နီပေါမှ သန့်ရှင်းသော လယ်ယာထွက်ကုန်များကို တရုတ်နိုင်ငံ Xizang ကိုယ်ပိုင်အုပ်ချုပ်ခွင့်ရဒေသသို့ တင်ပို့ခြင်းသည် ကျေးလက်တောင်သူ ထောင်ပေါင်းများစွာကိုအကျိုး ဖြစ်ထွန်းစေမည်ဟု မျှော်လင့်ထားကြောင်း နီပေါအရာရှိတစ်ဦးက မကြာသေးမီကပြုလုပ်သည့် ဖိုရမ်တွင် ပြောကြားခဲ့ပါသည်။နီပေါနိုင်ငံ အမျိုးသားလွှတ်တော် ဥက္ကဋ္ဌဟောင်း Ganesh Prasad Timilsina သည်Xizang ဒေသ Nyingchi ၌ကျင်းပသော (၄)ကြိမ်မြောက် China Xizang Trans-Himalaya နိုင်ငံတကာ ပူးပေါင်း ဆောင်ရွက်ရေးဖိုရမ်၌ ဧည့်သည်အဖြစ် မိန့်ခွန်းပြောခဲ့ပါသည်။နီပေါ၏ အမြင့်ပိုင်းဒေသများမှ Xizang ‌ဒေသသို့ လယ်ယာထွက်ကုန်များ၏တင်ပို့မှု အလားအလာအပေါ် ၎င်း၏မျှော်လင့်ချက်များကို စားပွဲဝိုင်းအစည်းအဝေးတွင်မျှဝေခဲ့ပါသည်။နီပေါနိုင်ငံ၏ ကုန်းမြေဧရိယာ(၇၇%)သည် တောင်ကုန်းများ၊ ဆီးနှင်းများဖုံးလွှမ်းနေသည့် တောင်များဖြင့် ဖုံးလွှမ်းနေပြီး ယင်းဒေသသည် တစ်နှစ်ပတ်လုံး စိုက်ပျိုးထုတ်လုပ်မှုအတွက် ထူးခြားသော အလားအလာများရှိကြောင်း Timilsina မှပြောကြားခဲ့ပါသည်။အဆိုပါဒေသများသည် ဒေသခံလူထုတို့အတွက် စားနပ်ရိက္ခာနှင့် ဝင်ငွေကိုထောက်ပံ့ပေးရုံ သာမက ယဉ်ကျေးမှုအမွေအနှစ်ဆိုင်ရာ ဗဟုသုတများစွာကိုလည်းထိန်းသိမ်းထားကာ ဌာနေ မွေးမြူရေးနှင့် ကောက်ပဲသီးနှံများစိုက်ပျိုးရေးကိုလည်းထိန်းသိမ်းစောင့်ရှောက်ပေးလျက်ရှိပါသည်။ အဆိုပါဒေသများတွင် စိုက်ပျိုးရေးနှင့်တိရစ္ဆာန်မွေးမြူရေးလုပ်ငန်းသည် ဒေသခံလူထုအတွက် တည်ငြိမ်သည့် အသက်မွေးဝမ်းကြောင်းကိုလည်း ပံ့ပိုးပေးလျက်ရှိကြောင်း Timilsina က ပြောကြားခဲ့ပါသည်။တိဗက်နွား၊ သိုး၊ ဆိတ်ကဲ့သို့သော တိရစ္ဆာန်များအပြင် ဆေးဖက်ဝင်အပင်များသည်နှင်းဖုံး လွှမ်းသော တောင်ပေါ်ဒေသများတွင် နေထိုင်ကြသူများ၏အဓိက၀င်ငွေအရင်းမြစ်များဖြစ်ကြောင်း၊ နွား၊ ကျွဲ၊ ဆိတ်၊ ကြက် နှင့် ငါးတို့သည်လည်းအဓိကဝင်ငွ လမ်းကြောင်းများဖြစ်ကြောင်း ၎င်းက ဆက်လက်ပြောကြားခဲ့ပါသည်။ဟင်းသီးဟင်းရွက်များ၊ ပိုးသတ်ဆေးမသုံးသည့်အော်ဂဲနစ်သစ်သီးဝလံများ၊ ငါး၊အသားနှင့်နို့ထွက်ပစ္စည်းများ ထုတ်လုပ်မှုသည် Gandaki ပြည်နယ်နှင့် အခြားဒေသများတွင် အဆမတန် တိုးပွားလာမည်ဟု ယုံကြည်လျက်ရှိကြောင်း ၎င်းကဆက်လက်ပြောပါသည်။နီပေါနိုင်ငံ၏ တောင်ကုန်းနှင့် နှင်းဖုံးနေသော တောင်တန်းဒေသများရှိရေအရင်းအမြစ် များကို အသုံးချခြင်းဖြင့် လယ်ယာထွက်ကုန်၊ သစ်သီး၊ ငါး၊ အသားနှင့်နို့ထွက်ပစ္စည်းများကို ထောက်ပံ့ပေးနိုင်သည့်အတွက် Xizang ကုန်းပြင်မြင့်နှင့် အခြားသောမိုးနည်းရေရှားဒေသများမှ ပြည်သူများအတွက် ဂုဏ်ယူဝမ်းမြောက်မိသည်ဟု ၎င်းကပြောကြားခဲ့ကြောင်း (၃၁.၇.၂၀၂၄) ရက်နေ့ တွင် ထုတ်ဝေခဲ့သော   Ecns.cn ကွန်ရက်ဆောင်းပါးအရသိရှိရပါသည်။

Source http://www.ecns.cn/business/2024-07-31/detail-iheeumea4568617.shtml

တင်ပြသူ         ဒေါ်မြတ်ဖူးငုံဦး၊ စိုက်ပျိုးရေးဦးစီးဌာန

ရက်စွဲ             ၂၀၂၄ ခုနှစ်၊ ဩဂုတ်လ (၇) ရက်

တည်းဖြတ်သူ  ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန