အီဂျစ်နိုင်ငံ၏ လယ်ယာစိုက်ပျိုးရေးနှင့် မြေယာပြန်လည်ထူထောင်ရေးဝန်ကြီး Alaa Farouk သည် နိုင်ငံ၏ စက်မှုဖွံ့ဖြိုးတိုးတက်ရေးအစီအစဉ်များကို ပံ့ပိုးကူညီပေးနေမှု၊ သွင်းအားစုများ ထုတ်လုပ်မှု၊ လုံလောက်စေမှုနှင့် နိုင်ငံခြားဝင်ငွေရရှိစေမှု စသည်တို့ကို ဆောင်ကျဉ်းပေးနေသော လယ်ယာပို့ကုန်များ၏ အရေးပါသောအခန်းကဏ္ဍကို အလေးပေးပြောကြားခဲ့ပါသည်။ပို့ကုန်အတားအဆီးအားလုံးကို ဖယ်ရှားရန်အတွက် လုပ်ဆောင်နေကြောင်း အင်္ဂါနေ့က စိုက်ပျိုးရေး ပို့ကုန်နှင့် ရင်းနှီးမြှုပ်နှံမှုဆိုင်ရာ အဓိက ပုဂ္ဂိုလ်များနှင့် တွေ့ဆုံစဉ် Farouk က ပြောကြားခဲ့ပါသည်။ Farouk သည် ပြည်နယ်၏ စိုက်ပျိုးမြေချဲ့ထွင်ရန် ကြိုးပမ်းမှုကို မီးမောင်းထိုးပြခဲ့ပြီး ပို့ကုန်များ ပိုလျှံပေါများစွာ တင်ပို့နိုင်ရေး ကြိုးစားရန်၊အလုပ်အကိုင်များ ဖန်တီးပေးခြင်းနှင့် အလေအလွင့်ပစ္စည်းများ လျှော့ချရေးတွင် လယ်ယာစိုက်ပျိုးရေးလုပ်ငန်းစဉ်၏ အရေးပါမှုကို အလေးပေး ပြောကြားခဲ့သည်။

အီဂျစ်၏ တန်ဖိုးမြှင့်ပြုပြင်ထုတ်လုပ်ထားသည့် လယ်ယာပို့ကုန်များ၏ အောင်မြင်မှုသည် လတ်ဆတ်သောထုတ်ကုန်တင်ပို့မှုကို အားဖြည့်ပေးကြောင်း Farouk က ပြောကြားခဲ့ပါသည်။ Farouk က ပုဂ္ဂလိကကဏ္ဍနှင့် ပူးပေါင်းဆောင်ရွက်ပြီး စိုက်ပျိုးရေးကဏ္ဍအတွက် စည်းလုံးညီညွတ်၍ တူညီသော မျှော်မှန်းချက်ရရှိရန် ရင်းနှီးမြှုပ်နှံသူများနှင့် သိပ္ပံနည်းကျ သုတေသနများ ချိတ်ဆက်ခြင်း၏ အရေးပါမှုကို အလေးပေးပြောကြားခဲ့ပါသည်။ပြီးခဲ့သောနှစ်တွင် လတ်ဆတ်သော စိုက်ပျိုးရေး ထွက်ကုန် တန်ချိန် (၇.၃)သန်းထက်ကျော်လွန်ခဲ့သဖြင့် ပို့ကုန် တိုးမြှင့်မှုအတွက် ပုဂ္ဂလိကကဏ္ဍနှင့် ရင်းနှီးမြှုပ်နှံသူများကိုလည်း ချီးကျူးခဲ့ပါသည်။စိုက်ပျိုးရေးကဏ္ဍ တိုးတက်ရေးအတွက် အကြံပြုချက်တွေများကို နားထောင်ပြီးကြုံတွေ့ နေရသော အတားအဆီးများကို ဖယ်ရှားရန် ယခုအစည်းအဝေးကိုတက်ရောက်ခဲ့ကြောင်း Farouk က ပြောကြားခဲ့ပါသည်။ ပို့ကုန်ကဏ္ဍတိုးတက်စေရန်အဆိုပြုချက်များနှင့် အကြံဉာဏ်များကို အချိန်မရွေးတံခါးဖွင့် လက်ခံကြောင်း Farouk ကပြောကြားခဲ့ပါသည်။နိုင်ငံ့ခေါင်းဆောင်မှုများ၏ မျှော်မှန်းချက်ဖြစ်သည့်လယ်ယာစိုက်ပျိုးရေးအပါအဝင် ကဏ္ဍအားလုံးတွင် ပို့ကုန်ဒေါ်လာ (၁၀၀) ဘီလီယံရောက်ရှိနိုင်ရေး အကောင်အထည်ဖော်ရန် Farouk မှ ပို့ကုန်လုပ်ငန်းရှင်များကို တိုက်တွန်းခဲ့ပါသည်။

လယ်ယာစိုက်ပျိုးရေးဝန်ကြီးဌာနရှိ သုတေသီအားလုံးသည် နိုင်ငံအတွက်အဖိုးတန်သော အသိပညာများပံ့ပိုးပေးသည့်နယ်ပယ်များတွင်ကျွမ်းကျင်သူများဖြစ်ကြကြောင်း Farouk က ပြော ကြားခဲ့ပါသည်။သိပ္ပံနည်းကျသုတေသနလုပ်ငန်းများကို ပံ့ပိုးပေးမည်ဖြစ်ပြီး သုတေသီများနှင့်ရင်းနှီးမြှုပ်နှံသူများအတွက် အထောက်အကူဖြစ်စေမည့် ပတ်ဝန်းကျင်ကိုဖန်တီးပေးမည်ဖြစ်ကြောင်း ပြောကြားခဲ့ပါသည်။အဓိကကျသော စီမံကိန်းလုပ်ငန်းများဆောင်ရွက်ခြင်း၊ အခြေခံအဆောက်အအုံများ တည်ဆောက်ခြင်း၊ ရေအရင်းအမြစ် နှင့် ရေသန့်စင်ခြင်းစက်ရုံများဆောက်လုပ်ခြင်းစသည့်လုပ်ငန်းများ ဆောင်ရွက်ပြီးနောက် အောင်မြင်မှုအတွက်ဆောင်ရွက်ရမည့် ကိစ္စများအားလုံး အီဂျစ်တွင် ရှိကြောင်း ၎င်းက ထောက်ပြခဲ့ပါသည်။အဆိုပါ တိုးတက်မှုများသည် အီဂျစ်ကို အာရပ်ကမ္ဘာနှင့် ဒေသတွင်းတွင် စီးပွားရေးအင်အားအကောင်းဆုံး နိုင်ငံတစ်ခုအဖြစ် သဘောထားကာ စားနပ်ရိက္ခာ ကွာဟမှုကိုပေါင်းကူးခြင်း၊ စိုက်ပျိုးရေးပို့ကုန်များ မြှင့်တင်ခြင်းနှင့် နိုင်ငံခြားငွေလည်ပတ်အားကောင်းခြင်းတို့တွင် သိသာ ထင်ရှားသော တိုးတက်မှုများ ရရှိစေနိုင်ကြောင်းပြောကြားခဲ့ပါသည်။

စားနပ်ရိက္ခာဖူလုံမှုရရှိရန် စိုက်ပျိုးရေးဝန်ကြီးဌာန၏ ကြိုးပမ်းဆောင်ရွက်မှုအားလုံးအတွက် Al-Hosary က လွှတ်တော်၏ ထောက်ခံမှုရရှိကြောင်းကို အတည်ပြုခဲ့သည်။အီဂျစ်နိုင်ငံ၏ ပုဂ္ဂလိကစိုက်ပျိုးရေးကဏ္ဍအောင်မြင်မှုအတွက် ခေတ်မီနည်းပညာများပိုင်ဆိုင်ထားကြောင်း ၎င်းက မှတ်ချက်ပြုခဲ့ပါသည်။El-Gabaly သည် ကန်ထရိုက်စိုက်ပျိုးခြင်း၊ မြေယာစည်းမျဉ်းနှင့် ကန္တာရ ပြန်လည်စိမ်းလန်းစိုပြေရေးဆိုင်ရာ ပံ့ပိုးကူညီမှုအပါအဝင် လယ်သမားများနှင့် တင်ပို့ရောင်းချသူများရင်ဆိုင် နေရသည့် ပြဿနာအများအပြားကို ဆွေးနွေးခဲ့ပါသည်။ နိုင်ငံတော်၏စီးပွားရေးကိုတန်ဖိုး မြှင့်တင်ရာတွင် လယ်ယာစိုက်ပျိုးရေး၏ အရေးကြီးပုံကိုလည်းအလေးပေးပြောကြားခဲ့ပါသည်။Farouk သည် စိုက်ပျိုးရေး ပို့ကုန်လုပ်ငန်းရှင်များနှင့် ရင်းနှီးမြှုပ်နှံသူများ၏အမြင်နှင့် အကြံပြုချက်များကို နားထောင်ခဲ့ပြီး ၎င်းတို့ကြုံတွေ့ရသည့် စိန်ခေါ်မှုများနှင့်အလားအလာရှိသော ဖြေရှင်းနည်းများကို နားထောင်ခဲ့ပါသည်။ အစည်းအဝေးအတွင်းတင်ပြထားသည့် အဆိုပြုချက် များကို အကောင်အထည်ဖော်ရန်နှင့် ပို့ကုန်လုပ်ငန်းရှင်များနှင့်ရင်းနှီးမြှုပ်နှံသူများ ရင်ဆိုင်နေရသောအတားအဆီးများကိုဖယ်ရှားရန် ညွှန်ကြားခဲ့ပါသည်။ ၎င်းတို့၏ စိန်ခေါ်မှုများအတွက်ချက်ခြင်း ဖြေရှင်းနည်းများရှာဖွေရန် ၎င်းတို့နှင့် ဆက်နွယ်နေသည့် ဆက်သွယ်မှုကိုဆက်လက် ထိန်းသိမ်း ထားရန် အရေးကြီးကြောင်းကို Farouk ကအလေးပေးပြောကြားခဲ့ကြောင်း (၂၀.၈.၂၀၂၄) ရက်နေ့ တွင် ထုတ်ပြန်ခဲ့သော MENAFN-Daily News Egypt သတင်းဆောင်းပါးအရ သိရှိရပါသည်။

Source            https://menafn.com/1108581181/Egypts-Agriculture-Minister-Vows-To-Remove-Export-Barriers-Boost-Sector-Growth

တင်ပြသူ         ဒေါ်ဟေမာန်အောင်မင်း၊ စိုက်ပျိုးရေးဦးစီးဌာန

ရက်စွဲ             ၂၀၂၄ ခုနှစ်၊ ဩဂုတ်လ (၂၃) ရက်

တည်းဖြတ်သူ  ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန