မွေးမြူရေး အစာကြိတ်စက်ရုံများသည် ပြောင်းများကိုပြည်တွင်းဈေးကွက်တွင် ရောင်းလိုအား နည်းပါးနေသော်လည်းဝယ်ယူနေကြပါသည်။ ပြောင်းတင်ပို့သည့်ကုမ္ပဏီများ သည် ဇွန်နှင့် ဇူလိုင်လများတွင်ပြောင်းများကို အဓိကထား ဝယ်ယူခဲ့ကြပါသည်။ ဝယ်ယူပြီး ပြောင်းများကိုရန်ကုန်နှင့် မန္တလေးဆိပ်ကမ်းများမှတဆင့် နိုင်ငံခြားဈေးကွက်သို့ တင်ပို့ရောင်းချခဲ့ပါသည်။လက်ရှိတွင် ကုမ္ပဏီများသည် သဘောတူစာချုပ်များအတိုင်း ဝယ်ယူမှုပြီးစီးသွားပြီ ဖြစ်ပါသည်။ စျေးကွက်တွင် ရောင်းလိုအားနည်းပါးနေပြီး စက်ရုံများ၏၀ယ်လိုအား မြင့်မားလာမှုကြောင့် ဈေးနှုန်းများ မြင့်တက်လာပါသည်။မြန်မာ့ပြောင်းကို ထိုင်းနိုင်ငံသို့ အဓိကတင်ပို့ပြီး တရုတ်၊ အိန္ဒိယ၊ ဖိလစ်ပိုင်နှင့်ဗီယက်နမ်နိုင်ငံများသို့လည်းတင်ပို့နေပါသည်။ ထိုင်းနိုင်ငံသည်ဖေဖော်ဝါရီလ(၁)ရက်နေ့မှ သြဂုတ်လ (၃၁)ရက်နေ့အတွင်း အကောက်ခွန်မဲ့ (Form-D) ဖြင့် ပြောင်းတင်သွင်းမှုအတွက် အခွန်ကင်းလွတ်ခွင့် ပြုထားပါသည်။သို့သော် ထိုင်းနိုင်ငံ၏ ပြောင်းစိုက်ပျိုးရာသီတွင် ပြောင်းတင်သွင်းပါကထိုင်းစိုက်ပျိုး သူများ၏ အခွင့်အရေးကို ကာကွယ်ရန်အတွက်ပြောင်းတင်သွင်းမှုအပေါ် အမြင့်ဆုံး အကောက်ခွန်နှုန်းထား (၇၃%)ကိုချမှတ်ထားသည်။ထို့ကြောင့် မြန်မာ့ပြောင်းများကို အခွန်ကင်းလွတ်ခွင့်အခွင့်အရေးဖြင့်ထိုင်းနိုင်ငံသို့ တင်ပို့ရန် ရက်အနည်းငယ်သာ လိုပါတော့သည်။ ထို့အပြင်တရုတ်နိုင်ငံသည် အစားထိုး ဖွံ့ဖြိုးတိုးတက်ရေးအစီအစဉ်အရနယ်စပ်ဖြတ်ကျော်ကုန်သွယ်မှုမှတဆင့် မြန်မာနိုင်ငံမှ ပြောင်းများကိုဝယ်ယူလျက်ရှိပါသည်။ မြန်မာနှင့် တရုတ်နှစ်နိုင်ငံအကြား တရားဝင်ပြောင်းဝယ်ယူရေးသည် ၂၀၂၂ ခုနှစ်၊ နှစ်ကုန်ပိုင်းတွင် စတင်ခဲ့ပါသည်။ မြန်မာနိုင်ငံတွင်ပြောင်း တင်ပို့သည့် ကုမ္ပဏီစုစုပေါင်း (၁၁၂)ခုကို ခွင့်ပြုထားပါသည်။

မြန်မာနိုင်ငံသည် လက်ရှိဘဏ္ဍာရေးနှစ်ဖြစ်သည့် (၂၀၂၄-၂၀၂၅)ခုနှစ်ပထမ သုံးလ ပတ်ကာလတွင် ပြောင်းတန်ချိန် တစ်သန်းကျော်၊ ဧပြီလတွင် တန်ချိန်(၃၉၀,၀၀၀)၊ မေလ တွင် တန်ချိန် (၃၇၀,၀၀၀)နှင့် ဇွန်လတွင် တန်ချိန်(၃၉၀,၀၀၀)ကျော်တင်ပို့ခဲ့ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနထံမှ သိရပါသည်။ ၂၀၂၂ ခုနှစ်၊ ပြောင်းစိုက်ရာသီတွင် မြန်မာနိုင်ငံမှ ပြည်ပကုန်သွယ်မှုမိတ်ဖက်များသို့ ပြောင်းတန်ချိန် (၂)သန်းကျော် တင်ပို့ခဲ့ပြီး အများစုမှာ ထိုင်းနိုင်ငံသို့ တင်ပို့ခဲ့ကြောင်းမြန်မာနိုင်ငံပြောင်းစက်မှုလုပ်ငန်းရှင် များအသင်းထံမှ သိရသည်။ပြောင်းကို မြန်မာနိုင်ငံတွင် ရှမ်းပြည်နယ်၊ ကချင်ပြည်နယ်၊ကယားပြည်နယ်နှင့် ကရင်ပြည်နယ်တို့အပြင် မန္တလေး၊ စစ်ကိုင်းနှင့်မကွေးတိုင်းဒေသကြီးတို့တွင် စိုက်ပျိုး ကြသည်။ မြန်မာနိုင်ငံတွင် ဆောင်းရာသီ၊နွေရာသီနှင့် မုတ်သုံ(မိုး)ရာသီဟူ၍ ပြောင်း စိုက်ပျိုးသည့်ရာသီသုံးမျိုးရှိပါသည်။မြန်မာနိုင်ငံတွင် နှစ်စဉ် ပြောင်းအထွက်နှုန်းမှာ တန်ချိန် (၂.၅)သန်းမှ (၃)သန်းအထိရှိကြောင်းကို ၂၀.၈.၂၀၂၄ ရက်နေ့က ဖတ်ရှုခဲ့ရသည့် Global New Light ofMyanmar၏ သတင်းဆောင်းပါးမှတစ်ဆင့် သိရှိခဲ့ရသည်။

Source           https://www.gnlm.com.mm/feed-mills-sourcing-maize-amid-shortage/

တင်ပြသူ         ဦးဖုန်းမြတ်ဝင်းမောင်မောင်၊ ဒု-လ/ထဦးစီးမှူး၊ စိုက်ပျိုးရေးဦးစီးဌာန

ရက်စွဲ             ၂၀၂၄ ခုနှစ်၊ ဩဂုတ်လ(၂၈) ရက်

တည်းဖြတ်သူ  ဦးသောင်းထိန်၊ လက်ထောက်ညွှန်ကြားရေးမှူး၊ စိုက်ပျိုးရေးဦးစီးဌာန