နိုင်ငံရေးအကျပ်အတည်းကြောင့် အိန္ဒိယမှ ဘင်္ဂလားဒေ့ရှ်သို့ ကြက်သွန်နီတင်ပို့မှုရပ်နား ထားရသော်လည်း နယ်စပ်မှတစ်ဆင့် ပြန်လည်စတင်ခဲ့ကြောင်းအိမ်နီးချင်းနိုင်ငံများမှ တင်သွင်းသူ များနှင့် ကုန်သွယ်မှုအရာရှိများက သောကြာနေ့တွင်ပြောကြားခဲ့ပါသည်။ဒေသတွင်း၀ယ်လိုအား ဖြည့်ဆည်းပေးရန်အတွက် ကြက်သွန်နီကုန်တင်ကား(၁၇)စီးခန့်သည် အနောက်ဘင်္ဂလားမှ ဘင်္ဂလားဒေ့ရှ်နိုင်ငံသို့ ဝင်ရောက်လာခဲ့ကြောင်း Maharashtra ရှိ Lasalgoan စိုက်ပျိုးရေးထွက်ကုန်စျေးကွက်ကော်မတီမှ တာဝန်ရှိသူArihant Pednekar က ဆိုပါသည်။ဘင်္ဂလားဒေ့ရှ်ဘဏ်များက ထုတ်ပေးသော ပို့ကုန် အာမခံချက်များကိုကုန်သည်အများ အပြား ကိုင်ဆောင်ထားသောကြောင့်ဘင်္ဂလားဒေ့ရှ်ဘဏ်များပြန်ဖွင့်ပြီးနောက် ကြက်သွန်နီ တင်ပို့ မှုများရှိခဲ့ကြောင်းတာဝန်ရှိသူကဆိုပါသည်။ Lasalgaon သည် ကြက်သွန်နီအတွက် အာရှ၏ အကြီးဆုံးစိုက်ပျိုးရေးထွက်ကုန်ဆိုင်ရာ ဈေးကွက်ကြီး ဖြစ်ပါသည်။နှစ်နိုင်ငံကုန်သွယ်မှုတန်ဖိုး အမေရိကန်ဒေါ်လာ (၁၈)ဘီလီယံကျော်တန်ဖိုးရှိပြီးဘင်္ဂလားဒေ့ရှ် နိုင်ငံသည် တရုတ်နိုင်ငံပြီးလျှင် တောင်အာရှတွင် အိန္ဒိယ၏ အကြီးဆုံးကုန်သွယ်ဖက်ဖြစ်ပြီး လယ်ယာထွက်ကုန်များအတွက် စျေးကွက်ကြီး ဖြစ်ပါသည်။ Sheikh Hasina အစိုးရကို ဖြုတ်ချခဲ့သော မကြုံစဖူး အကြမ်းဖက်မှုများနှင့်ဆန္ဒပြမှု များကြားတွင် နှစ်နိုင်ငံကုန်သွယ်မှု ရပ်တန့်သွားခဲ့ပါသည်။ နယ်နိမိတ်များပိတ်ကာထောက်ပံ့ရေး ကွင်းဆက်များ လုံးဝပြိုလဲသွားသဖြင့် အိန္ဒိယ ပို့ကုန်လုပ်ငန်းရှင်များပိတ်မိနေခဲ့ပါသည်။ကမ္ဘာပေါ်တွင် ကြက်သွန်နီအများဆုံးတင်ပို့သည့် အိန္ဒိယနိုင်ငံသည်အကြီးဆုံးဝယ်ယူသူ များထဲမှ တစ်ခုဖြစ်သော ဘင်္ဂလားဒေ့ရှ်နိုင်ငံသို့ တန်ချိန် (၈)သိန်းအထိတင်ပို့နေပါသည်။(၂၀၂၃-၂၄)ခုနှစ်တွင် ကြက်သွန်နီတင်ပို့မှု အသားတင်တန်ဖိုးမှာ ရူပီး(၃၅၁၃)ကုဋေရှိပြီး ယခင်နှစ်က ရူပီး (၄၅၂၅)ကုဋေထက် လျော့နည်းခဲ့ပါသည်။ (၂၀၂၃-၂၄)ခုနှစ်တွင် ဘင်္ဂလားဒေ့ရှ်သည် အိန္ဒိယမှ ကြက်သွန်နီဥ တန်ချိန် (၇၂၄,၀၀၀)တင်သွင်းခဲ့ပါသည်။အိန္ဒိယနိုင်ငံ၏ အဓိကပြည်နယ်များတွင် မိုးသည်းထန်စွာရွာသွန်းမှုကြောင့်အထွက်နှုန်း (၂၀%) ကျဆင်းသွားပြီး ပြည်တွင်း၌ ကြက်သွန်နီရောင်းချမှုကိုမြှင့်တင်ရန်အတွက် ပြီးခဲ့သည့်နှစ်ဒီဇင်ဘာလတွင် အိန္ဒိယနိုင်ငံသည် ပြည်ပသို့ ကြက်သွန်ရောင်းချခြင်းကို ပိတ်ပင်ခဲ့ပါသည်။အနိမ့်ဆုံး ပို့ကုန် စျေးနှုန်း (MEP) တစ်တန်လျှင် အမေရိကန်ဒေါ်လာ (၅၅၀)နှင့်အကောက်ခွန် (၄၀%) ထပ်ပေါင်းပြီး ၂၀၂၄ ခုနှစ်၊ မေလ (၄)ရက်နေ့တွင်တင်ပို့ခွင့်ပြုခဲ့ပါသည်။ MEP သည် ကုန်သည်များ တင်ပို့၍ မရသောကြမ်းခင်းစျေးနှုန်းဖြစ်ပါသည်။သတ်မှတ်ထားသည့်နေရာများတွင် နယ်စပ်ကုန်သွယ်မှုများ ပြန်စနေကြောင်း၊ဆန္ဒပြပွဲများ မတိုင်မီ ပို့ကုန်များ ပုံမှန်တင်ပို့နေသောကြောင့် ဘင်္ဂလားဒေ့ရှ်တွင် ဈေးများမတက်သေးကြောင်း၊ နောက်ထပ်နှောင့်နှေးမှုများသည် ပို့ကုန်လုပ်ငန်းရှင်များအတွက်ဆုံးရှုံးမှုဖြစ်စေပြီး ဘင်္ဂလားဒေ့ရှ်တွင် ဈေးနှုန်းမြင့်တက်စေမည်ဖြစ်ကြောင်း Pednekar ကပြောကြားခဲ့ပါသည်။ဟာဆီနာဦးဆောင်သော အဝါမီလိဂ်အစိုးရကို ဖြုတ်ချပြီးနောက်ကြားဖြတ်အစိုးရသစ်က တာဝန်ယူခဲ့သည့် နောက်တွင် အိန္ဒိယသည် ကြက်သွန်နီအပြင်အိမ်နီးချင်းနိုင်ငံသို့ ဘာစမာတီ မဟုတ်သော ဆန်၊ သကြားနှင့် ချည်တို့ကိုလည်းတင်ပို့လျက်ရှိပါသည်။ကြက်သွန်နီ တင်ပို့ရောင်းချသူများအသင်း ဥက္ကဋ္ဌ Ajit Shah က အစိုးရအနေဖြင့်လက်ရှိ သီးနှံများ အားကောင်းနေမှုကြောင့် ကုန်စည်အပေါ် ပို့ကုန်ခွန် ဖယ်ရှားသင့်ကြောင်းဆိုပါသည်။ ထို့အပြင် ဘင်္ဂလားဒေ့ရှ်၊ မလေးရှား၊ သီရိလင်္ကာ၊ အင်ဒိုနီးရှားနှင့်အရှေ့အလယ်ပိုင်းတို့သည် အိန္ဒိယ အတွက် အရေးကြီးသော စျေးကွက်များဖြစ်ကြောင်း(၉.၈.၂၀၂၄)ရက်နေ့တွင် ထုတ်ပြန်ခဲ့သော Hindustan Times Newsသတင်းဆောင်းပါးအရ သိရှိရပါသည်။

Source    https://www.hindustantimes.com/india-news/india-resumes-agricultural-exports-to-bangladesh-as-border-trade-points-open-101723207568749.html

တင်ပြသူ ဒေါ်ဟေမာန်အောင်မင်း၊ စိုက်ပျိုးရေးဦးစီးဌာန

ရက်စွဲ      ၂၀၂၄ ခုနှစ်၊ ဩဂုတ်လ (၂၁) ရက်

တည်းဖြတ်သူ ဦးသောင်းထိန်၊ လက်ထောက်ညွှန်ကြားရေးမှူး၊စိုက်ပျိုးရေးဦးစီးဌာန