နေပြည်တော်၊ စက်တင်ဘာ(၈)ရက်

          မြန်မာနိုင်ငံ၏ စနစ်ကျသော အပင်ကျန်းမာသန်စွမ်းရေး မဟာဗျူဟာသည် စိုက်ပျိုးရေးဆိုင်ရာ အဖွဲ့အစည်းများ၏ အစီအစဉ် စွမ်းဆောင်ရည်ကိုပြည်တွင်း၌ ရေရှည် တည်တံ့ခိုင်မြဲသော အပင်ကျန်းမာရေးနည်းစနစ်များဖြင့် ထူထောင်၍ ကျန်းမာရေးအရ လုံခြုံစိတ်ချသော အစာများနှင့် စိုက်ပျိုးရေးဆိုင်ရာ အသက်မွေးဝမ်းကျောင်းအုပ်စုအဖြစ် တိုးတက်ဖြန့်ဝေရန် အားပေးလျက်ရှိသည်။အပင်ကျန်းမာရေးဆိုင်ရာ စီမံကိန်း အစီအစဉ် ကို ၂၀၁၄ ခုနှစ်မှ စတင်၍ ၂၀၂၀ ခုနှစ်အထိ ဆောင်ရွက်သွားမည်ဖြစ်ပြီး၊ ၂၀၁၆ ခုနှစ် ဧပြီလတွင် မူကြမ်းရေးဆွဲခဲ့သော မြန်မာနိုင်ငံ၏ စနစ်ကျသော အပင်ကျန်းမာသန်စွမ်းရေး မဟာဗျူဟာကို စက်တင်ဘာ ၈ ရက်နေ့တွင် အတည်ပြုရေးဆွဲပြီး စိုက်ပျိုးထုတ်လုပ်မှု တိုးတက်စေခြင်း၊ တောင်သူများ ဝင်ငွေတိုးတက်စေခြင်း၊ နိုင်ငံတကာယှဉ်ပြိုင်မှုများ ဖြင့် မြန်မာနိုင်ငံ စိုက်ပျိုးရေးဆိုင်ရာ ကဏ္ဍ တိုးတက်လာစေမည်ဖြစ်သည်။

          ယနေ့နံနက် ၉ နာရီအချိန်တွင် နေပြည်တော်ဟိုတယ်ဇုံရှိ အမရာဟိုတယ်၌ ကျင်းပ ပြုလုပ်သည့် မြန်မာနိုင်ငံ၏ စနစ်ကျသော အပင်ကျန်းမာသန်စွမ်းရေး မဟာဗျူဟာ ဆိုင်ရာ အစည်းအဝေးသို့ စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာထွန်းဝင်း တက်ရောက်၍ လက်ရှိကာလတွင် တောင်သူများ ရင်ဆိုင်နေရ သည့် အခက်အခဲပြဿနာများကို စိုက်ပျိုးနည်းပညာပေးပညာရှင်များနှင့် ဝန်ထမ်းများ ဖြင့် အပင်ကျန်းမာရေးဆိုင်ရာ ဆေးခန်းများဖွင့်လှစ်ပြီး စိုက်ပျိုးရေးကဏ္ဍဆိုင်ရာ အခက် အခဲများအား စီမံဖြေရှင်း ပေးရန် လိုအပ်ကြောင်း၊စီမံကိန်းနေရာများဖြစ်သည့် ရန်ကုန်၊ နေပြည်တော်၊ ဧရာဝတီ၊ ပဲခူး၊ မန္တလေး၊ စစ်ကိုင်း၊ မွန် နှင့်ရှမ်းပြည်နယ် တို့တွင် အပင်ကျန်းမာရေးဆေးခန်းများဖွင့်လှစ်ပြီး အပင်ရောဂါပိုးမွှားဆိုင်ရာ ဆရာဝန်များဖြင့် စနစ်တကျဆောင်ရွက်ကြခြင်းဖြင့် မြန်မာ့စိုက်ပျိုးရေးကဏ္ဍ ပိုမို တိုးတက်လာစေမည်ဖြစ်ပြီး တောင်သူတို့၏ လူမှုစီးပွား ဘဝများကို မြှင့်တင်ပေးနိုင် မည်ဖြစ်ကြောင်းဖြင့် အဖွင့်အမှာစကားပြောကြားရာတွင် ထည့်သွင်းပြောကြားခဲ့သည်။