အကြီးစားထုတ်လုပ်မှုများနှင့် ပူးပေါင်းထုတ်လုပ်မှုပုံစံများ လုပ်ဆောင်ရန်အပြင် လုပ်ငန်း ချိတ်ဆက်မှုများ ဖွံ့ဖြိုးတိုးတက်စေရန်အတွက် စိတ်ပါဝင်စားသော ပင်မှည့်သီး တင်သွင်းရောင်းချ သူများ အနေဖြင့် သြဂုတ်လ (၁၀)ရက်နေ့ နောက်ဆုံးထားပြီး ၎င်းတို့နှင့် ချိတ်ဆက်ဆောင်ရွက် သွားရန် မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချ သူများအသင်း (MFVP) မှ အသိပေး ပြောကြားခဲ့ပါသည်။

တရုတ်-မြန်မာ နှစ်နိုင်ငံ ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ အခြေအနေများ ရှင်းလင်း ဆွေးနွေးပွဲ၌ သစ်သီးနှင့် ဟင်းသီးဟင်းရွက် ကုန်သွယ်မှုနှင့် ပူးပေါင်းဆောင်ရွက်ရေးဆိုင်ရာ ကိစ္စရပ်များကဏ္ဍတွင် မြန်မာနိုင်ငံ သစ်သီးဝလံ၊ ပန်းမန် နှင့် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချသူများအသင်း (MFVP)အနေဖြင့် ပင်မှည့်သီးစိုက်ပျိုးထုတ်လုပ်သည့် အခြေအနေ များကို အကျယ်တဝင့် ဆွေးနွေးပြောကြားခဲ့ပါသည်။

တဆက်တည်းအားဖြင့် တွဲဖက်စိုက်ပျိုးထုတ်လုပ်မှုများ ဆောင်ရွက်နိုင်ရန်အတွက်  မြန်မာ နိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချသူများအသင်း (MFVP)အနေဖြင့် ပင်မှည့်သီးရောင်းချသူများ၊ ကုမ္ပဏီများ နှင့် အသင်းအဖွဲ့များအား (အထူးသဖြင့် ရှမ်းပြည်နယ် မြောက်ပိုင်း၊ တောင်ပိုင်းနှင့် အရှေ့ပိုင်း) ဩဂုတ်လ(၁၀)ရက်နေ့ နောက်ဆုံး ထားပြီး mffvpea.office@gmail.com သို့ အီးမေးလ်ပို့၍သော်လည်းကောင်း၊ (၀၉-၄၃၁၂၇၆၅၆) သို့ ဖုန်းဆက်ခြင်းဖြင့်သော်လည်းကောင်း ချိတ်ဆက်ဆောင်ရွက်နိုင်ကြောင်း အသိပေး ပြောကြားခဲ့ ပါသည်။

မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချ သူများအသင်း (MFVP)ကို ၂၀၀၆ ခုနှစ်၊ ဩဂုတ်လ (၁၁)ရက်နေ့တွင် စတင်ဖွဲ့စည်းခဲ့ပြီး စတင် ဖွဲ့စည်းခဲ့သည်မှ (၁၈)နှစ်တာကာလအတွင်း အသင်းအနေဖြင့် စိုက်ပျိုးသူများ၊ ထုတ်လုပ်ရောင်းချ သူများ၊ ကုန်သည်များ၊ ပို့ကုန်လုပ်ငန်းရှင်များ နှင့် ကျွမ်းကျင်သူများအပါအဝင် ထောက်ပံ့ရေး ကွင်းဆက်တလျောက် ပါဝင်သူများအားလုံး အဆင်ပြေချောမွေ့စေရေးကိုသာ ရှေးရှု ဆောင်ရွက် ခဲ့ကြောင်း၊ ထို့အပြင် MFVP သည် တန်ဖိုးမြှင့်ထုတ်ကုန်များ ဖွံ့ဖြိုးတိုးတက်ရန်၊ ထုတ်လုပ်သူများ အနေဖြင့် နည်းပညာများ လက်ခံကျင့်သုံးဆောင်ရွက်ပြီး ဈေးကွက်ဝင်ထုတ်ကုန်များ ဖြစ်လာစေရန် အတွက် အစားအသောက်ဆိုင်ရာ ဘေးအန္တရာယ်ကင်းရှင်းရေး ထောက်ခံချက်လက်မှတ်များ ပေးအပ်ရေး ချိတ်ဆက်ဆောင်ရွက်ပေးလျက်ရှိကြောင်း၊ ဥယျာဉ်ခြံသီးနှံကဏ္ဍကို တွန်းအားပေး ဆောင်ရွက်ပေးခြင်းဖြင့် စီးပွားရေးချိတ်ဆက်မှုများ ဖန်တီးပေးလျက်ရှိကြောင်း၊ ဥယျာဉ်ခြံသီးနှံ များအား (သရက်သီး၊ ကျွဲကော၊ ထောပတ်သီး၊ ဖရဲသီး၊ မှို၊ လက်ဖက်ခြောက်)  ပြပွဲပြိုင်ပွဲများ ကျင်းပပေးခြင်းဖြင့် ပိုမိုတိုးတက် ကောင်းမွန်သည့် အနာဂတ်အတွက် ကြိုးပမ်းလျက်ရှိကြောင်းကို (၉. ၈. ၂၀၂၄)နေ့တွင် ထုတ်ပြန်သည့် Global New Light of Myanmar သတင်းအရ သိရှိရပါသည်။

Source         https://www.gnlm.com.mm/passion-fruit-suppliers-urged-to-contact-mfvp-for-joint-production/

တင်ပြသူ         ဒေါ်နှင်းရီဝင်း၊ စိုက်ပျိုးရေးဦးစီးဌာန

ရက်စွဲ         ၂၀၂၄ ခုနှစ်၊ ဩဂုတ်လ (၁၄) ရက်

တည်းဖြတ်သူ ဦးသောင်းထိန်၊ လက်ထောက်ညွှန်ကြားရေးမှူး၊ စိုက်ပျိုးရေးဦးစီးဌာန