၂၀၂၁ ခုနှစ်၊ မိုးလယ်ကာလနှင့် ဇူလိုင်လအတွက် မိုးလေဝသနှင့် ဇလဗေဒခန့်မှန်းချက်

(မြန်မာ့အသံနှင့် ရုပ်မြင်သံကြားသတင်း)

တင်ပြသူ - ဦးထက်ဝေထွန်း

မိုးလေဝသနှင့် ဇလဗေဒညွှန်ကြားမှုဦးစီးဌာန

……………………………………………………………………………....................................

မင်္ဂလာပါခင်ဗျာ -

၂၀၂၁ ခုနှစ်၊ မိုးလယ်ကာလနှင့် ဇူလိုင်လအတွက် မိုးလေဝသနဲ့ ဇလဗေဒခန့်မှန်းချက် များကို မတင်ပြမီ ပြီးခဲ့တဲ့ ဇွန်လအတွင်း မြန်မာနိုင်ငံအရပ်ရပ်မှာ ဖြစ်ပေါ်ခဲ့တဲ့ မိုးလေဝသ အခြေအနေများကို တင်ပြလိုပါတယ်။

ပြီးခဲ့တဲ့ ဇွန်လအတွင်း အနောက်တောင်မုတ်သုံလေ ဝင်ရောက်ခဲ့မှုအခြေအနေမှာ ဇွန်လ (၇)ရက်နေ့မှာ မြန်မာနိုင်ငံတစ်ဝှမ်းလုံးသို့ ဝင်ရောက်ခဲ့ပြီး ဖြစ်ပါတယ်။ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုတ်သုံလေ အားအသင့်အတင့်မှ အားကောင်းခဲ့ပါတယ်။ ဇွန်လ (၁၁)ရက်နေ့မှာဘင်္ဂလားပင်လယ်အော်အနောက်မြောက်ပိုင်းနဲ့ယင်းနဲ့ဆက်စပ်လျက်ရှိတဲ့ အိန္ဒိယ နိုင်ငံ၊ ဩရိဿကမ်းခြေနဲ့ အနောက်ဘင်္ဂလားကမ်းခြေတို့အနီးမှာ  လေဖိအားနည်းရပ်ဝန်းတစ်ခု စတင် ဖြစ်ပေါ်ခဲ့ပြီး၊ အဆိုပါလေဖိအားနည်းရပ်ဝန်းဟာ (၁၄)ရက်နေ့မှာ အိန္ဒိယနိုင်ငံ၊ ဩရိဿ ပြည်နယ်မြောက်ပိုင်းနဲ့ အနောက်ဘင်္ဂလားပြည်နယ် ကမ်းခြေများမှ တစ်ဆင့် ကုန်းတွင်းပိုင်းသို့ ဖြတ်ကျော် ဝင်ရောက်ခဲ့ပါတယ်။

မိုးရွာသွန်းမှု အခြေအနေများမှာ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေး တိုင်းဒေသကြီး၊ ရှမ်းပြည်နယ်(မြောက်ပိုင်းနဲ့တောင်ပိုင်း)တို့မှာ ရွာသွန်းမြဲအောက် လျော့နည်း ခဲ့ပြီး၊ နေပြည်တော်၊ ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ရှမ်းပြည်နယ်(အရှေ့ပိုင်း)၊ ချင်းပြည်နယ်၊ ကယားပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ ရွာသွန်းမြဲခန့်နဲ့ ရန်ကုန်တိုင်းဒေသကြီးနဲ့ ရခိုင်ပြည်နယ်တို့မှာ ရွာသွန်းမြဲ ထက်ပိုကာ မိုးထစ်ချုန်း ရွာသွန်းခဲ့ပါတယ်။ မိုးရွာရက်များ အနေနဲ့ကလည်း စစ်ကိုင်းတိုင်း ဒေသကြီးအောက်ပိုင်းနဲ့မန္တလေးတိုင်းဒေသကြီးတို့မှာ (၆)ရက်မှ(၈)ရက်၊ နေပြည်တော်၊ စစ်ကိုင်း တိုင်းဒေသကြီးအထက်ပိုင်း၊ မကွေးတိုင်းဒေသကြီး၊ ပဲခူးတိုင်းဒေသကြီး(အနောက်ပိုင်း)၊ ရှမ်း ပြည်နယ်(မြောက်ပိုင်းနဲ့ အရှေ့ပိုင်း)၊ ချင်းပြည်နယ်နဲ့ ကယားပြည်နယ်တို့မှာ (၁၂)ရက်မှ (၁၉) ရက်၊ပဲခူးတိုင်းဒေသကြီး(အရှေ့ပိုင်း)၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီ တိုင်းဒေသကြီး၊ ကချင်ပြည်နယ်၊ ရှမ်းပြည်နယ်(တောင်ပိုင်း)၊ ရခိုင်ပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ (၂၀)ရက်မှ (၂၈)ရက် မိုးထစ်ချုန်းရွာသွန်း ခဲ့ပါတယ်။

မိုးရေချိန်စံချိန်သစ်များ အနေနဲ့ကတော့ ဇွန်လ (၅)ရက်နေ့မှာ နေပြည်တော်(ဥတ္တရသီရိ မြို့နယ်)၊ (၈)ရက်နေ့မှာ ရန်ကုန်(ကမ္ဘာအေး)နဲ့ (၁၀)ရက်နေ့မှာ ပေါက်မြို့တို့မှာ မိုးရေချိန် စံချိန်သစ်များ တင်ခဲ့ပါတယ်။

အခုဆက်လက်ပြီး ၂၀၂၁ ခုနှစ်၊ မိုးလယ်ကာလအတွင်း ဖြစ်ပေါ်နိုင်တဲ့ မိုးလေဝသနဲ့ ဇလ ဗေဒခန့်မှန်းချက်များကို တင်ပြလိုပါတယ်။

မိုးလယ်ကာလ သက်မှတ်ချက်အနေနဲ့ကတော့ မိုးလယ်ကာလဟာ ၂၀၂၁ ခုနှစ်၊ ဇူလိုင်လ (၁)ရက်နေ့မှ သြဂုတ်လ (၃၁)ရက်နေ့ (မြန်မာ သက္ကရာဇ် ၁၃၈၃ ခုနှစ်၊ နယုန်လပြည့်ကျော် (၇)ရက်နေ့မှ ဝါခေါင်လပြည့်ကျော် (၉)ရက်နေ့) အထိ ဖြစ်ပါတယ်။

ဘင်္ဂလားပင်လယ်အော်မှာ လေဖိအားနည်းရပ်၀န်း(၄)ကြိမ် ဖြစ်ပေါ်နိုင်ပြီး၊ (၂)ကြိမ်မှာ ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်ပါတယ်။ အနောက်တောင်မုတ်သုံ လေဟာ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ အားအသင့်အတင့်မှ အားကောင်း နိုင်ပါတယ်။ မိုးလယ်ကာလမှာ မုတ်သုံလေအားပြတ်ခြင်း (၁)ကြိမ် ဖြစ်ပေါ်နိုင်ပါတယ်။

မိုးရွာသွန်းမှု အခြေအနေခန့်မှန်းချက်များ အနေနဲ့ကတော့ တနင်္သာရီတိုင်းဒေသကြီးမှာ ရွာသွန်းမြဲအောက် လျော့နည်းနိုင်ပြီး၊ နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်း ဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်း ဒေသကြီး၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ ရွာသွန်းမြဲခန့် မိုးထစ်ချုန်းရွာနိုင်ပါတယ်။

မြစ်ရေအခြေအနေ ခန့်မှန်းချက်အနေနဲ့ကတော့ မိုးလယ်ကာလ ဇူလိုင်လနဲ့ သြဂုတ်တို့မှာ ဧရာဝတီမြစ်ရေဟာ ရွှေကူမြို့၊  ကသာမြို့၊ သပိတ်ကျင်းမြို့၊ မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူမြို့နဲ့ ညောင်ဦးမြို့တို့မှာ (၁)ကြိမ်ခန့်စီနဲ့ ဆိပ်သာမြို့၊ ဟင်္သာတမြို့နဲ့ ဇလွန်မြို့တို့မှာ (၂)ကြိမ်ခန့်စီ၊ ချင်းတွင်းမြစ်ရေဟာ ခန္တီးမြို့၊ မော်လိုက်မြို့၊ ကလေးဝမြို့၊ မင်းကင်းမြို့၊ ကနီမြို့ နဲ့ မုံရွာမြို့တို့မှာ (၁)ကြိမ်ခန့်စီနဲ့ ဟုမ္မလင်းမြို့နဲ့ ဖောင်းပြင်မြို့တို့မှာ (၂)ကြိမ်ခန့်စီ၊ ဒုဋ္ဌဝတီ မြစ်ရေဟာ မြစ်ငယ်မြို့မှာ (၁)ကြိမ်ခန့်၊ စစ်တောင်းမြစ်ရေဟာ တောင်ငူမြို့နဲ့ မဒေါက်မြို့တို့မှာ (၁)ကြိမ်ခန့်စီ၊ ရွှေကျင်မြစ်ရေဟာ ရွှေကျင်မြို့မှာ(၂)ကြိမ်ခန့်၊ ပဲခူးမြစ်ရေဟာ ပဲခူးမြို့မှာ (၁)ကြိမ် ခန့်၊ သံလွင်မြစ်ရေဟာ ဖားဆောင်းမြို့နဲ့ ဘားအံမြို့တို့မှာ (၁)ကြိမ်ခန့်စီ၊ သောင်ရင်းမြစ်ရေဟာ မြဝတီမြို့မှာ (၁)ကြိမ်ခန့်၊ ငဝန်မြစ်ရေဟာ ငါးသိုင်းချောင်းမြို့၊ သာပေါင်းမြို့နဲ့ ပုသိမ်မြို့တို့မှာ (၁)ကြိမ်ခန့်စီ၊ တိုးမြစ်ရေဟာ မအူပင်မြို့မှာ (၁)ကြိမ်ခန့်၊ ကုလားတန်မြစ်ရေဟာ ကျောက်တော် မြို့မှာ (၁)ကြိမ်ခန့်၊ လေးမြို့မြစ်ရေဟာ မြောက်ဦးမြို့မှာ (၁)ကြိမ်ခန့်နဲ့ ဘီးလင်းမြစ်ရေဟာ ဘီးလင်းမြို့မှာ (၁)ကြိမ်ခန့်၊ ယင်းမြို့များရဲ့ စိုးရိမ်ရေမှတ် အသီးသီးအထက်သို့ ကျော်လွန် ရောက်ရှိနိုင်ပါတယ်။

အခုဆက်လက်ပြီး ၂၀၂၁ ခုနှစ်၊ ဇူလိုင်လ လပတ်အတွက် မိုးလေ၀သနှင့် ဇလဗေဒ ခန့်မှန်းချက်များကို တင်ပြပါ့မယ်။

ဘင်္ဂလားပင်လယ်အော်အခြေအနေခန့်မှန်းချက်အနေနဲ့ကတော့ ဘင်္ဂလားပင်လယ်အော် မှာ လေဖိအားနည်းရပ်၀န်း (၁)ကြိမ် ဖြစ်ပေါ်နိုင်ပြီး၊ ပိုမိုအားကောင်းလာကာ မုန်တိုင်းငယ် အဖြစ်သို့ ရောက်ရှိနိုင်ပါတယ်။ အနောက်တောင် မုတ်သုံလေသဟာ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ အားအသင့်အတင့်မှ အားကောင်းနိုင်ပါတယ်။

မိုးရွာသွန်းမှု အခြေအနေများအနေနဲ့ကတော့ မကွေးတိုင်းဒေသကြီးနှင့် တနင်္သာရီတိုင်း ဒေသကြီးတို့မှာ ရွာသွန်းမြဲအောက် လျော့နည်းနိုင်ပြီး၊ နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ် နဲ့ မွန်ပြည်နယ်တို့မှာ ရွာသွန်းမြဲခန့် မိုးထစ်ချုန်း ရွာနိုင်ပါတယ်။ မိုးရွာရက်များအနေနဲ့ကလည်း စစ်ကိုင်းတိုင်းဒေသကြီးအထက်ပိုင်း၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်း ဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ချင်းပြည်နယ်၊ ရခိုင်ပြည်နယ်၊ ကရင် ပြည်နယ်နဲ့ မွန်ပြည်နယ်တို့မှာ (၂၁)ရက်မှ (၂၆)ရက်ခန့်၊ နေပြည်တော်၊ ရှမ်းပြည်နယ်နဲ့ ကယား ပြည်နယ်တို့မှာ (၁၅)ရက်မှ (၂၀)ရက်ခန့်နဲ့ စစ်ကိုင်းတိုင်းဒေသကြီးအောက်ပိုင်း၊ မန္တလေးတိုင်း ဒေသကြီးနဲ့ မကွေးတိုင်းဒေသကြီးတို့မှာ (၉)ရက်မှ (၁၄)ရက်ခန့် မိုးထစ်ချုန်းရွာနိုင်ပါတယ်။

မြစ်ရေခန့်မှန်းချက် အနေနဲ့ကတော့ ၂၀၂၁ ခုနှစ် ဇူလိုင်လအတွင်း ဧရာဝတီမြစ်ရေဟာ ရွှေကူမြို့၊ ကသာမြို့၊ ဆိပ်သာမြို့၊ ဟင်္သာတမြို့နဲ့ ဇလွန်မြို့တို့မှာ (၁)ကြိမ်ခန့်စီ၊ ချင်းတွင်း မြစ်ရေဟာ ခန္တီးမြို့၊ ဟုမ္မလင်းမြို့နဲ့ ဖောင်းပြင်မြို့တို့မှာ (၁)ကြိမ်ခန့်စီ၊ စစ်တောင်းမြစ်ရေဟာ မဒေါက်မြို့မှာ (၁)ကြိမ်ခန့်၊ ရွှေကျင်မြစ်ရေဟာ ရွှေကျင်မြို့မှာ (၁)ကြိမ်ခန့်၊ ပဲခူးမြစ်ရေဟာ ပဲခူးမြို့မှာ (၁)ကြိမ်ခန့်၊ သံလွင်မြစ်ရေဟာ ဘားအံမြို့မှာ (၁)ကြိမ်ခန့်၊ တိုးမြစ်ရေဟာ မအူပင် မြို့မှာ (၁)ကြိမ်ခန့်၊ ကုလားတန်မြစ်ရေဟာ ကျောက်တော်မြို့မှာ (၁)ကြိမ်ခန့်၊ လေးမြို့မြစ်ရေ ဟာ မြောက်ဦးမြို့မှာ (၁)ကြိမ်ခန့်နဲ့ ဘီးလင်းမြစ်ရေဟာ ဘီးလင်းမြို့မှာ (၁)ကြိမ်ခန့်၊ ယင်းမြို့ များရဲ့ စိုးရိမ်ရေမှတ် အသီးသီး အထက်သို့ ကျော်လွန်ရောက်ရှိနိုင်ပါတယ်။

အချုပ်အားဖြင့် တင်ပြလိုတာကတော့ ဇူလိုင်လဟာ မိုးလယ်ကာလရဲ့ ပထမလ ဖြစ်ပါ တယ်။ မိုးလယ်ကာလအတွင်း အထူးသဖြင့် ဘင်္ဂလားပင်လယ်အော်မြောက်ပိုင်းမှာ မုတ်သုံ မုန်တိုင်းများ ဖြစ်ပေါ်လေ့ရှိပါတယ်။ မုတ်သုံလေကတော့ အားအသင့်အတင့်မှ အားကောင်းလာ နိုင်ပါတယ်။ မုတ်သုံလေ အားကောင်းလာတာနဲ့အမျှ မိုးများပိုမို ရွာသွန်းတတ်ခြင်း၊ မိုးသက် လေပြင်းများ ကျရောက်တတ်ခြင်းတို့ကြောင့် မြန်မာ့ပင်လယ်ပြင်မှာ အဝေးမြင်တာ လျော့နည်း မှုနဲ့ လှိုင်းကြီးမှုများ ကြုံတွေ့နိုင်ပါတယ်။ မိုးသည်းထန်စွာ ရွာသွန်းမှုကြောင့် တောင်ကုန်း၊ တောင်တန်းဒေသများမှာ လျှပ်တပြတ် ရေကြီးခြင်း၊ မြေပြိုခြင်း ဘေးအန္တရာယ်များကိုလည်း သတိပြုရန် လိုအပ်ပါတယ်။ ဇူလိုင်လအတွင်း မြန်မာနိုင်ငံရှိ မြစ်ကြီးများမှာလည်း စိုးရိမ်ရေမှတ် များသို့ (၁)ကြိမ်ခန့်စီ ကျော်လွန်ရောက်ရှိနိုင်တယ်လို့ ခန့်မှန်း ထားပါတယ်။ 

အဲဒီလို ထူးခြားတဲ့ မိုးလေဝသအခြေအနေများနဲ့ ပတ်သက်၍ ကြိုတင်သတိပေးချက် ထုတ်ပြန်ချက်များကို မြန်မာနိုင်ငံ၊ မိုးလေဝသနဲ့ဇလဗေဒညွှန်ကြားမှုဦးစီးဌာနမှ အချိန်နဲ့ တစ်ပြေးညီထုတ်ပြန် ပေးသွားမှာ ဖြစ်ပါတယ်။

မိုးလေဝသ၊ ဇလဗေဒသတင်းများနဲ့ ပတ်သက်လို့ သိရှိလိုပါက မိုးလေဝသနဲ့ ဇလဗေဒ ညွှန်ကြားမှုဦးစီးဌာနရဲ့ Website ဖြစ်တဲ့ www.moezala.gov.mm သို့လည်းကောင်း၊ မိုးလေဝသ နဲ့ ဇလဗေဒညွှန်ကြားမှုဦးစီးဌာနရဲ့ Facebook သို့လည်းကောင်း၊ နေပြည်တော်မှာ ရှိတဲ့ အလို အလျောက်ဖြေကြားစက်ဖြစ်တဲ့ ၀၆၇-၃၄၁၁၂၅၂ ဖုန်းနံပါတ်သို့လည်းကောင်း၊ Call Center 1876 (ext no.5)သို့လည်းကောင်း၊ မြန်မာ့အသံနှင့်ရုပ်မြင်သံကြား၊ မြဝတီရုပ်မြင်သံကြား၊ နေ့စဉ်ထုတ် သတင်းစာများ၊ တိုင်းဒေသကြီးနဲ့ ပြည်နယ်အသီးသီးတို့မှာ နေ့စဉ်ထုတ်လွှင့်လျက်ရှိတဲ့ FM ရေဒီယိုများမှလည်း မိုးလေဝသနဲ့ ဇလဗေဒသတင်း၊ သတိပေးချက်များကို ကြည့်ရှုနားဆင်နိုင် ပါတယ်ဆိုတဲ့ အကြောင်း တင်ပြရင်း နိဂုံးချုပ်အပ်ပါတယ်။

ကိုယ်စိတ်နှစ်ဖြာ ကျန်းမာ၊ ချမ်းသာကြပါစေခင်ဗျာ။