၂၀၂၁ ခုနှစ်၊ မိုးနှောင်းကာလနဲ့ စက်တင်ဘာလ လပတ်အတွက် 

မိုးလေဝသနှင့် ဇလဗေဒခန့်မှန်းချက် 

(မြန်မာ့အသံနှင့် ရုပ်မြင်သံကြားသတင်း)

တင်ပြသူ -   ဦးထက်ဝေထွန်း - မိုးလေဝသနှင့် ဇလဗေဒညွှန်ကြားမှုဦးစီးဌာန

……………………………………………………………………………..........................................

မင်္ဂလာပါခင်ဗျာ-

ယခုတပတ်တင်ပြမှာကတော့------

၂၀၂၁ ခုနှစ်၊ မိုးနှောင်းကာလနဲ့ စက်တင်ဘာလအတွက် မိုးလေဝသနဲ့ ဇလဗေဒခန့်မှန်းချက်များ ဖြစ်ပါတယ်။ အဲဒီခန့်မှန်းချက်များကို မတင်ပြမီ ပြီးခဲ့တဲ့ သြဂုတ်လအတွင်း မြန်မာနိုင်ငံ အရပ်ရပ်မှာ ဖြစ်ပေါ်ခဲ့တဲ့ မိုးလေဝသနဲ့ ဇလဗေဒအခြေအနေများကို ဦးစွာပထမ တင်ပြလိုပါတယ်။

 ပြီးခဲ့တဲ့ ဘင်္ဂလားပင်လယ်အော် အခြေအနေများမှာ ဩဂုတ်လ (၁၆)ရက်နေ့မှာ ဘင်္ဂလား ပင်လယ်အော်အနောက်အလယ်ပိုင်းနဲ့ ယင်းနဲ့ဆက်စပ်လျက်ရှိတဲ့ ဘင်္ဂလားပင်လယ်အော် အနောက် မြောက်ပိုင်း (အင်ဒရာပရာဒေ့ရှ်မြောက်ပိုင်းကမ်းလွန် - ဩရိဿတောင်ပိုင်း ကမ်းခြေ) တို့မှာ လေဖိအားနည်းရပ်ဝန်းတစ်ခု စတင်ဖြစ်ပေါ်ခဲ့ပြီး၊ အဆိုပါလေဖိအားနည်းရပ်ဝန်းဟာ ဩဂုတ်လ (၁၈)ရက်နေ့ မှာ အိန္ဒိယနိုင်ငံ၊ ဩရိဿကမ်းခြေကို ဖြတ်ကျော်ဝင်ရောက်ခဲ့ပါတယ်။ ဩဂုတ်လ (၂၈)ရက်နေ့မှာ ဘင်္ဂလားပင်လယ်အော် အနောက်မြောက်ပိုင်းနဲ့ ယင်းနဲ့ဆက်စပ်လျက် ရှိတဲ့ ဘင်္ဂလားပင်လယ်အော် အနောက်အလယ်ပိုင်း (အင်ဒရာပရာဒေ့ရှ်မြောက်ပိုင်းကမ်းလွန်- ဩရိဿတောင်ပိုင်းကမ်းခြေ)တို့မှာ လေဖိအားနည်းရပ်ဝန်းတစ်ခု စတင်ဖြစ်ပေါ်ခဲ့ပြီး၊ အဆိုပါ လေဖိအားနည်းရပ်ဝန်းဟာ (၂၉)ရက်နေ့မှာ အိန္ဒိယနိုင်ငံ၊ အင်ဒရာပရာဒေ့ရှ်မြောက်ပိုင်းကမ်းခြေနဲ့ ဩရိဿတောင်ပိုင်းကမ်းခြေတို့ကို ဖြတ်ကျော် ဝင်ရောက်ခဲ့ပြီး ဖြစ်ပါတယ်။ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တောင်ပိုင်းတို့မှာ မုတ်သုံလေ အားအသင့်အတင့်မှ အားကောင်းခဲ့ပြီး၊ ကျန်ဘင်္ဂလားပင်လယ်အော်မှာ မုတ်သုံလေ အားအနည်းငယ် မှ အားအသင့်အတင့် ရှိခဲ့ပါတယ်။ 

 ပြီးခဲ့တဲ့ သြဂုတ်လအတွင်း မြန်မာနိုင်ငံအရပ်ရပ်မှာ ရွာသွန်းခဲ့တဲ့ မိုးရွာသွန်းမှု အခြေအနေ များမှာ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ ကချင်ပြည်နယ်၊ ရှမ်းပြည်နယ် (မြောက်ပိုင်းနဲ့ အရှေ့ပိုင်း)တို့မှာ ရွာသွန်းမြဲထက်ပိုခဲ့ပြီး၊ မကွေးတိုင်းဒေသကြီး၊ တနင်္သာရီတိုင်း ဒေသကြီး၊ ရှမ်းပြည်နယ်(တောင်ပိုင်း)၊ ရခိုင်ပြည်နယ်၊ ကယားပြည်နယ်နဲ့ ကရင်ပြည်နယ်တို့မှာ ရွာသွန်းမြဲခန့်နဲ့ နေပြည်တော်၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ချင်းပြည်နယ်နဲ့ မွန်ပြည်နယ်တို့မှာ ရွာသွန်းမြဲအောက် လျော့နည်းကာ မိုးထစ်ချုန်းရွာသွန်း ခဲ့ပါတယ်။

မိုးရွာရက်များအနေနဲ့ကလည်း မကွေးတိုင်းဒေသကြီးမှာ (၁၀)ရက်၊ နေပြည်တော်၊ စစ်ကိုင်း တိုင်းဒေသကြီးအောက်ပိုင်း၊ မန္တလေးတိုင်းဒေသကြီး၊ ပဲခူးတိုင်းဒေသကြီး(အနောက်ပိုင်း)၊ ရန်ကုန် တိုင်းဒေသကြီး၊ ရှမ်းပြည်နယ်(မြောက်ပိုင်း)၊ ချင်းပြည်နယ်နဲ့ ကယားပြည်နယ်တို့မှာ (၁၅)ရက်မှ (၁၉)ရက်နဲ့ စစ်ကိုင်းတိုင်းဒေသကြီးအထက်ပိုင်း၊ ပဲခူးတိုင်းဒေသကြီး(အရှေ့ပိုင်း)၊ ဧရာဝတီတိုင်း ဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ရှမ်းပြည်နယ်(အရှေ့ပိုင်းနဲ့ တောင်ပိုင်း)၊ ရခိုင် ပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ (၂၃)ရက်မှ (၂၉)ရက် မိုးထစ်ချုန်းရွာသွန်းခဲ့ပါတယ်။ မိုးရေချိန်စံချိန်သစ်များ အနေနဲ့ကတော့ သြဂုတ်လ (၂) ရက်နေ့မှာ မော်လိုက်မြို့၊ (၆) ရက်နေ့ မှာ အောင်လံမြို့နဲ့ (၁၆) ရက်နေ့မှာ ကန့်ဘလူမြို့တို့မှာ မိုးရေချိန်စံချိန်သစ်များ တင်ခဲ့တာကို တွေ့ရ ပါတယ်။

မြစ်ရေအခြေအနေများမှာ ၂၀၂၁ ခုနှစ်၊ သြဂုတ်လအတွင်း ချင်းတွင်းမြစ်ရေဟာ ဟုမ္မလင်းမြို့မှာ ပေဝက်ခန့်၊ စစ်တောင်းမြစ်ရေဟာ မဒေါက်မြို့မှာ (၁)ပေခန့်၊ ရွှေကျင်မြစ်ရေဟာ ရွှေကျင်မြို့မှာ (၂)ပေခွဲ ခန့်၊ သံလွင်မြစ်ရေဟာ ဘားအံမြို့မှာ (၁)ပေခန့်နဲ့ ဘီးလင်းမြစ်ရေဟာ ဘီးလင်းမြို့မှာ ပေဝက်ခန့် သက်ဆိုင်ရာမြို့များရဲ့ စိုးရိမ်ရေမှတ် အသီးသီးအထက် (၁)ကြိမ်ခန့်စီနဲ့ သောင်ရင်းမြစ်ရေဟာ မြဝတီမြို့ မှာ ပေဝက်နဲ့ (၂)ပေခွဲခန့် စိုးရိမ်ရေမှတ်အထက်သို့ (၂)ကြိမ်ခန့် ကျော်လွန်ရောက်ရှိခဲ့ပါတယ်။

အခုဆက်လက်ပြီး ၂၀၂၁ခုနှစ်၊ မိုးနှောင်းကာလအတွက် မိုးလေ၀သနဲ့ ဇလဗေဒခန့်မှန်းချက် များကို တင်ပြပါမယ်ခင်ဗျာ။ 

မိုးနှောင်းကာလဟာ ၂၀၂၁ ခုနှစ်၊ စက်တင်ဘာလ (၁)ရက်နေ့ (မြန်မာသက္ကရာဇ် ၁၃၈၃ ခုနှစ်၊ ဝါခေါင်လပြည့်ကျော် (၁၀)ရက်နေ့)မှစ၍ အနောက်တောင် မုတ်သုံလေ မြန်မာနိုင်ငံ တစ်ဝှမ်းလုံးမှ ပြန်လည် ဆုတ်ခွာသွားသည့်နေ့အထိ ဖြစ်ပါတယ်။ 

အနောက်တောင်မုတ်သုံလေဟာ 

(က) စက်တင်ဘာလ (၁၃ - ၁၈) ရက်အတွင်း မြန်မာနိုင်ငံမြောက်ပိုင်းဒေသများမှ လည်း ကောင်း၊

(ခ) စက်တင်ဘာလ (၁၉ - ၂၄) ရက်အတွင်း မြန်မာနိုင်ငံအလယ်ပိုင်းဒေသများမှ လည်း ကောင်း၊

(ဂ) စက်တင်ဘာလ (၂၅ - ၃၀) ရက်အတွင်း မြစ်ဝကျွန်းပေါ်ဒေသများမှ လည်းကောင်း၊  

(ဃ) အောက်တိုဘာလ (၁ - ၆) ရက်အတွင်း မြန်မာနိုင်ငံတစ်ဝှမ်းလုံးမှ ဆုတ်ခွာသွား ဖွယ်ရာ ရှိပါတယ်။

ဘင်္ဂလားပင်လယ်အော်အခြေအနေကတော့ ဘင်္ဂလားပင်လယ်အော်မှာ လေဖိအားနည်း ရပ်‌၀န်း (၃)ကြိမ် ဖြစ်ပေါ်နိုင်ပြီး၊ (၁)ကြိမ်မှာ ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင် ပါတယ်။ အနောက်တောင်မုတ်သုံလေဟာ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ အား အနည်းငယ်မှ အားအသင့်အတင့် ရှိနိုင်ပါတယ်။

မိုးရွာသွန်းမှုအ‌ခြေအနေမှာ နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီ တိုင်းဒေသကြီး၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ ရွာသွန်းမြဲခန့် မိုးထစ်ချုန်း ရွာနိုင်ပါတယ်။

မြစ်ရေအခြေအနေ ခန့်မှန်းချက်အနေနဲ့ကတော့  မိုးနှောင်းကာလ စက်တင်ဘာလနဲ့ အောက်တို ဘာလတို့မှာ ဧရာဝတီမြစ်ရေသဟာ ရွှေကူမြို့၊ ကသာမြို့၊ မန္တလေးမြို့၊ စစ်ကိုင်းမြို့၊ မြင်းမူ မြို့၊ ပခုက္ကူမြို့၊ ညောင်ဦးမြို့၊ ချောက်မြို့၊ ဆိပ်သာမြို့၊ ဟင်္သာတမြို့နဲ့ ဇလွန်မြို့တို့မှာ (၁)ကြိမ် ခန့်စီ၊ ချင်းတွင်းမြစ်ရေဟာ ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေးဝမြို့၊ မင်းကင်းမြို့နဲ့ မုံရွာ မြို့မှာ (၁)ကြိမ်ခန့်စီ၊ ဒုဋ္ဌဝတီမြစ်ရေဟာ မြစ်ငယ်မြို့မှာ (၁)ကြိမ်ခန့်၊ သံလွင်မြစ်ရေဟာ ဘားအံမြို့မှာ (၁)ကြိမ်ခန့်၊ သောင်ရင်းမြစ်ရေဟာ မြဝတီမြို့မှာ (၁)ကြိမ်ခန့်၊ ငဝန်မြစ်ရေဟာ ငါးသိုင်းချောင်းမြို့နဲ့ သာပေါင်းမြို့တို့မှာ (၁)ကြိမ်ခန့်စီနဲ့ တိုးမြစ်ရေဟာ မအူပင်မြို့မှာ (၁)ကြိမ်ခန့် ယင်းမြို့များရဲ့ စိုးရိမ် ရေမှတ် အသီးသီး အထက်သို့ ကျော်လွန်ရောက်ရှိနိုင်ပါတယ်။

အခုဆက်လက်ပြီး ၂၀၂၁ ခုနှစ်၊ စက်တင်ဘာလ လပတ်အတွက် မိုးလေ၀သနဲ့ ဇလဗေဒ ခန့်မှန်းချက်များကို တင်ပြပါ့မယ်။ ဘင်္ဂလားပင်လယ်အော်မှာ လေဖိအားနည်းရပ်‌၀န်း (၂)ကြိမ် ဖြစ်ပေါ် နိုင်ပြီး၊ (၁)ကြိမ်မှာ ပိုမိုအားကောင်းလာကာ မုန်တိုင်းငယ်အဖြစ်သို့ ‌ရောက်ရှိနိုင်ပါတယ်။ အနောက်တောင် မုတ်သုံလေဟာ ၂၀၂၁ ခုနှစ်၊ စက်တင်ဘာလ (၁၃ - ၁၈) ရက်အတွင်း  မြန်မာနိုင်ငံမြောက်ပိုင်း ဒေသများမှ လည်းကောင်း၊ စက်တင်ဘာလ (၁၉ - ၂၄) ရက်အတွင်း မြန်မာနိုင်ငံအလယ်ပိုင်း ဒေသများမှ လည်းကောင်း၊ စက်တင်ဘာလ (၂၅ - ၃၀) ရက်နေ့အတွင်း မြစ်ဝကျွန်းပေါ်ဒေသများမှ လည်းကောင်း ဆုတ်ခွာသွား ဖွယ်ရာရှိပါတယ်။ အနောက်တောင် မုတ်သုံလေဟာ ကပ္ပလီပင်လယ်ပြင် နဲ့ ဘင်္ဂလား ပင်လယ်အော်တို့မှာ အားအနည်းငယ်မှ အားအသင့်အတင့် ရှိနိုင်ပါတယ်။

မိုးရွာသွန်းမှု အ‌ခြေအနေမှာ နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်း ဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီ တိုင်းဒေသကြီး၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ ရွာသွန်းမြဲခန့် မိုးထစ်ချုန်း ရွာနိုင်ပါတယ်။

မိုးရွာရက်များအနေနဲ့လည်း ပဲခူးတိုင်းဒေသကြီး(အရှေ့ပိုင်း)၊ ရန်ကုန်တိုင်းဒေသကြီး၊ ဧရာဝတီ တိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ရခိုင်ပြည်နယ်၊ ကရင်ပြည်နယ်နဲ့ မွန်ပြည်နယ် တို့မှာ (၂၁)ရက်မှ (၂၅)ရက်ခန့်၊ စစ်ကိုင်းတိုင်းဒေသကြီးအထက်ပိုင်း၊ ပဲခူးတိုင်းဒေသကြီး(အနောက်ပိုင်း)၊  ရှမ်းပြည်နယ်(တောင်ပိုင်း)နဲ့ ချင်းပြည်နယ်တို့မှာ (၁၆)ရက်မှ (၂၀)ရက်ခန့်နဲ့ နေပြည်တော်၊ စစ်ကိုင်း တိုင်းဒေသကြီးအောက်ပိုင်း၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ရှမ်းပြည်နယ်(မြောက်ပိုင်း နဲ့ အရှေ့ပိုင်း)၊ ကယားပြည်နယ်တို့မှာ (၁၁)ရက်မှ (၁၅)ရက်ခန့် မိုးထစ်ချုန်းရွာနိုင်ပါတယ်။

မြစ်ရေအခြေအနေ ခန့်မှန်းချက်အနေနဲ့ကတော့ ၂၀၂၁ ခုနှစ်၊ စက်တင်ဘာလအတွင်း ဧရာဝတီ မြစ်ရေဟာ ရွှေကူမြို့၊ ကသာမြို့၊ မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူမြို့၊ ညောင်ဦးမြို့၊ ချောက် မြို့၊ ဆိပ်သာမြို့၊ ဟင်္သာတမြို့နဲ့ ဇလွန်မြို့တို့မှာ (၁)ကြိမ်ခန့်စီ၊ ချင်းတွင်းမြစ်ရေဟာ ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေးဝမြို့၊ မင်းကင်းမြို့နဲ့ မုံရွာမြို့မှာ (၁)ကြိမ်ခန့်စီ၊ ဒုဋ္ဌဝတီ မြစ်ရေဟာ မြစ်ငယ်မြို့မှာ (၁)ကြိမ်ခန့်၊ သံလွင်မြစ်ရေဟာ ဘားအံမြို့မှာ (၁)ကြိမ်ခန့်၊ သောင်ရင်း မြစ်ရေဟာ မြဝတီမြို့မှာ (၁)ကြိမ်ခန့်၊ ငဝန်မြစ်ရေဟာ ငါးသိုင်းချောင်းမြို့နဲ့ သာပေါင်းမြို့တို့မှာ (၁)ကြိမ် ခန့်စီနဲ့ တိုးမြစ်ရေဟာ မအူပင်မြို့မှာ (၁)ကြိမ်ခန့် ယင်းမြို့များရဲ့ စိုးရိမ်ရေမှတ်အသီးသီးအထက်သို့ ကျော်လွန်ရောက်ရှိနိုင်ပါတယ်။

အချုပ်အားဖြင့် တင်ပြလိုတာကတော့ လာမယ့် စက်တင်ဘာလဟာ မိုးနှောင်းကာလသို့ ရောက်ရှိလာပြီ ဖြစ်တဲ့အတွက် အနောက်တောင်မုတ်သုံလေဟာ မြန်မာနိုင်ငံမြောက်ပိုင်းဒေသများ၊ အလယ်ပိုင်းဒေသများနဲ့ မြစ်ဝကျွန်းပေါ်ဒေသများမှ ဆုတ်ခွာသွားနိုင်ပြီး မြန်မာနိုင်ငံတစ်ဝှမ်း လုံးအနေနဲ့ ကတော့ အောက်တိုဘာလ ပထမ (၁၀)ရက်ပတ်အတွင်းမှာ ဆုတ်ခွာသွားနိုင်ပါတယ်။ မုတ်သုံလေ ဆုတ်ခွာသွားသော်လည်း အနောက်ဘက်မှ ရွေ့လျားလာတဲ့ လေပွေလှိုင်းများရဲ့ အရှိန်ကြောင့်လည်း ကောင်း၊ တောင်တရုတ်ပင်လယ်ပြင်မှာ ဖြစ်ပေါ်နိုင်တဲ့ မုန်တိုင်း အကြွင်းအကျန် တိမ်တိုက်များ မြန်မာနိုင်ငံဘက်ဆီသို့ ရွေ့လျားလာခြင်းတို့ကြောင့်လည်းကောင်း၊ ဘင်္ဂလားပင်လယ်အော်မှာ ဖြစ်ပေါ် နိုင်တဲ့ လေဖိအားနည်းရပ်ဝန်းများနဲ့ မုန်တိုင်းများကြောင့် လည်းကောင်း၊ မြန်မာနိုင်ငံ အရပ်ရပ်မှာ မိုးထစ်ချုန်းရွာသွန်းခြင်းများ ဖြစ်ပေါ်နိုင်ပါတယ်။ ဒါ့အပြင် အနောက်တောင်မုတ်သုံလေ ဆုတ်ခွာခြင်း နဲ့အတူ မိုးတိမ်တောင်များ ပိုမိုဖြစ်ပေါ်ပြီး၊ လျှပ်စီးလက်ခြင်း၊ လေပြင်းတိုက်ခက်ခြင်း၊ မိုးကြိုးပစ်ခြင်းနဲ့ မိုးသည်းထန်စွာ ရွာသွန်းခြင်းများလည်း ဖြစ်ပေါ်နိုင်ပါတယ်။ အထူးသဖြင့် ကမ်းရိုးတန်းသွား သင်္ဘော များနဲ့ ကမ်းနီး၊ ကမ်းဝေး ငါးဖမ်းရေယာဉ်များအနေဖြင့် ဘင်္ဂလားပင်လယ်အော်မှာ ဖြစ်ပေါ်နိုင်တဲ့ လေဖိအားနည်းရပ်ဝန်းနဲ့ မုန်တိုင်းသတင်းများကို အထူးဂရုပြု သွားလာစေလိုပါတယ်။ ဒါ့အပြင် လာမယ့် စက်တင်ဘာလ အတွင်း မြန်မာနိုင်ငံရှိ မြစ်ကြီးများမှ မြစ်ရေများဟာလည်း စိုးရိမ်ရေမှတ်ကို ကျော်လွန်ရောက်ရှိ နိုင်သေးတဲ့အတွက် မြစ်ကမ်းအနီးနဲ့ မြေနိမ့်ပိုင်းနေထိုင်သူများအနေဖြင့် မြစ်ရေကြီး ခြင်းသတိပေးချက်၊ ထုတ်ပြန်ချက်များကို အထူးဂရုပြုစေလိုပါတယ်။ 

အဲ့ဒီလို ထူးခြားတဲ့ မိုးလေဝသအခြေအနေ၊ မြစ်ရေအခြေအနေများနဲ့ ပတ်သက်၍ ကြိုတင် သတိပေးချက် ထုတ်ပြန်ချက်များကို မြန်မာနိုင်ငံ မိုးလေဝသနဲ့ ဇလဗေဒညွှန်ကြားမှုဦးစီးဌာနမှ အချိန် နဲ့တပြေးညီ ထုတ်ပြန် ပေးသွားမှာ ဖြစ်ပါတယ်။

မိုးလေဝသ၊ ဇလဗေဒသတင်းများနဲ့ ပတ်သက်၍ သိရှိလိုပါက မိုးလေဝသနဲ့ ဇလဗေဒညွှန်ကြား မှုဦးစီးဌာနရဲ့ Website ဖြစ်တဲ့ www.moezala.gov.mm  သို့လည်းကောင်း၊ မိုးလေဝသနဲ့ ဇလဗေဒ ညွှန်ကြားမှုဦးစီးဌာနရဲ့ Facebook သို့လည်းကောင်း၊ နေပြည်တော်ရှိ အလိုအလျောက် ဖြေကြားစက် ဖြစ်တဲ့ ၀၆၇-၃၄၁၁၂၅၂ ဖုန်းနံပါတ်သို့လည်းကောင်း၊ Call Center 1876 (EXT No.5) သို့ လည်းကောင်း၊  မြန်မာ့အသံနှင့် ရုပ်မြင်သံကြား၊ မြဝတီရုပ်မြင်သံကြား၊ နေ့စဉ်ထုတ် သတင်းစာများ၊ တိုင်းဒေသကြီးများနဲ့ ပြည်နယ်အသီးသီးတို့မှ နေ့စဉ်ထုတ်လွှင့်လျက်ရှိတဲ့ FMရေဒီယိုများမှ တဆင့် မိုးလေဝသနှင့် ဇလဗေဒသတင်း၊ သတိပေးချက်များကို ကြည့်ရှုနားဆင်နိုင်ပါတယ်ဆိုတဲ့ အကြောင်း တင်ပြရင်း နိဂုံးချုပ်အပ်ပါတယ်။