အာရှ (၂)နိုင်ငံအကြားတွင် စိုက်ပျိုးရေးဆိုင်ရာ ကုန်သွယ်မှုနှင့်ရင်းနှီးမြှုပ်နှံမှုကဏ္ဍများ၌ ရရှိဖူးခြင်း မရှိသည့် အခွင့်အလမ်းများကိုဖော်ဆောင်အသုံးချနိုင်ရန် ရည်ရွယ်၍ ဗီယက်နမ်-ဂျပန် စိုက်ပျိုးရေး ကုန်သွယ်မှု နှင့်ရင်းနှီးမြှုပ်နှံမှု မူဝါဒ ဆွေးနွေးပွဲကို အင်္ဂါနေ့တွင် တိုကျိုမြို့၌ ကျင်းပခဲ့ပါသည်။အဆိုပါဆွေးနွေးပွဲကို ဗီယက်နမ်နိုင်ငံ စိုက်ပျိုးရေးနှင့် ကျေးလက်ဒေသဖွံ့ဖြိုးတိုးတက်ရေး ဝန်ကြီး ဌာန (MARD)၊ ဂျပန်နိုင်ငံဆိုင်ရာ ဗီယက်နမ်သံရုံး၊ဂျပန်ပြည်ပကုန်သွယ်မှုအဖွဲ့ (JETRO) နှင့် အာဆီယံ-ဂျပန်ဗဟိုဌာန (AJC)တို့မှ ပူးပေါင်း ကျင်းပခဲ့ပါသည်။

အဖွင့်မိန့်ခွန်းတွင် ဂျပန်နိုင်ငံဆိုင်ရာ ဗီယက်နမ်သံအမတ်ကြီး Pham Quang Hiếu က ဂျပန်နိုင်ငံသည် ဗီယက်နမ်နိုင်ငံ ဖွံ့ဖြိုးတိုးတက်ရေး အထောက်အကူပြုအဖွဲ့အတွက်အကြီးမားဆုံး အထောက်အပံ့အဖြစ်သော်လည်းကောင်း၊ ဒုတိယမြောက်အကြီးဆုံး အလုပ်သမားပူးပေါင်း ဆောင် ရွက်ရေးဆိုင်ရာ မိတ်ဖက်နိုင်ငံအဖြစ်လည်းကောင်း၊ရင်းနှီးမြှုပ်နှံမှုနှင့် ခရီးသွားလာရေးတွင် တတိယအကြီးဆုံး နိုင်ငံအဖြစ်လည်းကောင်း၊ ကုန်သွယ်မှုတွင် စတုတ္ထအကြီးဆုံး နိုင်ငံအဖြစ် လည်းကောင်း ဂုဏ်ပြုနှုတ်ခွန်းဆက်စကား ပြောကြားခဲ့ပါသည်။

သို့ရာတွင် ဂျပန်နိုင်ငံနှင့် ကုန်သွယ်မှုသည် ဗီယက်နမ်နိုင်ငံ၏ စိုက်ပျိုးရေး-သစ်တော-ရေထွက်ကုန် တင်ပို့မှု စုစုပေါင်း၏ (၇.၄%) မျှသာရှိပြီး ထိုပမာဏသည်ဂျပန်နိုင်ငံ၏ (၁.၁%)ခန့်ကို ကိုယ်စား ပြုကြောင်း ဗီယက်နမ်နိုင်ငံ၏စိုက်ပျိုးရေးကုန်သွယ်မှုတိုးတက်သည့် အလား အလာကို မှတ်ချက်ပြု ပြောကြားခဲ့ပါသည်။အလားအလာကောင်းများ ရရှိရန်အတွက် ကျွမ်းကျင်သူများအနေဖြင့် လက်တလောကာလ အခင်းအကျင်းများ၊ အခွင့်အလမ်းများနှင့် စိုက်ပျိုးရေးဆိုင်ရာကုန်သွယ်မှုနှင့် ရင်းနှီးမြှုပ်နှံမှုများ ဆောင်ရွက်ရန် မက်လုံးများစွာဖြင့် ခင်းကျင်းတင်ပြခဲ့ပါသည်။

ကုန်သွယ်မှုဆိုင်ရာ အတိုင်ပင်ခံပုဂ္ဂိုလ် Tạ Đức Minh က နှစ်နိုင်ငံ အဖွဲ့ဝင်များဖြစ်သည့် အတွက် လွတ်လပ်သော ကုန်သွယ်မှု သဘောတူညီချက်များမှ အခွန်လျှော့ချခြင်း အကျိုးကျေးဇူး များကို အကောင်းဆုံး အသုံးချရန်၊ သက်ဆိုင်ရာဝန်ကြီးဌာနများနှင့် အေဂျင်စီများမှ ပံ့ပိုးကူညီရန်၊ တိုက်ရိုက်နှင့် အွန်လိုင်း ကုန်သွယ်မှု ချိတ်ဆက်မှု အခမ်းအနားများတွင် ပါဝင်ဆောင်ရွက်ရန်၊ပြည်တွင်းပြည်ပရှိ ကုန်စည်ပြပွဲကြီးများနှင့် ပြပွဲကြီးများတွင် ထုတ်ကုန်များကို ခင်းကျင်းပြသရန် စသည်ဖြင့် စီးပွားရေးလုပ်ငန်းများဆောင်ရွက်ရာတွင် လက်တွေ့အသုံးဝင်သည့် အကြံပြုစကားများ ပြောကြားခဲ့ပါသည်။

စိုက်ပျိုးရေးနှင့် ကျေးလက်ဒေသ ဖွံ့ဖြိုးတိုးတက်ရေး ဝန်ကြီးဌာန ဒုတိယဝန်ကြီး Trần Thanh Nam နှင့် သံအမတ်ကြီး Hiếu တို့က ဦးဆောင်ဆွေးနွေးကြပြီး တက်ရောက်လာကြ သူများက အစိုးရမူဝါဒများ နှင့် ပံ့ပိုးကူညီမှု လုပ်ငန်းစဉ်များအကြောင်းမေးမြန်းကြပါသည်။နိဂုံးချုပ်အမှာစကားတွင် ဒုတိယဝန်ကြီး Nam က ဗီယက်နမ်နိုင်ငံ၏ အားသာချက်များ ဖြစ်သော အပူပိုင်းဒေသထွက်ကုန်များနှင့် ဂျပန်နိုင်ငံ၏သမပိုင်းစိုက်ပျိုးရေး၊ စက်ယန္တရားများနှင့် မြေသြဇာများဆိုင်ရာ ကျွမ်းကျင်မှုများနှင့်အတူ နှစ်နိုင်ငံ စိုက်ပျိုးရေးကဏ္ဍ၏ လိုက်လျောညီထွေ ဖြစ်သည့် သဘောသဘာဝကို အလေးပေးပြောကြားခဲ့သည်။

၎င်း၏အဆိုအရ ဂျပန်ကုမ္ပဏီများသည် ဂျပန်နှင့် တတိယနိုင်ငံ ပို့ကုန်များအတွက်ထောက်ပံ့ရေးကွင်းဆက်များဖန်တီးရန် ဗီယက်နမ်နိုင်ငံစိုက်ပျိုးရေးထုတ်လုပ်မှုကဏ္ဍတွင် ကြီးမားစွာရင်းနှီးမြုပ်နှံလျက်ရှိကြောင်း သိရှိရပါသည်။ဂျပန်နိုင်ငံသို့ ဗီယက်နမ်၏ လယ်ယာထွက်ကုန် တင်ပို့မှုသည် တဟုန်ထိုးမြင့်တက်လာခဲ့ ပြီး ဂျပန်နိုင်ငံသည် ယမန်နှစ်တွင် တတိယအကြီးဆုံးတင်သွင်းသူဖြစ်လာခဲ့ကြောင်း၊ တစ်နှစ်ထက် တစ်နှစ် (၅%) တိုးတက်လာခဲ့ပြီး ၂၀၂၄ ခုနှစ်၊ပထမနှစ်ဝက်တွင် အမေရိကန်ဒေါ်လာ (၁.၉၁) ဘီလီယံတန်ဖိုးရှိခဲ့ကြောင်း၊ ဒုတိယဝန်ကြီး Nam အနေဖြင့် နှစ်နိုင်ငံအကြား လယ်ယာ ကုန်သွယ်မှု နှင့် ရင်းနှီးမြှုပ်နှံမှုအတွက်အထောက်အကူဖြစ်စေမည့် မူဝါဒများနှင့် ယန္တရားများ တည်ဆောက်ရန် အတွက်၎င်း၏ဝန်ကြီးဌာန၊ အစိုးရတို့နှင့် တိုင်ပင်ဆွေးနွေးမည်ဟု ကတိကဝတ်ပြုခဲ့ကြောင်း (၂၀.၈. ၂၀၂၄)ရက်နေ့တွင် ထုတ်ပြန်သည့် vietnamnews.vn သတင်း အရ သိရှိရပါသည်။

Source           https://vietnamnews.vn/politics-laws/1661542/viet-nam-japan-work-to-harvest-agriculture-opportunities.html

တင်ပြသူ         ဒေါ်နှင်းရီဝင်း၊ စိုက်ပျိုးရေးဦးစီးဌာန

ရက်စွဲ             ၂၀၂၄ ခုနှစ်၊ ဩဂုတ်လ (၂၈) ရက်

တည်းဖြတ်သူ  ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန