ပီရူး၏ လယ်ယာထွက်ကုန် တင်ပို့မှုသည် (၂၀၂၃)နှစ်ကုန်တွင် အမေရိကန်ဒေါ်လာ (၁၀.၅၄၅) ဘီလီယံအထိ ရောက်ရှိခဲ့ပြီး (၂၀၂၄)နှစ်ကုန်တွင် အမေရိကန်ဒေါ်လာ (၁၁.၅၀၀) ဘီလီယံကျော် အထိရောက်ရှိရန် မျှော်မှန်းထားကြောင်း စိုက်ပျိုးရေးနှင့် ဆည်မြောင်းဝန်ကြီးဌာန (Midagri) ၏ အစီရင်ခံချက်အရ သိရှိရပါသည်။ စိန်ခေါ်မှုများ ရှိနေသော်လည်း ထုတ်လုပ်သူများ၊ ပို့ကုန် လုပ်ငန်းရှင်များနှင့် အစိုးရတို့ ပူးပေါင်းကြိုးပမ်းမှုကြောင့် ယခင်နှစ်ထက် ပို့ကုန် (၂.၉%) တိုးလာခဲ့ ပါသည်။ လွန်ခဲ့သည့် (၂၃)နှစ်အတွင်း အဆိုပါပို့ကုန်များ၏ နှစ်စဉ် ပျမ်းမျှတိုးတက်မှုနှုန်းသည် (၁၁.၉%) ရှိခဲ့ပါသည်။

အဆိုပါပို့ကုန်တင်ပို့မှု တိုးမြင့်လာခြင်း၏ အဓိကသော့ချက်မှာ စပျစ်သီး၊ ဘလူးဘယ်ရီ၊ ထောပတ်သီး၊ ကညွှတ်၊ သရက်သီးနှင့် လိမ္မော်သီးများ အပါအဝင် စုစုပေါင်း လယ်ယာထုတ်ကုန် တင်ပို့မှု၏ (၇၄.၆%)ရှိသော ထုတ်ကုန် (၂၀)ခုကြောင့်ဖြစ်ပါသည်။ ထူးခြားချက်မှာ စပျစ်သီး၊ ဘလူး ဘယ်ရီနှင့် ထောပတ်သီးများတစ်ခုစီ၏ နှစ်စဉ် ပို့ကုန်တန်ဖိုးမှာ အမေရိကန်ဒေါ်လာ (၁)ဘီလီယံ ကျော်ရှိကြောင်း သိရှိရပါသည်။

စပျစ်သီးတင်ပို့မှုတန်ဖိုးသည် (၂၀၂၃)ခုနှစ်တွင် အမေရိကန်ဒေါ်လာ (၁.၇၄၅)ဘီလီယံအထိ ရောက်ရှိခဲ့ပြီး (၂၀၂၂)ခုနှစ်ထက် (၂၈%) တိုးလာခဲ့ပါသည်။ အဓိကအားဖြင့် Ica နှင့် Piura ကဲ့သို့သော ဒေသများမှ စပျစ်သီးတင်ပို့ရာသီသည် ဒီဇင်ဘာလနှင့် ဇန်နဝါရီလတွင် အမြင့်ဆုံးဖြစ်ပြီး အမေရိကန်ပြည်ထောင်စု၊ ဥရောပသမဂ္ဂနှင့်အာရှ စျေးကွက်များကို အဓိက တင်ပို့ရောင်းချခြင်း ဖြစ်ပါသည်။

ဘလူးဘယ်ရီတင်ပို့မှုတန်ဖိုးမှာ (၂၀၂၃)ခုနှစ်တွင် အမေရိကန်ဒေါ်လာ (၁.၆၇၆)ဘီလီယံ ရရှိ ခဲ့ပါသည်။ တင်ပို့မှုမှာ ယခင်နှစ်ကထက် (၂၄.၂%) ကျဆင်းခဲ့သော်လည်း နိုင်ငံတကာဈေးကွက် ပေါက်ဈေးများ မြင့်မားလာခြင်းကြောင့် အဆိုပါ ပို့ကုန်တန်ဖိုးကို မြှင့်တင်ပေးခဲ့ပါသည်။ နိုင်ငံတကာ စံချိန်စံညွှန်း မြင့်မားသော အပင်မျိုးစိတ်သစ်များကြောင့် ဘလူးဘယ်ရီ တင်ပို့မှုကို စက်တင်ဘာလ နှင့် အောက်တိုဘာလများတွင် အမြင့်ဆုံး ပမာဏဖြင့် တိုးချဲ့တင်ပို့နိုင်ခဲ့ပါသည်။

ထောပတ်သီးတင်ပို့မှုသည် (၂၀၂၃)ခုနှစ်တွင် စုစုပေါင်းအမေရိကန်ဒေါ်လာ (၉၆၃)သန်းဖြင့် တတိယနေရာတွင် ရပ်တည်ခဲ့ပြီး ယခင်နှစ်ကထက် (၇.၆%)တိုးမြင့် တင်ပို့နိုင်ခဲ့ပါသည်။ ပို့ကုန်ရာသီသည် တစ်နှစ်ပတ်လုံးနီးပါး ကြာမြင့်ပြီး အဓိကတင်ပို့မှုကာလမှာ မတ်လမှ စက်တင်ဘာလ အထိဖြစ်ပါသည်။ ထောပတ်သီးကို Ica နှင့် Lambayeque ကဲ့သို့သော ဒေသများတွင် အဓိက ထွက်ရှိပါသည်။

အခြားထင်ရှားသော ပီရူး လယ်ယာထွက်ကုန်ပို့ကုန်များမှာ ကော်ဖီ၊ ကိုကိုး၊ သရက်သီးနှင့် quinoa တို့ ဖြစ်ပါသည်။ ရာသီဥတု အပြောင်းအလဲများကြားမှ ပီရူးနိုင်ငံ၏ ကွဲပြားသော ဂေဟစနစ်များနှင့် ရာသီဥတုများသည် တစ်နှစ်ပတ်လုံး ထုတ်လုပ်နိုင်ရန် အခြေအနေပေးလျက်ရှိပြီး နိုင်ငံ၏ ခိုင်မာသော ပို့ကုန်စွမ်းဆောင်ရည်ကို အထောက်အကူပြုလျက်ရှိပါကြောင်း (၆.၈.၂၀၂၄) ရက်နေ့ တွင် ထုတ်ဝေခဲ့သော  Fresh Plaza ကွန်ရက်ဆောင်းပါးအရသိရှိရပါသည်။

Source         https://www.freshplaza.com/north-america/article/9647208/agri-exports-peru-projected-to-surpass-us-11-500-billion-by-the-end-of-2024/

တင်ပြသူ         ဒေါ်မြတ်ဖူးငုံဦး၊ စိုက်ပျိုးရေးဦးစီးဌာန

ရက်စွဲ         ၂၀၂၄ခုနှစ်၊ ဩဂုတ်လ (၁၄) ရက်

တည်းဖြတ်သူ ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန