ဇင်ဘာဘွေနိုင်ငံမှ တင်ပို့သည့် လယ်ယာသုံးစက်ကိရိယာများနှင့် ပြုပြင်ထုတ်လုပ် ထားသော စားသောက်ကုန်များ အပါအဝင် စိုက်ပျိုးရေးထွက်ကုန်များ ဇမ်ဘီယာနိုင်ငံတွင် နေရာ ယူလျက် ရှိပါသည်။ဇင်ဘာဘွေနိုင်ငံ၏ ပို့ကုန်မြှင့်တင်ရေးအဖွဲ့ (ZimTrade) ၏ တွေ့ရှိချက်များအရ ဇမ်ဘီယာ နိုင်ငံတွင် စိုက်ပျိုးရေးထွက်ကုန်နှင့် ပြုပြင်ထုတ်လုပ်ထားသော စားသောက်ကုန်ကဏ္ဍသည် ဇင်ဘာဘွေ နိုင်ငံ၏ ဈေးကွက်ကို လွှမ်းမိုးလျက်ရှိပါသည်။

Lusaka တွင် ကျင်းပပြုလုပ်သည့် Zambia Agriculture and Commercial Show အတွင်း ထုတ်ပြန်ခဲ့သည့် အစီရင်ခံစာသည် ဇမ်ဘီယာဈေးကွက်တွင် အခိုင်အမာ ရပ်တည်နေသည့် ဇင်ဘာဘွေ ကုမ္ပဏီများ၏ အောင်မြင်မှုများနှင့် အိမ်နီးချင်းနိုင်ငံများတွင် ၎င်းတို့၏ ဈေးကွက်ချဲ့ထွင်ရန် ဆက်လက် ကြိုးစားအားထုတ်မှုများကို မီးမောင်းထိုးပြသထားပါသည်။

အဆိုပါထုတ်ပြန်ချက်နှင့်စပ်လျဉ်း၍ ZimTrade ၏ Client Advisor ဖြစ်သူ Valile Dube သည် အဆိုပါအောင်မြင်တိုးတက်မှုများကို ရေရှည်ထိန်းသိမ်းထားနိုင်ရေးအတွက် လယ်ယာသုံး စက်ကိရိယာများနှင့် ပြုပြုထုတ်လုပ်ထားသော စားသောက်ကုန်များ ထုတ်လုပ်မှုကို မြင့်တင်ရန် အရေးကြီးကြောင်း အလေးထားပြောကြားခဲ့ပါသည်။

ပို့ကုန်တင်ပို့မှုများ မြင့်တက်လာစေရန် လမ်းကြောင်းမှန်မှန်ဖြင့် ဆက်လက်လုပ်ဆောင် သွားရန် လိုအပ်ကြောင်း၊ နိုင်ငံတော်အစိုးရအနေဖြင့် ဈေးကွက်သစ်များရှာဖွေခြင်း၊ ပို့ကုန်လုပ်ငန်း ရှင်များ ရင်ဆိုင်နေရသည့် စိန်ခေါ်မှုများကို ရင်ဆိုင်ဖြေရှင်းပေးခြင်းနှင့် အနာဂတ်အတွက် အစီ အစဉ်များ ချမှတ်ရေးဆွဲခြင်းတို့ကို အဓိကဦးတည်သည့် ကြားဝင်ဆောင်ရွက်မှုများကို စတင်မိတ်ဆက် ဆောင်ရွက် ခဲ့ကြောင်း Dube က ပြောကြားခဲ့ပါသည်။

အဆိုပါပြပွဲသည် ပြည်ပပို့ကုန် တင်ပို့မှုကို တွန်းအားပေးပြီး အလုပ်အကိုင်အခွင့်အလမ်း များကို မြှင့်တင်ပေးသည့်အတွက် အရေးပါသော ပြပွဲတစ်ခုဖြစ်ပါသည်။အမျိုးသားဖွံ့ဖြိုးတိုးတက်ရေးမဟာဗျူဟာ (၁) သည် ပို့ကုန်တင်ပို့မှုတွင် နှစ်စဉ် တိုးတက်မှု (၁၀%)ရရှိရန် ရည်မှန်းချက် ကြီးကြီးမားမား ထားရှိထားကြောင်းလည်း Dube က အလေးပေး ပြောကြားခဲ့ပါသည်။

လက်ရှိ အနာဂတ်လမ်းကြောင်းတွင် ထုတ်လုပ်မှုများ တိုးမြှင့်ထုတ်လုပ်ရန် ရည်ရွယ်သည့်စက်ယန္တရားများ လိုအပ်လျက်ရှိပါသည်။ ဇင်ဘာဘွေနိုင်ငံ၏ ပို့ကုန်တင်ပို့မှု တိုးမြှင့်ရန်အတွက် ပြည်တွင်းကုမ္ပဏီများသည် အထူးသဖြင့် လယ်ယာသုံးစက်ကိရိယာများနှင့် ပြုပြင်ထုတ်လုပ်ထားသည့် စားသောက်ကုန်များ၏ ဝယ်လိုအား မြင့်မားလာစေရေးကို ထည့်သွင်းစဉ်းစားပြီး အိမ်နီးချင်းနိုင်ငံ များ၏ စီးပွားရေးဈေးကွက်များသို့ ထိုးဖောက်ဝင် ရောက်ရန် အရေးကြီးပါသည်။ ဇင်ဘာဘွေနိုင်ငံ၏ ကုန်ပစ္စည်းများ ဝယ်လိုအား မြင့်တက်လာခြင်းသည် နှစ်နိုင်ငံအကြား ပူးပေါင်းဆောင်ရွက်မှုနှင့် ပိုမိုတိုးတက်လာမှု အလားအလာကောင်းများကို မီးမောင်းထိုးပြသခဲ့ပါသည်။ ဇင်ဘာဘွေနိုင်ငံ၏ လယ်ယာသုံးစက်ကိရိယာများနှင့် ပြုပြင်ထုတ်လုပ်ထားသော စားသောက်ကုန်များသည် ကုန်ပစ္စည်း၏ အရည်အသွေးနှင့် ယုံကြည်စိတ်ချရမှုများကြောင့် ဝယ်လိုအားများ ခိုင်မာ အားကောင်းလျက် ရှိပါကြောင်း Dube က ရှင်းလင်းပြောကြားခဲ့ပါသည်။

ဤသို့ ပို့ကုန်တင်ပို့မှုများ မြင့်တက်လာခြင်းသည် ပြီးခဲ့သည့် (၂) နှစ်အတွင်း ဇင်ဘာဘွေ နိုင်ငံ၏ နိုင်ငံခြားဝင်ငွေ စီးဆင်းမှုကို အမေရိကန်ဒေါ်လာ (၁၀)ဘီလီယံ ကျော်လွန်အောင် ပံ့ပိုးပေးခဲ့ရုံ သာမက အလုပ်အကိုင် အခွင့်အလမ်းများနှင့် စီးပွားရေးတည်ငြိမ်မှု သိသိသာသာ အထောက်အကူ ဖြစ်စေခဲ့ပါသည်။

ဇမ်ဘီယာနိုင်ငံတွင် ဇင်ဘာဘွေနိုင်ငံ၏ စိုက်ပျိုးရေးထွက်ကုန် တင်ပို့မှု၏ အောင်မြင်မှု များသည် ဒေသတွင်းစီးပွားရေးပူးပေါင်းဆောင်ရွက်မှုများ ပိုမိုကျယ်ပြန့်လာပြီး ကုန်သွယ်မှုကို မြှင့်တင်ရန် ရည်ရွယ်သည့် မဟာဗျူဟာမြောက် ဆောင်ရွက်ချက်များ၏ ထိရောက်မှုများကို ထင်ဟပ်စေကြောင်း စိုက်ပျိုးရေးပညာရှင် Nickros Kajengo က ပြောကြားခဲ့ပါသည်။

ဇင်ဘာဘွေနိုင်ငံသည် လယ်ယာထွက်ကုန် စိုက်ပျိုးထုတ်လုပ်မှုနှင့် ပြုပြင်ထုတ်လုပ်မှုတွင် ရင်းနှီးမြှုပ်နှံမှုများ ဆက်လက်လုပ်ဆောင်လျက်ရှိသောကြောင့် ပို့ကုန်တင်ပို့မှုတွင် စဉ်ဆက်မပြတ် ဖွံ့ဖြိုးတိုးတက်မှုနှင့် စီးပွားရေးတည်ငြိမ်မှုအတွက် အလားအလာကောင်းများ ဖြစ်စေပါသည်။ မဟာ ဗျူဟာမြောက်အစီအမံများနှင့် ဆက်လက်ပံ့ပိုးမှုများကြောင့် ဇင်ဘာဘွေနိုင်ငံသည် ဇမ်ဘီယာနိုင်ငံတွင် ၎င်း၏ ပို့ကုန်ဈေးကွက်ကို ပိုမိုခိုင်မာအားကောင်းလာစေရန်၊ စီးပွားရေးဖွံ့ဖြိုးတိုးတက်မှုကို မြှင့်တင် ရန်နှင့် ဒေသတွင်းပေါင်းစည်းမှုများကို မြှင့်တင်ရန် အသင့်ရှိကြောင်း Kajengo က ပြောကြားခဲ့ ပါသည်။

တစ်ချိန်တည်းမှာပင် အဆိုပါ Zambia Agriculture and Commercial ပြပွဲသည် ဇင်ဘာဘွေကုမ္ပဏီများအတွက် ၎င်းတို့၏ ထုတ်ကုန်များကို ခင်းကျင်းပြသရန်၊ တန်ဖိုးမဖြတ်နိုင်သော စီးပွားရေးချိတ်ဆက်မှုများကို ထူထောင်ရန်နှင့် ဇမ်ဘီယာဈေးကွက်တွင် ၎င်းတို့၏ တည်ရှိမှုများကို ပိုမိုခိုင်မာစေရန် ပလက်ဖောင်းတစ်ခု ပံ့ပိုးပေးခဲ့ပါကြောင်း (၇. ၈. ၂၀၂၄)ရက်နေ့တွင် ထုတ်ပြန် ခဲ့သော https://www.newsday.co.zw ၏ သတင်း အချက်အလက်များအရ သိရှိရပါသည်။

Source     https://www.newsday.co.zw/agriculture/article/200030606/zimbabwes-agricultural-exports-flourish-in-zambia 

တင်ပြသူ         ဒေါ်နွေးနွေးအောင်၊ စိုက်ပျိုးရေးဦးစီးဌာန

ရက်စွဲ         ၂၀၂၄ ခုနှစ်၊ ဩဂုတ်လ (၁၄) ရက်

တည်းဖြတ်သူ ဦးသောင်းထိန်၊လက်ထောက်ညွှန်ကြားရေးမှူး၊စိုက်ပျိုးရေးဦးစီးဌာန