ရှမ်းပြည်နယ် ညောင်ရွှေမြို့တွင် ခရမ်းချဉ်သီးများ လှိုင်လှိုင်ပေါ်ချိန်ဖြစ်သဖြင့်ဒေသခံများ ဈေးပေါပေါဖြင့် ဝယ်ယူရရှိနေပါသည်။ရှမ်းပြည်တောင်ပိုင်း ညောင်ရွှေမြို့နယ် ကုန်းမြင့်ဒေသနှင့် အင်းလေးဒေသတို့တွင်ခရမ်း ချဉ်သီးအထွက်နှုန်း တိုးလာသဖြင့် စားသုံးသူများအား ဈေးနှုန်းသက်သာစွာဖြင့်ဝယ်ယူရရှိအောင် ကူညီပေးလျက်ရှိပါသည်။ယခုကာလသည် ကုန်းမြင့်ဒေသ ခရမ်းချဉ်သီး ဆွတ်ခူးရာသီချိန်လည်းရောက်ရှိနေပြီ ဖြစ်ပြီး၊ ကုန်းမြင့်ဒေသနှင့် အင်းလေးဒေသ နှစ်ခုလုံးမှ ခရမ်းချဉ်သီးများထွက်ရှိနေသောကြောင့် ထုတ်လုပ်မှု ပေါများလျက်ရှိပါသည်။မိုးများလည်းရွာသွန်းလျက်ရှိပြီး ခရမ်းချဉ်သီးဈေးမှာ ထက်ဝက် နီးပါးလျော့ကျသွားခဲ့သောကြောင့် စားသုံးသူများအနေဖြင့် သက်သာသည့် ဈေးနှင့် ဝယ်ယူနိုင်ပါကြောင်း၊ ညောင်ရွှေမြို့နယ် မိဘမေတ္တာဟင်းသီးဟင်းရွက်လက်ကားရောင်းဝယ်ရေးကုန်စည်ဒိုင်မှ တာဝန်ရှိသူတစ်ဦးကပြောပါသည်။ရှမ်းပြည်နယ် တောင်ပိုင်း အင်းလေးဒေသတွင် ခရမ်းချဉ်သီး စိုက်ဧက ၂၀၀,၀၀၀ နီးပါး ရှိပြီး ရန်ကုန်၊ မန္တလေး၊ ရှမ်းပြည်နယ် အရှေ့ပိုင်း၊ ရှမ်းပြည်နယ် မြောက်ပိုင်းနှင့် အခြားတိုင်းဒေသကြီးနှင့် ပြည်နယ်များသို့ ပို့ဆောင်လျက်ရှိကြောင်း ညောင်ရွှေမြို့မှ ခရမ်းချဉ်သီးလက်ကား ကုန်စည် ဒိုင်မှ သိရှိရပါသည်။ညောင်ရွှေနှင့် အင်းလေး အပါအဝင် ရှမ်းပြည်နယ် တောင်ပိုင်းမှ ထွက်ရှိသောခရမ်းချဉ်သီး များကို အခြားဒေသများသို့ ပို့ဆောင်ပေးလျက်ရှိပါသည်။ယခုအချိန် ခရမ်းချဉ်သီး ဈေးနှုန်းကျဆင်းရခြင်းမှာ ကုန်းမြင့်ဒေသ စိုက်ခင်းများမှအမြောက်အမြားထွက်ရှိသော အကြောင်းအရင်းကြောင့်လည်းဖြစ်ပြီး အခြားဒေသများသို့ပို့ဆောင် ပေးပြီး အရောင်းအဝယ်မှာလည်း ပါးနေပုံရကြောင်း၊ အခြားသောဟင်းသီးဟင်းရွက်များလည်း ခူးဆွတ်နေပြီ ဖြစ်သော်လည်း ခရမ်းချဉ်သီး အထွက်နှုန်းမှာမူ သိသိသာသာများ နေကြောင်းကို (၁၄-၈-၂၀၂၄)ရက်နေ့ထုတ် Global New Light of Myanmar သတင်းအရသိရှိရပါသည်။

Source           https://www.gnlm.com.mm/tomato-production-abundant-in-nyaungshwe-consumers-enjoy-cheaper-price/

တင်ပြသူ         ဒေါ်အေးအေးခိုင်၊ စိုက်ပျိုးရေးဦးစီးဌာန

ရက်စွဲ             ၂၀၂၄ ခုနှစ်၊ ဩဂုတ်လ (၂၁) ရက်

တည်းဖြတ်သူ   ဒေါ်ဟန်နွယ်စိုး၊ ဦးစီးအရာရှိ၊ စိုက်ပျိုးရေးဦးစီးဌာန