"နည်းပညာပေးလုပ်ငန်းများ အရှိန်ရနေသကဲ့သို့ အသိပညာပေး နှင့် သတင်းအချက်အလက် ဖြန့်ဝေရေးလုပ်ငန်းများ အားကောင်းလာစေရေး တိုးမြှင့်ဆောင်ရွက်ရန်လို"

စိုက်ပျိုးရေးလုပ်ငန်းများ ပိုမိုတိုးတက်အောင်မြင်ရေး ကြိုးပမ်းရာတွင် အသိပညာ နည်းပညာ ပြန့်ပွားရေးလုပ်ငန်း နှင့် သတင်းအချက်အလက် မျှဝေခြင်းလုပ်ငန်းများ သည် အရေးပါသော ကဏ္ဍမှ ပါဝင်နေကြောင်း၊ ယင်းလုပ်ငန်းများကို တာဝန်ယူ အကောင်အထည် ဖော်နေကြသည့် စိုက်ပျိုးရေးဦးစီးဌာန ဝန်ထမ်းများအနေဖြင့် မိမိတို့ တစ်ဦးချင်းစီ၏ အရည်အသွေးပြည့်ဝရန် ၊ နိုင်ငံတော်၏ မူဝါဒ နှင့် ဝန်ကြီးဌာန၏ မျှော်မှန်းချက် ပန်းတိုင်များ ကို ထဲထဲဝင်ဝင် သိရှိနားလည်စေရန် နှင့် တည်ဆဲ နိုင်ငံဝန်ထမ်း ဥပဒေ စည်းမျဉ်းစည်းကမ်းများနှင့် အညီဆောင်ရွက်ကြရန်လိုကြောင်း၊ အလားတူ မိမိတို့လုပ်ငန်း သဘာဝနှင့် လိုက်လျော ညီထွေသော နေ့စဉ် နေထိုင်မှုပုံစံသစ်ဖြင့် ကိုဗစ်-၁၉ ကူးစက်မြန်ရောဂါ ကင်းဝေးရေး အလေးထား ဆောင်ရွက်ကြစေလိုကြောင်း အောက်တိုဘာလ ၂၇ ရက်နေ့ နေ့လယ်ပိုင်းက နေပြည်တော် ရုံးအမှတ်(၄၃)ရှိ စိုက်ပျိုးရေးဦးစီးဌာန ရုံးချုပ်မှ တာဝန်ရှိသူများ နှင့် တွေ့ဆုံစဉ် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာအောင်ကြီး က ဆွေးနွေးပြောကြားသည်။

တွေ့ဆုံပွဲသို့ စိုက်ပျိုးရေးဦးစီးဌာန ဒုတိယညွှန်ကြားရေးမှူးချုပ်များ ဖြစ်ကြသည့် ဦးလှမြင့်အောင် ၊ ဦးသူရစိုး ၊ ဦးဇော်ထွန်းမြင့် နှင့် ဌာနခွဲများမှ ညွှန်ကြားရေးမှူးများ ဒုတိယညွှန်ကြားရေးမှူးများ တက်ရောက်ကြပြီး ဆောင်ရွက်ဆဲ နှင့် ဆက်လက်ဆောင်ရွက်မည့် လုပ်ငန်းစဉ်များနှင့်ပတ်သက်၍ သက်ဆိုင်ရာလုပ်ငန်းကဏ္ဍများအလိုက် ရှင်းလင်းတင်ပြကြသည်။

တင်ပြချက်များအပေါ် ဒုတိယဝန်ကြီး က ဆွေးနွေးမှာကြားရာ၌ လက်ရှိ ကြုံတွေ့ နေကြရသော ကမ္ဘာ့ကပ်ရောဂါကြောင့် သွင်းအားစုဓါတ်မြေဩဇာဈေးနှုန်း နှင့် ကိုင်တွယ်စရိတ်၊ ကုန်သွယ်မှုစရိတ်များ ကြီးမြင့်လာခြင်း၊ ဈေးကွက် ဈေးနှုန်း မတည်ငြိမ်ခြင်း အပြင် ရာသီဥတု ဖောက်ပြန် ပြောင်းလဲခြင်း စသည့် သက်ရောက်မှုများကြောင့် တောင်သူလယ်သမားများ နှင့် စိုက်ပျိုး ထုတ်လုပ်မှု ကွင်းဆက် တစ်လျှောက်တွင်ပါဝင်သူများအပေါ် ထိခိုက်မှု လျော့ပါး သက်သာရေး အတွက် မိမိတို့အားလုံး ကြိုးပမ်းကြရမည်ဖြစ်ကြောင်း၊ နည်းပညာပေးလုပ်ငန်းများ အရှိန်ရနေသကဲ့သို့ အသိပညာပေး နှင့် သတင်းအချက်အလက် ဖြန့်ဝေရေးလုပ်ငန်းများ အားကောင်းလာစေရေး တိုးမြှင့်ဆောင်ရွက်ရန်လိုကြောင်း၊ တစ်ချိန်တည်းမှာပဲ ဝန်ထမ်းများ၏ ဘေးကင်းလုံခြုံရေး၊ သက်သာချောင်ချိရေးနှင့် စွမ်းဆောင်ရည်မြှင့်တင်ပေးရေး အပါအဝင် ရာထူး နှင့် လုပ်ငန်းတာဝန်များ လူမှန်နေရာမှန်ဖြစ်စေရေး၊ ထူးချွန်မှုအလိုက် ထိုက်တန်စွာ ချီးမြှောက် ရေး တို့ကို စနစ်တကျဆောင်ရွက်ကြရန် လိုကြောင်းဖြင့် လမ်းညွှန်မှာကြားခဲ့ကြောင်း သိရသည်။