုတွင် စပါး၊ နှမ်း၊ ပဲမျိုးစုံနှင့် စားဖိုဆောင်သီးနှံများကဲ့သို့သော ရာသီသီးနှံများကို စိုက်ပျိုးကြပါသည်။ နှမ်းသီးနှံကို မေလတွင် စိုက်ပျိုးကြပြီး ဩဂုတ်လတွင် ရိတ်သိမ်းကြပါသည်။

မင်းလှမြို့နယ်ရှိ ကုန်စည်ဒိုင်များမှ နှမ်းများကို မန္တလေးနှင့် ရန်ကုန်မြို့များသို့ တင်ပို့ ကြပါသည်။ အဆိုပါနှမ်းများကို ရန်ကုန်ဈေးကွက်မှတဆင့် တရုတ်နှင့် စင်ကာပူသို့ တင်ပို့ပါသည်။ ထို့ပြင် မြန်မာနိုင်ငံအတွင်းတွင်လည်း နှမ်းယိုနှင့် နှမ်းလှော်လုပ်ငန်းများကဲ့သို့သော နှမ်းအခြေခံ စားသောက်ကုန်လုပ်ငန်းများနှင့် ပြည်တွင်း ဆီကြိတ်စက် လုပ်ငန်းများထံမှလည်း ပုံမှန်ဝယ်လိုအား များရှိပါသည်။

နှမ်းဖြူ စိုက်ပျိုးထုတ်လုပ်မှုကုန်ကျစရိတ်သည် မျိုးစေ့၊ စိုက်ပျိုးရေးသွင်းအားစုများနှင့် အလုပ်သမား ကုန်ကျစရိတ်များအပါအဝင် တစ်ဧကလျှင် စုစုပေါင်း ကျပ် (၃)သိန်းခန့် ကုန်ကျ ပါသည်။ မြေအနေအထားပေါ်မူတည်ပြီး နှမ်းအထွက်နှုန်းမှာ တစ်ဧကလျှင် ခန့်မှန်းခြေ (၁၀ - ၁၃) တင်းအထိ ထွက်ရှိကြောင်း ပန်းတော်ပြင်ကျေးရွာအုပ်စုရှိ စိုက်ပျိုးသူတောင်သူ တစ်ဦးက ပြောကြား ခဲ့ပါသည်။

နှမ်းစိုက်တောင်သူ ဖွံ့ဖြိုးတိုးတက်ရေးအသင်းသည် မကွေးမြို့ပတ်လမ်းဘေးတွင် တည်ရှိသော မြင့်မြတ်တော်ဝင်ကုမ္ပဏီတွင် အရောင်းစင်တာ ဖွင့်လှစ်ထားပြီး ၂၀၂၄ ခုနှစ်၊ ဩဂုတ်လ (၃၀) ရက်နေ့မှစ၍ အကျိုးဆောင်ခ(ပွဲစားခ)နှင့် အလုပ်သမားကုန်ကျစရိတ် ပေးစရာမလိုဘဲ နှမ်းဖြူနှင့် နှမ်းနက်များကို စတင်ဝယ်ယူပေးလျက်ရှိပါသည်။

နှမ်းဖြူ၊ နှမ်းဝါ၊ နှမ်းညို၊ နှမ်းနက်နှင့် ဂျပန်နှမ်းဖြူ စသည့် နှမ်းမျိုးကွဲများစွာအနက် ဂျပန်နှမ်းဖြူနှင့် နှမ်းနက် (စမုံမျိုး) တို့မှာ ဈေးကွက်ထဲတွင် ဝယ်လိုအားမြင့်မားလျက်ရှိပါသည်။

မြန်မာနိုင်ငံတွင်အများအားဖြင့်နှမ်းကို မန္တလေး၊ မကွေးနှင့် စစ်ကိုင်းတိုင်းဒေသကြီးတို့တွင် စိုက်ပျိုးကြပါသည်။ ကျောက်ဆည်ခရိုင်မှ ဂျပန်နှမ်းဖြူသည် ဈေးကွက်တွင် လူကြိုက်အများဆုံး ဖြစ်ကြောင်း (၂၇-၉-၂၀၂၄)ရက်နေ့တွင် ထုတ်ပြန်ခဲ့သော https://www.gnlm.com. mm ၏ သတင်း အချက်အလက်များအရ သိရှိရပါသည်။

Source https://www.gnlm.com.mm/sesame-trade-bustles-after-harvest-time/ 

တင်ပြသူ ဒေါ်နွေးနွေးအောင်၊ စိုက်ပျိုးရေးဦးစီးဌာန

ရက်စွဲ ၂၀၂၄ ခုနှစ်၊ အောက်တိုဘာလ  (၂) ရက်

တည်းဖြတ်သူ ဦးသောင်းထိန်၊လက်ထောက်ညွှန်ကြားရေးမှူး၊စိုက်ပျိုးရေးဦးစီးဌာန