ဩစတြေးလျနိုင်ငံသည် ၎င်းတို့၏ စိုက်ပျိုးရေးထွက်ကုန် ၉၉ ရာခိုင်နှုန်းခန့်အား အခွန် ကင်းလွတ်ခွင့်ပေးမည့် ယူအေအီးနိုင်ငံနှင့် ကုန်သွယ်မှုသဘောတူစာချုပ် ချုပ်ဆိုခဲ့ပြီး ၎င်းမှ ပထမနှစ်အတွင်း ဩစတြေးလျဒေါ်လာ ၁၃၅ သန်း (အမေရိကန်ဒေါ်လာ ၉၁ သန်း) ရရှိမည်ဖြစ် ကြောင်း အင်္ဂါနေ့တွင် ပြောကြားခဲ့ပါသည်။

အရှေ့အလယ်ပိုင်းတွင် ယူအေအီးနိုင်ငံသည် ဩစတြေးလျနိုင်ငံ၏ ကုန်သွယ်မှုနှင့် ရင်းနှီး မြှုပ်နှံမှုတွင် အကြီးဆုံး မိတ်ဖက်နိုင်ငံတစ်နိုင်ငံဖြစ်ပြီး ပြီးခဲ့သည့်နှစ်အတွင်း နှစ်နိုင်ငံ ကုန်သွယ်မှုမှ ဩစတြေးလျဒေါ်လာ (၉.၉)ဘီလီယံ ရရှိခဲ့ပြီး နှစ်နိုင်ငံရင်းနှီးမြှုပ်နှံမှုတန်ဖိုးမှာ စုစုပေါင်း ဩစ တြေးလျဒေါ်လာ (၂၀.၆)ဘီလီယံ ရှိခဲ့ပါသည်။

အဆိုပါ ကုန်သွယ်မှု သဘောတူညီချက်အောက်မှ ဩစတြေးလျနိုင်ငံသည် ပို့ကုန်တင်ပို့မှု ပမာဏအားဖြင့် တစ်နှစ်လျှင် ဩစတြေးလျဒေါ်လာ (၆၇၈)သန်း တိုးလာရန် မျှော်မှန်းထားသော် လည်း အဆိုပါသဘောတူညီချက်သည် ကိန်းဂဏန်းများထက် ဩစတြေးလျအတွက် ပိုအဓိပ္ပါယ်ရှိ ကြောင်း ကုန်သွယ်ရေးဝန်ကြီး Don Farrell က ပြောကြားခဲ့ပါသည်။

အဆိုပါသဘောတူညီချက်တွင် ဒူဘိုင်းမှ အရေးကြီးသော ဓာတ်သတ္ထုများတွင် ရင်းနှီး မြှုပ်နှံမှုအားမြှင့်တင်ရန် မူဘောင်တစ်ခုပါဝင်ပြီး သတ္ထုတွင်းလုပ်ငန်းများအနေဖြင့် အလူမီနီယံ တင်ပို့မှုတွင် အခွန်လျှော့ချခြင်းဖြင့် အကျိုးအမြတ်ရရှိမည်ဖြစ်ကြောင်း Farrell က ပြောကြားခဲ့ ပါသည်။

နှစ်နိုင်ငံစလုံးသည် ပူးပေါင်းဆောင်ရွက်မှုနှင့် အခွင့်အလမ်းသစ်များကို ရရှိစေမည့် ဘက်စုံ  စီးပွားရေး ပူးပေါင်းဆောင်ရွက်မှု သဘောတူညီချက်၏ စည်းကမ်းချက်များကို သဘောတူခဲ့ကြောင်း ယူအေအီးနိုင်ငံခြားကုန်သွယ်မှုဝန်ကြီး Thani Al Zeyoudi က ပြောကြားခဲ့ပါသည်။

ယူအေအီးနိုင်ငံသို့ ဩစတြေးလျမှ ထိပ်တန်းတင်ပို့သည့် ပို့ကုန်များတွင် အသား၊ နို့ထွက် ပစ္စည်း၊ ဆီထွက်သီးနှံ၊ ပင်လယ်စာ၊ သံမဏိ၊ အခွံမာသီး၊ ပျားရည်၊ မီးသွေး၊ ကုလားပဲနှင့် ပဲအမျိုးမျိုးတို့ ပါဝင်ပါသည်။ အဆိုပါ သဘောတူညီချက်သည် ယခုနှစ်နှောင်းပိုင်းတွင် အသက်ဝင် လာမည်ဟု မျှော်မှန်း ထားပါသည်။

ဩစတြေးလျသားငါးလုပ်ငန်းကောင်စီသည်လည်း အဆိုပါသဘောတူညီချက်သည် တောင် သူလယ်သမားများအား ဩစတြေးလျအမဲသား၊ သိုးသားနှင့် ဆိတ်သားများအတွက် အရေးပါသော ဈေးကွက်သို့ ပိုမိုဝင်ရောင်နိုင်မည်ဖြစ်သည့်အတွက် အဆိုပါသဘောတူညီချက်ကို ကြိုဆိုပါကြောင်း (၁၇ - ၉ -၂၀၂၄)ရက်နေ့တွင်ထုတ်ပြန်ခဲ့သော https://www.reuters.com ၏သတင်းအချက်အလက် များအရ သိရှိရပါသည်။

Source         https://www.reuters.com/world/australia-reaches-trade-deal-with-uae-boost-agriculture-exports-investment-2024-09-17/

တင်ပြသူ         ဒေါ်နွေးနွေးအောင်၊ စိုက်ပျိုးရေးဦးစီးဌာန

ရက်စွဲ         ၂၀၂၄ ခုနှစ်၊ စက်တင်ဘာလ (၂၅) ရက်

တည်းဖြတ်သူ ဦးသောင်းထိန်၊လက်ထောက်ညွှန်ကြားရေးမှူး၊စိုက်ပျိုးရေးဦးစီးဌာန