အစိုးရအနေဖြင့် ဖြစ်ပေါ်နေသည့် ကုန်သွယ်မှုနှင့် ထုတ်လုပ်မှုဆိုင်ရာပြဿနာများကို ဖြေရှင်းပြီး ငှက်ပျောသီးကဲ့သို့ တန်ဖိုးမြင့်သီးနှံများ (HVC)ကိုအရှိန်အဟုန်တိုးမြှင့်တင်ပို့ခြင်းဖြင့် ၎င်းတို့၏ ဘဏ္ဍာရေးဆိုင်ရာပံ့ပိုးမှုများကိုတိုးတက်လာစေမည်ဖြစ်ကြောင်း အထက်လွှတ်တော် စီးပွားရေး စီမံကိန်းရုံး (SEPO)၏အချက်အလက်များအရ သိရှိရပါသည်။တာရှည်ခံရန် စီမံထားသော နာနတ်သီးများ၊ ငှက်ပျောသီး နှင့် ငှက်ပျောခြောက်များ၊ဂဏန်းနှင့် ဂဏန်းခြောက်များ စသည်တို့သည် ကမ္ဘာ့ဈေးကွက်တွင် နောက်ကျကျန်ရစ်နေသောကြောင့် ပို့ကုန် ပမာဏ ကျဆင်းနေပြီး စျေးကွက်ဝေစုများ ကျဆင်းလာကြောင်းအထက်လွှတ်တော် စီးပွားရေး စီမံကိန်းရုံး (SEPO)မှ မှတ်ချက်ပြုပြောကြားခဲ့ပါသည်။

တစ်ချိန်တည်းတွင် နာနတ်သီးဖျော်ရည်နှင့် တာရှည်ခံရန် စီမံထားသောတူနာများသည် တင်ပို့မှုပမာဏ တိုးလာသော်လည်း စျေးကွက်ဝေစု ကျဆင်းနေခြင်းကြောင့်မအောင်မြင်သူများ အဖြစ် သတ်မှတ်ခံရကြောင်း၊ အုန်းသီးမှုန့်များ နှင့် ဆေးလိပ်များသည်တင်ပို့မှုပမာဏ ကျဆင်း လျက်ရှိသော်လည်း ဈေးကွက်ဝေစုမှာ ကျယ်ပြန့်လာသောကြောင့်အောင်မြင်သူများဖြစ်ကြောင်း၊ အုန်းဆီ၊ နာနတ်သီး၊ နာနတ်ခြောက် နှင့်အနီရောင်ရေညှိဖတ်တို့သည် ၎င်းတို့၏ တင်ပို့ရောင်းချ မှုနှင့် စျေးကွက်ဝေစုကျယ်ပြန့်လာခြင်းတို့ကြောင့် ထိပ်တန်းလယ်ယာထွက်ကုန်များ ဖြစ်ကြောင်းကိုအထက်လွှတ်တော် စီးပွားရေး စီမံကိန်းရုံး (SEPO)၏ အစီရင်ခံစာအရ သိရှိရပါသည်။ငှက်ပျောသီး နှင့် နာနတ်သီးကုန်သွယ်ရာ၌ ပိုးမွှားရောဂါများ၊ အကောက်ခွန်ဆိုင်ရာအတားအဆီးများနှင့် တိုင်ဖွန်းကြောင့် ပျက်စီးဆုံးရှုံးမှုများ အပါအဝင်ရောင်းဝယ်ရေးဆိုင်ရာ “အခြေခံ” ပြဿနာများကို တာဝန်ယူဖြေရှင်းရန် အစိုးရအား အထက်လွှတ်တော် စီးပွားရေး စီမံကိန်းရုံး (SEPO)မှ တိုက်တွန်းထားကြောင်း၊သင့်လျော်သောပံ့ပိုးကူညီမှုများပေးနိုင်ရေး စဉ်းစား ဆုံးဖြတ်နိုင်ရန် အစိုးရအနေဖြင့်အောင်မြင်မှု မရှိသည့်လုပ်ငန်းများနှင့် နောက်ကျကျန်ရစ်လျက် ရှိသောလုပ်ငန်းများကို ခွဲခြမ်းစိတ်ဖြာ သုံးသပ်ရမည်ဖြစ်ကြောင်း အထက်လွှတ်တော်အဖွဲ့အစည်းကပြောကြားခဲ့ပါသည်။

အစိုးရအနေဖြင့် ၎င်းတို့၏ကဏ္ဍတိုးချဲ့မှုကို အထောက်အကူဖြစ်စေရန်အတွက် HVC ကဲ့သို့သော နှိုင်းယှဉ်အားသာချက် (RCA)မြင့်မားသည့် စိုက်ပျိုးရေးသုံးကုန်ပစ္စည်းများအတွက် ၎င်း၏ရံပုံငွေ ခွဲဝေမှုကို တိုးမြှင့်သင့်ကြောင်း၊ ဤခွဲဝေမှုသည် ကုန်သွယ်မှုလိုငွေပြမှုကို လျှော့ချရန်အတွက် ယှဉ်ပြိုင်နိုင်စွမ်းနှင့် ကုန်ထုတ်စွမ်းအားကို မြှင့်တင်ပေးနိုင်မည်ဖြစ်ကြောင်း၎င်းက ထပ်လောင်း ပြောကြားခဲ့သည်။အစိုးရအနေဖြင့် တောင်သူလယ်သမားများ၏ ထုတ်လုပ်မှုကုန်ကျစရိတ်ကိုလျှော့ချရန်နှင့် ၎င်းတို့၏ ထုတ်ကုန်အရည်အသွေးကို မြှင့်တင်ရန် ရည်ရွယ်သည့် ဥပဒေများကို ပြဋ္ဌာန်းသင့်ကြောင်း အထက် လွှတ်တော် စီးပွားရေး စီမံကိန်းရုံး (SEPO)၏ပြောကြားချက်အရ သိရှိရပါသည်။

စိုက်ပျိုးရေးဌာနတွင် တန်ဖိုးမြင့်သီးနှံ(HVC)ကို တာဝန်ယူကြီးကြပ်သူ Natividad-Caballero က ၎င်းတို့သည် တန်ဖိုးမြင့်သီးနှံ(HVC)များအတွက် ပိုမိုမြင့်မားသောရန်ပုံငွေရရှိရန် စီစဉ်နေကြောင်း၊ ဒေသတွင်းစားသုံးမှုနှင့် အလေအလွင့်များကိုလျှော့ချနိုင်ရေးအတွက် ထုတ်ကုန် တန်ဖိုး ထပ်လောင်း မြှင့်တင်ရန်အတွက် စီးပွားဖြစ်စိုက်ပျိုးထုတ်လုပ်ရန် အရည်အသွေး စံချိန်မီသည့် စိုက်ပျိုးပစ္စည်းများ ထုတ်လုပ်ခြင်းအတွက် ရံပုံငွေပိုမိုရရှိရန် လိုအပ်ကြောင်း The STAR သို့ပြောကြားခဲ့ပါသည်။.အစိုးရ-ပုဂ္ဂလိက ပူးပေါင်းဆောင်ရွက်မှုကို အားကောင်းလာစေရေးအပြင် ရေရှည်တည်တံ့ ခိုင်မြဲရေးနှင့် ကုန်ထုတ်စွမ်းအားတိုးမြင့်ရေးအတွက် မဟာဗျူဟာမြောက်စက်မှုလုပ်ငန်းဦးတည်ချက် တစ်ရပ်ကိုအကောင်အထည်ဖော်ဆောင်ရန်အတွက် လုပ်ငန်းရှင်များနှင့်လည်း ညှိနှိုင်းဆောင်ရွက်သွားမည်ဖြစ်ကြောင်း စိုက်ပျိုးရေး အရာရှိဖြစ်သူတစ်ဦးက ပြောကြားခဲ့ပါသည်။လက်တလောတွင် စိုက်ပျိုးရေးဌာနအနေဖြင့် ကုန်စည်(၃၀)ခန့်၏ကုန်ထုတ်စွမ်းအား မြှင့်တင်ရန် နှင့် အဓိကကုန်စည်တင်ပို့မှုတိုးချဲ့ရန်အတွက် နောင်နှစ်တွင်၎င်း၏ တန်ဖိုးမြင့်သီးနှံ (HVC)အစီအစဉ်အတွက် ရံပုံငွေခွဲဝေမှုကို (၈)ဆတိုးရန်ကြိုးပမ်းလျက်ရှိကြောင်း (၂၃. ၇. ၂၀၂၄) ရက်နေ့တွင် ထုတ်ပြန်သည့် Philstar Globalသတင်းအရ သိရှိရပါသည်။

Source       https://qa.philstar.com/business/2024/07/23/2372118/production-funding-issues-key-higher-agriculture-exports

တင်ပြသူ     ဒေါ်နှင်းရီဝင်း၊ စိုက်ပျိုးရေးဦးစီးဌာန

ရက်စွဲ         ၂၀၂၄ခုနှစ်၊ ဇူလိုင်လ (၃၁) ရက်

စစ်ဆေးသူ   ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန