ဝန်ကြီးချုပ် Hun Manet သည်ကယ်လီဖိုးနီးယားရှိ ကမ္ဘောဒီးယားကုန်သည်ကြီးများအသင်းမှ ကမကထပြုလုပ်ကျင်းပသည့် အမေရိကန်စီးပွားရေးကိုယ်စားလှယ်အဖွဲ့အား ငြိမ်းချမ်းရေး နန်းတော်၌ အင်္ဂါနေ့ကခင်မင်ရင်းနှီးစွာလက်ခံတွေ့ဆုံခဲ့ပါသည်။တွေ့ဆုံစဉ် အမေရိကန်ကိုယ်စားလှယ် Patrick Murphy က ကမ္ဘောဒီးယားနိုင်ငံ၌ လက်ရှိစီးပွားရေးလုပ်ငန်းအခြေအနေ၊ ကုမ္ပဏီ (၅)ခု၏ ပူးပေါင်းဆောင်ရွက်မှုအခြေအနေ၊ရင်းနှီးမြှုပ်နှံမှု အခွင့်အလမ်းများရှာဖွေရန်နှင့် ကမ္ဘောဒီးယားရှိ စီးပွားရေးမိတ်ဖက်များနှင့်ချိတ်ဆက်၍ ဆန်၊ သီဟိုဠ်စေ့၊ ငရုတ်ကောင်း နှင့် သရက်သီးခြောက် အပါအဝင်ကမ္ဘောဒီးယားလယ်ယာထွက်ကုန်များ အမေရိကန် ဈေးကွက်သို့ တင်ပို့နိုင်ရန်ရည်ရွယ်ထားကြောင်း ဝန်ကြီးချုပ်ထံ တင်ပြခဲ့ပါသည်။

ကိုယ်စားလှယ်အဖွဲ့သည် ကမ္ဘောဒီးယားနိုင်ငံ ပညာရေးနယ်ပယ်တွင်ပူးပေါင်းဆောင်ရွက်မှုကို မြှင့်တင်ရန်အတွက်လည်း ရည်မှန်းထားပါသည်။ အမေရိကန်တွင်ဆက်လက် ပညာသင်ကြားလိုသော ကမ္ဘောဒီးယားကျောင်းသားများ အဆင်ပြေချောမွေ့စေရန်အတွက် အမေရိကန် ကုမ္ပဏီ တစ်ခုအနေဖြင့် ကမ္ဘောဒီးယားတွင် ၎င်း၏ ကိုယ်စားလှယ်ရုံးကိုဖွင့်လှစ်ရန် ဆုံးဖြတ်ခဲ့ကြောင်း သိရှိရပါသည်။အမေရိကန်ကုမ္ပဏီများ၏ ရင်းနှီးမြှုပ်နှံမှု အခွင့်အလမ်းများ ရှာဖွေခြင်းနှင့်ကမ္ဘောဒီးယား လယ်ယာထွက်ကုန်များကို အမေရိကန်ဈေးကွက်သို့ တင်ပို့ခြင်းအပြင်ကမ္ဘောဒီးယား ပညာရေး နယ်ပယ်တွင် ပူးပေါင်းဆောင်ရွက်မှု မြှင့်တင်ခြင်းတို့ကိုဝမ်းမြောက်ဝမ်းသာ ကြိုဆိုကြောင်း Mr Hun Manet က ပြောကြားခဲ့ပါသည်။ဝန်ကြီးချုပ်က စိုက်ပျိုးရေးကဏ္ဍအတွက် အခွန်မက်လုံးများ၊ လယ်ယာကဏ္ဍခေတ်မီဖွံ့ဖြိုးရေး၊ အောက်ခြေအဆင့်အတွက် စိုက်ပျိုးရေးပညာရှင်များခန့်အပ်ရေး၊ခေတ်မီစိုက်ပျိုးရေး နယ်ပယ်ထူထောင်ရေး၊ ထောက်ပံ့ပို့ဆောင်ရေးစနစ်များနှင့်ကုန်ကျစရိတ်လျှော့ချခြင်းအပါအဝင် ကမ္ဘောဒီးယားနိုင်ငံ၏ စိုက်ပျိုးရေးထွက်ကုန်များ၏ယှဉ်ပြိုင်နိုင်စွမ်းကို တိုးမြင့်စေသည့် အခြေခံ အဆောက်အအုံများ ကဲ့သို့သော အစိုးရ၏အလေးထားမှုနှင့် ဦးစားပေးကဏ္ဍများကို မီးမောင်းထိုး ပြောကြားခဲ့ပါသည်။စိုက်ပျိုးရေး၊ ပညာရေးနှင့် ကမ္ဘောဒီးယားရှိ အခြားအလားအလာရှိသော ကဏ္ဍများတွင်ရင်းနှီး မြှုပ်နှံမှုနှင့် စီးပွားရေးဆိုင်ရာ အခွင့်အလမ်းများရရှိရေးအတွက် သက်ဆိုင်ရာကမ္ဘောဒီးယား ဝန်ကြီး ဌာနများ၊ အဖွဲ့အစည်းများနှင့် ပိုမိုချိတ်ဆက်၍ အသေးစိတ်ဆွေးနွေးမှုများ ဆက်လက် ပြုလုပ်ရန်ဝန်ကြီးချုပ်က အမေရိကန် ကိုယ်စားလှယ်အဖွဲ့အား တွန်းအားပေးပြောကြားခဲ့ကြောင်းကို (၁၂-၉- ၂၀၂၄)ရက်နေ့တွင် ထုတ်ပြန်သည့် www.khmertimeskh.com သတင်းအရ သိရှိရပါသည်။

Source             https://www.khmertimeskh.com/501556376/us-delegation-keen-on-cambodian-agri-exports-boosting-education/

တင်ပြသူ         ဒေါ်နှင်းရီဝင်း၊ စိုက်ပျိုးရေးဦးစီးဌာန

ရက်စွဲ             ၂၀၂၄ ခုနှစ်၊ စက်တင်ဘာလ (၁၈) ရက်

တည်းဖြတ်သူ  ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန