ထိုင်ဝမ်မှ တင်သွင်းလာသော သစ်သီးဝလံ၊ ဟင်းသီးဟင်းရွက်နှင့် ရေထွက်ကုန် ၃၄ မျိုး အတွက် အကောက်ခွန်ကင်းလွတ်ခွင့်ကို စက်တင်ဘာ ၂၅ ရက်မှ စတင်ကာဆိုင်းငံ့ထားမည်ဖြစ် ကြောင်း တရုတ်ဘဏ္ဍာရေးဝန်ကြီးဌာနက ဗုဒ္ဓဟူးနေ့ညနေပိုင်းတွင် ကြေညာခဲ့မှုအပေါ် ထိုင်ဝမ် အစိုးရတာဝန်ရှိသူများအနေဖြင့် ကမ္ဘာ့ကုန်သွယ်ရေးအဖွဲ့ (WTO) စည်းမျဉ်းအရ ရေလက်ကြား ဖြတ်ကျော်ကုန်သွယ်မှုအတွက် နိုင်ငံတကာစံနှုန်းများသို့ အမြန်ဆုံး ပြန်လည်ရရှိရန် တောင်းဆိုခဲ့ ပါသည်။

တရုတ်နိုင်ငံသည် အကောက်ခွန်ဆိုင်ရာ သဘောတူညီမှုများကို ဖျက်သိမ်းရန် တစ်ဘက် သတ်လှုပ်ရှားခဲ့သည်မှာယခုနှစ်သည်ဒုတိယအကြိမ်မြောက်ဖြစ်ပါသည်။ ဇွန်လအတွင်းရေလက်ကြား ဖြတ်ကျော် စီးပွားရေးပူးပေါင်းဆောင်ရွက်မှု ဆိုင်ရာသဘောတူညီချက်မူဘောင် (ECFA) အရ အမျိုးအမည်ပေါင်း ၁၃၄ မျိုးကို ရပ်ဆိုင်းခဲ့ပါသည်။ တရုတ်ပြည်မကြီးရေးရာကောင်စီ (MAC) ဥက္ကဋ္ဌ Chiu Chui-cheng က တရုတ်၏ လုပ်ရပ်များသည် ထိုင်ဝမ်အပေါ် စီးပွားရေးအရ အကျပ်ကိုင်မှု တစ်မျိုးဖြစ်ပြီး ရေလက်ကြားဖြတ်ကျော်ဆက်ဆံရေးအတွက် အကျိုးမရှိဟု ထောက်ပြခဲ့ပါသည်။ ထိုသို့သော အကောက်ခွန် ဆိုင်းငံ့ခြင်းသည် WTO စံနှုန်းများကို ချိုးဖောက်ပြီး ကုန်သွယ်ရေး အငြင်းပွားမှုများကို WTO ၏ ယန္တရားများ၊ မူဘောင်များဖြင့် ဖြေရှင်းသင့်ကြောင်း ၎င်းက အလေး အနက်ပြော ကြားခဲ့ပါသည်။

စိုက်ပျိုးရေးဝန်ကြီးဌာန၏ ကိန်းဂဏန်းအချက်အလက်များအရ ၂၀၂၄ ခုနှစ်တွင် တရုတ် နိုင်ငံသို့ တင်ပို့သည့် ကုန်သွယ်မှုပမာဏမှာ အမေရိကန်ဒေါ်လာ ၇ ဒသမ ၃၆ သန်းရှိကြောင်း စိုက်ပျိုးရေးဝန်ကြီး Chen Junne-jih က ပြောကြားခဲ့ပါသည်။ အကယ်၍ အကောက်ခွန်ကင်းလွတ် ခွင့်ကို ပယ်ဖျက်ပါက အပိုဆောင်းအခွန် အမေရိကန်ဒေါ်လာ ၁ ဒသမ ၀၈ သန်း ပေးဆောင် ရမည် ဖြစ်ကြောင်း ၎င်းက ရှင်းပြခဲ့သည်။ ဝန်ကြီးဌာနအနေဖြင့် ဆုံးရှုံးမှုများ၏ အကျိုး သက်ရောက်မှုကို ထိန်းချုပ်နိုင်ခဲ့ပြီး ထိုင်ဝမ်တောင်သူများ၏ အခွင့်အရေးနှင့် အကျိုးစီးပွားများကို ဆက်လက်ထိန်း သိမ်းကာ ထိုင်ဝမ်၏ စိုက်ပျိုးရေးထွက်ကုန်များကို တရုတ်နိုင်ငံပြင်ပရှိ တန်ဘိုးမြင့် ဈေးကွက်များသို့ မြှင့်တင်သွားမည်ဖြစ်ကြောင်း Chen က ပြောကြားခဲ့ပါသည်။

နိုင်ငံရေးအရ ဖိအားပေးရန် စီးပွားရေးကို အသုံးချခဲ့ပြီး နိုင်ငံတကာ ကုန်သွယ်မှုနှင့် စီးပွားရေးစည်းမျဉ်းများကို လျစ်လျူရှုခဲ့သည့် တရုတ်အား DPP ဥပဒေပြုအဖွဲ့ အထွေထွေ အတွင်း ရေးမှူး Rosalia Wu က ထပ်မံဝေဖန်ခဲ့ပြီး KMT ဥပဒေပြုလွှတ်တော်အမတ် Hung Mong-kai ကထိုင်ဝမ် တောင်သူများအတွက် ပို့ကုန်ဈေးကွက်များအမြင့်ဆုံး ရှာဖွေရန် အစိုးရအား တောင်းဆို ခဲ့ပါကြောင်းကို(၁၉-၉-၂၀၂၄)ရက်နေ့ထုတ် https://en.rti.org.tw/ news သတင်းအရ သိရှိရ ပါသည်။

Source         https://en.rti.org.tw/news/view/id/2011746

တင်ပြသူ         ဒေါ်အေးအေးခိုင်၊ စိုက်ပျိုးရေးဦးစီးဌာန

ရက်စွဲ         ၂၀၂၄ ခုနှစ်၊ စက်တင်ဘာလ  (၂၅) ရက်

တည်းဖြတ်သူ ဒေါ်ဟန်နွယ်စိုး၊ ဦးစီးအရာရှိ၊ စိုက်ပျိုးရေးဦးစီးဌာန