ကြာသပတေးနေ့တွင် Lok Sabha တွင် ဖော်ပြထားသောသတင်းအချက်အလက်များ အရ အိန္ဒိယနိုင်ငံ၏ အစားအစာပြုပြင်ထုတ်လုပ်ခြင်းလုပ်ငန်းသည် စုစုပေါင်း ပြည်တွင်း အသားတင်ထုတ်လုပ်မှုတန်ဖိုး(GDP)၊ အလုပ်အကိုင်နှင့် နိုင်ငံခြားပို့ကုန်များအတွက် တိုးမြှင့်ပံ့ပိုး ပေးပြီးနိုင်ငံ့စီးပွားရေး၏ အရေးကြီးသော အစိတ်အပိုင်းတစ်ခုအဖြစ် ပေါ်ထွက်လာခဲ့ကြောင်းသိရှိရ ပါသည်။

လယ်ယာစားနပ်ရိက္ခာတင်ပို့မှုတွင် ပြုပြင်ပြီး စားသောက်ကုန်တင်ပို့မှုသည်(၂၀၁၄-၁၅) ခုနှစ်တွင် (၁၃.၇%)ရှိရာမှ (၂၀၂၃-၂၄)ခုနှစ်တွင် (၂၃.၄%)ထိတိုးတက်သွားသည်ဟု ပြည်နယ် အစားအစာ ပြုပြင်ထုတ်လုပ်ရေးဝန်ကြီး Ravneet Singh က မေးခွန်းအား ပြန်လည်ဖြေကြားခဲ့ပါသည်။အစားအစာပြုပြင်ထုတ်လုပ်ရေးဝန်ကြီးဌာန (MoFPI) သည် ယခုနှစ် ဇွန်လ(၃၀)ရက်နေ့ မှစတင်၍ PMSKY အစီအစဉ်အရ အကြီးစားအစားအစာနယ်မြေ (၄၁)ခု၊အအေးခန်းသိုလှောင်ရုံ ကွင်းဆက် လုပ်ငန်းစီမံကိန်း (၃၉၉)ခု၊ စိုက်ပျိုးရေးထွက်ကုန်ပြုပြင်သည့်လုပ်ငန်းများ ဆောင် ရွက်သည့် အစုအဖွဲ့ (၇၆)ခု၊စားသောက်ကုန်ပြုပြင်ထုတ်လုပ်ရေး ယူနစ်(၅၈၈)ခုကို အတည်ပြု ခဲ့သည်။(၂၀၂၂-၂၃)ခုနှစ် ကုန်ဆုံးသည့် နောက်ဆုံး (၈)နှစ်တာကာလအတွင်း အစားအစာပြုပြင်ထုတ်လုပ်ရေးကဏ္ဍ၌ နှစ်စဉ်ပျမ်းမျှတိုးတက်မှုနှုန်း (AAGR)သည်(၅.၃၅%)ဝန်းကျင်ဖြင့် တိုးတက်လာခဲ့သည်။ အစားအစာပြုပြင်ထုတ်လုပ်ရေးကဏ္ဍတွင်စုစုပေါင်းတိုးတက်လာသည့်တန်ဖိုး (GVA)သည် (၂ဝ၁၅ - ၁၆)ခုနှစ်တွင် ကုဋေ(၁.၆၁)သိန်းမှ (၂၀၂၂ - ၂၃)ခုနှစ်တွင် ကုဋေ (၁.၉၂)သိန်း အထိ တိုးလာခဲ့သည်။အစားအစာ ပြုပြင်ထုတ်လုပ်ရေးလုပ်ငန်းများတွင် အလုပ်အကိုင်ရရှိမှုသည်(၂၀၁၄-၁၅) ခုနှစ်တွင် (၁၇.၇၃)သိန်းမှ (၂၀၂၁-၂၂)ခုနှစ်တွင် (၂၀.၆၈)သိန်းအထိတိုးတက်လာကြောင်း စက်မှု လုပ်ငန်းဆိုင်ရာ နှစ်စဉ်စစ်တမ်း (ASI)၏နောက်ဆုံးအစီရင်ခံစာအရ သိရှိရပါသည်။ MOFPI သည် နိုင်ငံတစ်ဝှမ်းရှိ PMSKY ကို အကောင်အထည်ဖော်ရာတွင်လယ်ကွင်း အတွင်းမှ လက်လီရောင်းချသည့်ဆိုင်အထိ ထိရောက်သောထောက်ပံ့ရေးကွင်းဆက် စီမံခန့်ခွဲမှုဖြင့်ခေတ်မီ အခြေခံအဆောက်အအုံများ ဖန်တီးရာတွင် နိုင်ငံတော်မှ ကူညီပေးခြင်း၊အလုပ်အကိုင် အခွင့်အလမ်းများ ဖန်တီးပေးခြင်း၊ လယ်ယာထွက်ကုန်အလေအလွင့်များလျှော့ချခြင်း၊ ထုတ်လုပ်မှု အဆင့်တိုးမြှင့်ခြင်းနှင့် ပြုပြင်ပြီးသည့်စားသောက်ကုန်များတင်ပို့မှုမြှင့်တင်ခြင်းတို့ကြောင့် အစားအစာပြုပြင်ထုတ်လုပ်ရေးလုပ်ငန်းများ၏ အလုံးစုံဖွံ့ဖြိုးတိုးတက်ရေးနှင့်ဖွံ့ဖြိုးတိုးတက်ရေးဆိုင်ရာ လုပ်ငန်းများ ဆောင်ရွက်ခြင်းတို့ဖြစ်ကြောင်းတရားဝင်ထုတ်ပြန်ချက်တွင် ဖော်ပြထားသည်။ဝန်ကြီးဌာနသည် PMSKY ၏ အမျိုးမျိုးသော အစီအစဉ်များအောက်တွင်အကူအညီ ထောက်ပံ့ငွေ (GIA)ပုံစံဖြင့် ငွေကြေးထောက်ပံ့မှုအဖြစ်အစားအစာပြုပြင်ခြင်းလုပ်ငန်းများ/ အစု အဖွဲ့များ/ စီမံကိန်းအသစ်များ သတ်မှတ်ခြင်းနှင့်လက်ရှိလုပ်ကိုင်လျက်ရှိသော လုပ်ငန်းများ တိုးချဲ့ခြင်းတို့ကိုလည်းဆောင်ရွက်ပေးခဲ့ကြောင်း ထုတ်ပြန်ချက်တွင် ဖော်ပြထားသည်ကို (၂၅.၇. ၂၀၂၄)ရက်နေ့ကဖတ်ရှုခဲ့ရသည့် www. cityairnews.com သတင်းကွန်ယက်၏ ဆောင်းပါးမှတဆင့် သိရှိခဲ့ရပါသည်။

Source https://www.cityairnews.com/content/share-of-food-processing-industries-in-agri-exports-jumps-to-234-per-cent

တင်ပြသူ     ဦးဖုန်းမြတ်ဝင်းမောင်မောင်၊ ဒု-လ/ထဦးစီးမှူး၊ စိုက်ပျိုးရေးဦးစီးဌာန

ရက်စွဲ         ၂၀၂၄ ခုနှစ်၊ ဇူလိုင်လ(၃၁)ရက်

စစ်ဆေးသူ ဦးသောင်းထိန်၊ လက်ထောက်ညွှန်ကြားရေးမှူး၊ စိုက်ပျိုးရေးဦးစီးဌာန