စိုက်ပျိုးရေးသိပ္ပံကျောင်းများအနေဖြင့် အနာဂတ်လယ်ယာကဏ္ဍတွင် ပါဝင်ဆောင်ရွက်လာကြမည့် လူငယ်များအား စိုက်ပျိုးမွေးမြူရေး အခြေခံသော အသက်မွေးဝမ်းကျောင်းပညာ ကျွမ်းကျင်သူများအဖြစ် သင်ကြားလေ့ကျင့် မွေးထုတ် ပေးကြရာ၌ ကျောင်းဆင်း မောင်မယ်များ၏ ရပ်တည်ရာလုပ်ငန်းခွင်များတွင် အရည်အချင်းပြည့်ဝစွာစွမ်းဆောင်နိုင်ရေး ကိုမျှော်မှန်းပြီး အထူးအလေးထား ကြိုးပမ်းကြစေလိုကြောင်း၊ ယင်းတို့၏ လုပ်ငန်းခွင် အောင်မြင်မှုသည်  ကျောင်း၏ ဂုဏ်သိက္ခာ ဖြစ်သည်ကို သတိပြုကြစေလိုကြောင်း၊  ဇန်နဝါရီလ(၆)ရက်နေ့ နံနက်ပိုင်းက ဟဲဟိုး စိုက်ပျိုးရေးသိပ္ပံကျောင်း အား ကြည့်ရှုစစ်ဆေးစဉ် စိုက်ပျိုးရေး၊ မွေးမြူရေးနှင့်ဆည်မြောင်း ဝန်ကြီးဌာန ပြည်ထောင်စုဝန်ကြီး ဦးတင်ထွဋ်ဦး က ပြောကြားသည်။
ရှေးဦးစွာ သင်တန်းခန်းမဆောင်တွင် ဌာနဆိုင်ရာတာဝန်ရှိသူများ၊ စိုက်ပျိုးရေး သိပ္ပံကျောင်းအုပ်ကြီးနှင့် ဆရာ ဆရာမများ အားတွေ့ဆုံ၍ ပြည်ထောင်စုဝန်ကြီး က ဆွေးနွေးပြောကြားရာ၌ သင်ကြား ပို့ချမှု အရည်အသွေး တိုးတက်မြင့်မားရေး အတွက် လိုအပ်သော မွမ်းမံ သင်တန်းများ စီမံ ဆောင်ရွက်ပေးရမည်ဖြစ်ကြောင်း၊ အသက်မွေး ဝမ်းကျောင်း ပညာများကို သင်ကြားလေ့ကျင့်ပေးလျက်ရှိသည့် စိုက်ပျိုးရေးသိပ္ပံကျောင်းများ၏ စိုက်ကွင်း စိုက်ကွက်များ မွေးမြူရေးခြံ လုပ်ငန်းများ ကို လက်တွေ့သင်ကြားရေးလုပ်ငန်းများ အတွက် သာမက တောင်သူများ အတွက် စံနမူနာပြ အဖြစ် ခေါ်ယူပြသနိုင်ရေး စီမံဆောင်ရွက်ရန်လိုကြောင်း၊ စိုက်ပျိုးရေးသိပ္ပံကျောင်းများအားလုံး ၌ မိမိဒေသ၏ ရေ မြေ ရာသီဥတု မိုးလေဝသ မှတ်တမ်းများထားရှိရန် နှင့် စာကြည့်တိုက်များကို အဆင့်မြှင့်တင်ပြီး စိုက်ပျိုးရေး တက္ကသိုလ်၊ မွေးမြူရေးဆိုင်ရာ ဆေးတက္ကသိုလ်များ၏ အွန်လိုင်း စာကြည့်တိုက် ကွန်ယက်များ နှင့် ချိတ်ဆက်လေ့လာနိုင် ရေး ဆောင်ရွက်ရန် လိုအပ်ကြောင်း၊ သတ်မှတ် စာသင်နှစ်လိုက် သင်တန်းများ ပြန်လည်ဖွင့်လှစ်ပါက ကိုဗစ်-၁၉ ကာကွယ်ဆေး မထိုးနှံရသေး သူများ ကာကွယ်ဆေးထိုးနှံရေး နှင့် ကူးဆက်ရောဂါ ကာကွယ်ထိန်းချုပ်ရေးဆိုင်ရာ ညွှန်ကြားချက်များ အပြည့်အဝ လိုက်နာဆောင်ရွက်ရန် လိုအပ်ချက်များကို ဆွေးနွေးမှာကြားသည်။

ထို့နောက် ပြည်ထောင်စုဝန်ကြီး နှင့်တာဝန်ရှိသူများသည် ရှမ်းပြည်နယ်(တောင်ပိုင်း) တောင်ကြီးခရိုင်၊ ကလောမြို့နယ် ဟဲဟိုး စိုက်ပျိုးရေး သိပ္ပံကျောင်း ပြန်လည်ဖွင့်လှစ်ရန် ပြင်ဆင်နေမှုများ၊ အသစ်တိုးချဲ့ ဖွင့်လှစ်မည့် မွေးမြူရေး ဒီပလိုမာ သင်တန်း အတွက် အကြို လုပ်ငန်း ဆောင်ရွက်ပြီးစီးမှုများကို လှည့်လည်ကြည့်ရှု စစ်ဆေးကြသည်။
တိုင်းဒေသကြီး ပြည်နယ်အသီးသီးရှိ စိုက်ပျိုးရေးသိပ္ပံကျောင်းများ၏ ၂၀၁၉-၂၀၂၀ ပညာသင်နှစ်အတွက် ဒုတိယနှစ် (ဒုတိယနှစ်ဝက်) နှင့် ပထမနှစ်(ဒုတိယနှစ်ဝက်) သင်တန်းများ ကို ၂၀၂၂ခုနှစ် ဇန်နဝါရီလ(၁၀)ရက်နေ့တွင် စတင်ဖွင့်လှစ် မည်ရာ လက်ရှိတွင် သင်တန်း ကျောင်းများ အားလုံး၌ အကြိုလုပ်ငန်းများအားလုံးဆောင်ရွက်ပြီးစီးနေပြီဖြစ်သည်။

မွန်းလွဲပိုင်းတွင် ပြည်ထောင်စုဝန်ကြီး အဖွဲ့သည် ရှမ်းပြည်နယ်(အရှေ့ပိုင်း) ကျိုင်းတုံ မြို့နယ်  မိုင်းဇင်းကျေးရွာအုပ်စု တောင်သူ ဒေါ်မီဂျာ ၏ နွေစပါးမျိုးစေ့ထုတ်စိုက်ခင်းတွင် ကောက်စိုက်အဖွဲ့က ရွှေရင်အေးစပါးမျိုး စိုက်ပျိုးနေမှုကို ကြည့်ရှုအားပေးပြီး ဒေသနေ တောင်သူများ နှင့် တွေ့ဆုံကာ ဒေသ ဝမ်းစာဖူလုံရေး၊ မိုးစပါး တစ်ဧက တင်း(၁၀၀)နှင့်အထက် ထွက်ရှိရေး နွေစပါး တစ်ဧက တင်း(၁၂၀) နှင့်အထက် ထွက်ရှိရေး၊ မျိုးကောင်းမျိုးသန့် သုံးစွဲရေး သွင်းအားစု မှန်ကန်ရေး ဈေးကွက်ရှိသော သီးနှံများ ပြောင်းလဲစိုက်ပျိုးရေး၊ မွေးမြူရေး တွဲဘက်လုပ်ကိုင်ပြီး မိသားစုအပိုဝင်ငွေရရှိရေး ဆိုင်ရာကိစ္စရပ်များကို ဆွေးနွေး ပြောကြားသည်။ ဆက်လက်၍ ပြည်ထောင်စုဝန်ကြီး က နွေစပါးမျိုးစေ့ထုတ် တောင်သူများ အား ဓါတ်မြေဩဇာနှင့် တမာပိုးသတ်ဆေးများ ထောက်ပံ့ပေးအပ်ခဲ့သည်။

ထို့နောက် ပြည်ထောင်စုဝန်ကြီး အဖွဲ့သည် နမ့်ကွတ်ရေလွှဲဆည်သို့ရောက်ရှိကြပြီး နမ့်ဟတ်ချောင်းအတွင်း သဲနုန်းဆယ် ခြင်း လုပ်ငန်း ဆောင်ရွက်နေမှုကိုလည်းကောင်း၊ တုံဆီ ကျေးရွာတောင်သူများ ၏ ဟင်းသီးဟင်းရွက်စိုက်ခင်းများကို လည်းကောင်း ကြည့်ရှုစစ်ဆေး အားပေးပြီး ဒေသနေတောင်သူများနှင့် ခင်မင်ရင်းနှီးစွာတွေ့ဆုံ၍ ဟင်းသီးဟင်းရွက် များကို ပလပ်စတစ်ရုံစနစ်အသုံးပြု၍ တစ်နှစ်ပတ်လုံး စီးပွားဖြစ်စိုက်ပျိုးထုတ်လုပ်နိုင်ရေးအတွက် ဌာနမှ နည်းပညာနှင့် အကူအညီများ ပေးအပ်သွား မည့် အခြေအနေများနှင့် တောင်သူများ၏ လူနေမှု အဆင့်အတန်းမြင့်မားလာရေးအတွက် ဌာန၊ ပုဂ္ဂလိကနှင့် တောင်သူများ ပူးပေါင်း ဆောင်ရွက်ရန် လိုအပ်ချက်များကို ဆွေးနွေးပြောကြားကာ ဟင်းသီးဟင်းရွက် မျိုးစေ့နှင့် ဓါတ်မြေဩဇာများကို တောင်သူများလက်ဝယ်အရောက် ပေးအပ်ခဲ့ကြောင်း သတင်းရရှိသည်။