အစိုးရမှ အကောင်အထည်ဖော်ဆောင်ရွက်သော ရေပေးဝေမှုနည်းပညာများနှင့် ခေတ်မီ လယ်ယာ စိုက်ပျိုးရေးအလေ့အကျင့်များကြောင့် ဂျော်ဒန်၏နှစ်စဉ်စိုက်ပျိုးရေးပို့ကုန် (ဇန်နဝါရီလမှ မေလကုန်အထိ)သည် (၂၅.၃%)တိုးတက်လာခဲ့ပါသည်။ယင်းတိုးတက်မှုသည် ပြည်ပကုန်သွယ်မှုမှ နိုင်ငံတော်၏ စိုက်ပျိုးရေးဆိုင်ရာဝင်ငွေကို ဂျော်ဒန် ငွေကြေး ဒိုင်နာ(၅၀၀)သန်း    (အမေရိကန်ဒေါ်လာ ၇၀၅ သန်း)သို့ တိုးတက်စေခဲ့ပြီးစိုက်ပျိုးရေး နယ်ပယ် ဆက်လက်ချဲ့ထွင်မှုကို သိမြင်စေခဲ့သည်ဟု Jordan News Agency မှ Petra က ရေးသား ဖော်ပြခဲ့ပါသည်။

ပြည်ထောင်စုစိုက်ပျိုးရေးဝန်ကြီး Khaled Hunaifat က အဆိုပါတိုးတက်မှုသည်သစ်သီးဝလံ နှင့် ဟင်းသီးဟင်းရွက် တင်ပို့မှုကြောင့်ဖြစ်ပြီး (၂၀၂၄)ခုနှစ် ပထမ(၅)လတွင်တန်ချိန် (၁၇၈,၀၀၀) အထိ မြင့်တက်ခဲ့ခြင်းနှင့် နှစ်စဉ်(၃၂%) တိုးမြင့်လာခြင်းတို့ကြောင့်ဖြစ်ကြောင်း ပြောကြားခဲ့ပါသည်။သစ်သီးဝလံနှင့် ဟင်းသီးဟင်းရွက် တင်ပို့မှုတန်ဖိုးသည် ဂျော်ဒန်ငွေဒိုင်နာ(၁၂၅.၅)သန်း အထိ မြင့်တက်ခဲ့ပြီး ယခုနှစ်အစမှ မေလကုန်အထိ တင်ပို့မှုသည်(၂၀၂၃)ခုနှစ် အလားတူကာလနှင့် နှိုင်းယှဉ်ပါက (၂၂.၃%) တိုးမြင့်လာကြောင်း ၎င်းကပြောကြားခဲ့သည်။ဂျော်ဒန်၏ စိုက်ပျိုးရေးကဏ္ဍသည် အရေးကြီးသော စီးပွားရေးမဏ္ဍိုင်တစ်ခုဖြစ်ပြီးစားနပ်ရိက္ခာ၊ အလုပ်အကိုင်နှင့် ပို့ကုန်ဝင်ငွေတို့ကို အထောက်အပံ့ဖြစ်စေသည်။စားသုံးသူဦးရေ (၁၁)သန်း ကျော်သည့် စျေးကွက်ရှိသော်လည်း ဆန်၊ အေးခဲကြက်သားနှင့်ပန်းသီးများ အပါအဝင် နိုင်ငံအတွက် စားနပ်ရိက္ခာ (၉၈%)နီးပါးကို တင်သွင်းနေရကြောင်းအမေရိကန် အပြည်ပြည်ဆိုင်ရာ ကုန်သွယ်မှု စီမံခန့်ခွဲရေးအဖွဲ့၏ ပြောကြားချက်အရသိရှိရပါသည်။

သို့သော်လည်း ပိုမိုကောင်းမွန်သော ရေပေးဝေမှုစနစ်နှင့် ခေတ်မီစိုက်ပျိုးရေးအလေ့အကျင့် များအပါအဝင် ရည်မှန်းထားသော အစိုးရ၏ ပဏာမခြေလှမ်းများသည်ကုန်ထုတ်စွမ်းအားကို အား ကောင်းစေကြောင်း၊ ယင်းဆောင်ရွက်ချက်များကြောင့်ဟင်းသီးဟင်းရွက် တင်ပို့မှုအခြေအနေသည် ယခင်နှစ် မေလအထိ ကာလတူနှင့်နှိုင်းယှဉ်ပါကတန်ဖိုးအားဖြင့် (၁၉%)တိုးမြင့်လာခဲ့ပြီး ပမာဏ အားဖြင့် တန်ချိန်(၁၃၀,၀၀၀)အထိ(၂၇%)မြင့်တက်လာခဲ့ကြောင်း၊ အလားတူပင် သစ်သီးဝလံတင်ပို့မှု အခြေအနေသည်လည်းယခင်နှစ် အလားတူကာလနှင့် နှိုင်းယှဉ်ပါက တန်ဖိုးအားဖြင့် (၂၉.၅%)တိုးမြင့်လာခဲ့ပြီး ပမာဏအားဖြင့် တန်ချိန်(၄၈,၀၀၀)အထိ (၄၈%)မြင့်တက်လာခဲ့ကြောင်းသိရှိရပါသည်။

အစိုးရအနေဖြင့် စိုက်ပျိုးရေးဆိုင်ရာ သုတေသနကဏ္ဍနှင့်ဖွံ့ဖြိုးတိုးတက်ရေးကဏ္ဍအတွက် သီးနှံအထွက်နှုန်း တိုးတက်မြင့်မားရေး နှင့်ပိုးမွှားရောဂါဒဏ်ခံနိုင်ရည်ရှိစေရေးတို့ကို ကျယ်ကျယ် ပြန့်ပြန့်အထောက်အပံ့ပေးလျက်ရှိကြောင်း၊ ပို့ကုန်ထောက်ပံ့ပို့ဆောင်ရေးနှင့် နိုင်ငံတကာ ဈေးကွက်များနှင့်အတူ ပူးပေါင်းဆောင်ရွက်မှုများအတွက် ထောက်ပံ့ငွေများသည် ပို့ကုန်ပမာဏကိုထိန်းကျောင်း ဆောင်ရွက်ရာတွင် အရေးပါသော အခန်းကဏ္ဍမှ ပါဝင်ကြောင်းကို (၆. ၈.၂၀၂၄) ရက်နေ့တွင် ထုတ်ပြန်သည့် www.arabnews.com သတင်းအရ သိရှိရပါသည်။

Source     https://www.arabnews.com/node/2558666/business-economy

တင်ပြသူ         ဒေါ်နှင်းရီဝင်း၊ စိုက်ပျိုးရေးဦးစီးဌာန

ရက်စွဲ             ၂၀၂၄ ခုနှစ်၊ ဩဂုတ်လ (၇) ရက်

တည်းဖြတ်သူ   ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန