နည်းပညာ အချက်အလက်များ အသေးစိတ် စိစစ်ပြီး သည့် ပိုးသတ်ဆေး အမျိုးပေါင်း (၂၄၅)မျိုး အား မှတ်ပုံတင် ခွင့်ပြုပေးနိုင်ရေး ဆွေးနွေး

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာနအနေဖြင့် နိုင်ငံ၏ အဓိကစားသုံးသီးနှံများ နှင့် ပြည်ပပို့ကုန်သီးနှံများကို အထွက်နှုန်းတိုးတက်ရေး၊ အာဟာရပြည့်ဝပြီး စားသုံးသူ ဘေးကင်း လုံခြုံရေး နှင့် ဈေးကွက်စံချိန်စံညွှန်းများအညီ တိုးမြှင့်ထုတ်လုပ်နိုင်ရေး တို့အတွက် ကြိုးပမ်း ဆောင်ရွက်လျက်ရှိရာ အထွက်နှုန်းတိုးတက်စေရေး အထောက်အကူပြု သွင်းအားစုတစ်ခုဖြစ်သည့် ပိုးသတ်ဆေးများသုံးစွဲရာတွင် အရည်အသွေးပြည့်မီပြီး အန္တရာယ်ကင်းသော ပိုးသတ်ဆေးများ ထိရောက်စွာ အသုံးပြုနိုင်ရေးအတွက် ပိုးသတ်ဆေးမှတ်ပုံတင်အဖွဲ့ သို့ သတင်း အချက်အလက်များ ပြုစုတင်ပြခြင်း၊ စိစစ် သုံးသပ် အကြံပြုခြင်းများ ကို ပိုးသတ်ဆေးနည်းပညာကော်မတီဝင် က ဆောင်ရွက်လျက် ရှိသကဲ့သို့ ပိုးသတ်ဆေး မှတ်ပုံတင်ခြင်းဆိုင်ရာ လုပ်ထုံးလုပ်နည်း လုပ်ငန်း စဉ်များ ကိုလည်း ခေတ်စနစ်နှင့်အညီ ပိုမိုကောင်းမွန်စွာ ပြောင်းလဲကျင့်သုံးနိုင်ရေး ကြိုးပမ်း ဆောင်ရွက်လျက်ရှိကြောင်း အောက်တိုဘာလ (၁၅)ရက်နေ့က အွန်လိုင်းစနစ် ဖြင့် ကျင်းပ ပြုလုပ်သည့် ပိုးသတ်ဆေးနည်းပညာ ကော်မတီ ၏ (၃၄)ကြိမ်မြောက် အစည်းအဝေး တွင် ကော်မတီဥက္ကဌ ညွှန်ကြားရေးမှူးချုပ် ဒေါက်တာရဲတင့်ထွန်း က ပြောကြားသည်။

ပိုးသတ်ဆေး နည်းပညာကော်မတီ ၏ သတင်း အချက်အလက်များ ပြုစုတင်ပြခြင်း၊ စိစစ် သုံးသပ် အကြံပြုခြင်းများအပေါ် အခြေခံ၍ ပိုးသတ်ဆေးမှတ်ပုံတင်အဖွဲ့အစည်းအဝေးများ က ပိုးသတ်ဆေးမှတ်ပုံတင်ခွင့်ပြုပေးရေး ဆွေးနွေးဆောင်ရွက်ခဲ့ရာ ယနေ့အထိ ပိုးသတ်ဆေး (၃၈၈၉) မျိုး ကို မှတ်ပုံတင်ခွင့်ပြုခဲ့ပြီးဖြစ်ကြောင်း၊ ယနေ့ကျင်းပ ပြုလုပ်သည့် ပိုးသတ်ဆေး နည်းပညာ ကော်မတီ ၏ (၃၄)ကြိမ်မြောက် အစည်းအဝေး တွင် နည်းပညာ အချက်အလက်များ အသေးစိတ် စိစစ်ပြီး သည့် ပိုးသတ်ဆေး အမျိုးပေါင်း (၂၄၅)မျိုး အား မှတ်ပုံတင် ခွင့်ပြုပေးနိုင်ရေး ဆွေးနွေး ဆောင်ရွက်ခဲ့ကြကြောင်း၊ ပိုးသတ်ဆေးမှတ်ပုံတင်ခြင်း နှင့် လုပ်ငန်းလိုင်စင် လျှောက်ထားခြင်း များကို  အွန်လိုင်းစနစ်ဖြင့် ဆောင်ရွက်ပေးလျက်ရှိကြောင်း သတင်းရရှိသည်။