ခေတ်မီဒီဂျစ်တယ်နည်းပညာအခြေခံသည့် ဆန်းသစ်တီထွင်မှုဖြင့် လယ်ယာကဏ္ဍ၏ ကုန်ထုတ် စွမ်းအားမြှင့်တင် နိုင်ရန် လယ်ယာကဏ္ဍ အဆင့်-၄ (Agriculture 4.0) ကို လက်တွေ့ပြောင်းလဲ အကောင်အထည်ဖော်နိုင်ရေး၊ ပြည်သူများအား မိမိဝန်ကြီးဌာနက ဝန်ဆောင်မှု ပေးလျက်ရှိနေသည့် လုပ်ငန်းများ လျင်မြန်ချောမွေ့စေရေး တို့အတွက် သတင်းအချက်အလက်နှင့်ဆက်သွယ်ရေးနည်းပညာ ICT ကို ယခုထက်ပိုမို ကျယ်ပြန့်စွာသုံးစွဲရန် လိုအပ်ကြောင်း၊ ဇန်နဝါရီလ(၅)ရက်နေ့ မွန်းလွဲပိုင်းက စိုက်ပျိုးရေး၊ မွေးမြူရေး နှင့် ဆည်မြောင်း ဝန်ကြီးဌာန စုဝေးဆောင်ခန်းမ၌ ကျင်းပ ပြုလုပ်သည့် ဗုဒ္ဓဟူးနေ့စကားဝိုင်းဆွေးနွေးပွဲ ဖွင့်ပွဲအခမ်းအနားတွင် ပြည်ထောင်စုဝန်ကြီး ဦးတင်ထွဋ်ဦးက ပြောကြား သည်။

       လယ်ယာကဏ္ဍဖွံ့ဖြိုးရေးလုပ်ငန်းများ အကောင်အထည်ဖော်ဆောင်ရွက်ရာတွင် အပြန်အလှန်ဆက်စပ်လျက်ရှိ သည့် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန အောက်ရှိ ဦးစီးဌာနများ တက္ကသိုလ်များမှတာဝန်ရှိသူများ အကြား လုပ်ငန်းနယ်ပယ် အလိုက် အမြင်ချင်း ဖလှယ်ဆွေးနွေးခြင်းဖြင့် ခေတ်မီဒီဂျစ်တယ်နည်းပညာလုပ်ငန်းစဉ်များ ချမှတ် အကောင်အထည်ဖော်နိုင်ရန် ရည်ရွယ်ပြီး ကဏ္ဍအလိုက် ခေါင်းစဉ်များ သတ်မှတ်၍ လစဉ် ပထမပတ် ဗုဒ္ဓဟူးနေ့တိုင်း စကားဝိုင်းအစီအစဉ်ကျင်းပခဲ့ရာ ပဉ္စမအကြိမ်အဖြစ် ယနေ့ကျင်းပသည့် စကားဝိုင်းဆွေးနွေးပွဲကို “သတင်းအချက်အလက် နှင့် ဆက်သွယ်ရေးနည်းပညာ ICT ကို လယ်ယာကဏ္ဍဖွံ့ဖြိုးရေး လုပ်ငန်းများတွင် အကျိုးရှိထိရောက်စွာ အသုံးချနိုင်ရေး” ခေါင်းစဉ်ဖြင့်ကျင်းပပြုလုပ်သည်။

     ကျန်းမာရေးဆိုင်ရာ ညွှန်ကြားချက်များနှင့်အညီကျင်းပပြုလုပ်သည့် အဆိုပါ စကားဝိုင်းဆွေးနွေးပွဲ သို့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးတင်ထွဋ်ဦး ၊ ဒုတိယဝန်ကြီး ဒေါက်တာ အောင်ကြီး၊ အမြဲတမ်း အတွင်းဝန် ဦးကျော်မင်းဦး နှင့် ဝန်ကြီးဌာနအောက်ရှိ ဦးစီးဌာနများမှ ညွှန်ကြားရေးမှူးချုပ်များ ၊ ပါမောက္ခချုပ်များ ၊ ဌာနဆိုင်ရာ တာဝန်ရှိသူများတက်ရောက်ကြပြီး တိုင်းဒေသကြီးပြည်နယ်များ မှ ကိုယ်စားလှယ်များ က အွန်လိုင်းစနစ်ဖြင့် ပါဝင် တက်ရောက်ခဲ့ကြသည်။
      

        စားနပ်ရိက္ခာဖူလုံရေး နှင့် အစားအစာဘေးကင်းလုံခြုံရေးဆိုင်ရာ လုပ်ငန်းများ၊ မျိုးစေ့နှင့် စိုက်ပျိုးရေး သွင်းအားစု ဆိုင်ရာများ၊ နည်းပညာနှင့်ဈေးကွက် သတင်းအချက်အလက်ဆိုင်ရာများ ၊ လယ်ယာမြေ စီမံခန့်ခွဲရေးဆိုင်ရာလုပ်ငန်း များ၊ တိရစ္ဆာန် ကူးစက်ရောဂါ ထိန်းချုပ်ရေးလုပ်ငန်းများ နှင့် မွေးမြူရေး ကဏ္ဍဆိုင်ရာ လုပ်ငန်းများ၊ တရားမဝင်ငါးဖမ်းဆီးမှု တားဆီး ကာကွယ်တိုက်ဖျက်ရေး၊ အဏ္ဏဝါ ပတ်ဝန်းကျင် ကာကွယ်ရေးနှင့် ငါးလုပ်ငန်းစီမံခန့်ခွဲမှုများကို အထောက်အကူ ပြုနိုင်မည့် ပင်လယ်ပြင်ဆိုင်ရာလေ့လာမှုများ ၊ ရာသီဥတုပြောင်းလဲမှုဆိုင်ရာအကျိုးသက်ရောက်မှုများ၊ စိုက်ပျိုးမွေးမြူရေး လုပ်ငန်း ကွင်းဆက်တစ်လျှောက် ပါဝင်နေသူများထံ နည်းပညာ လွှဲပြောင်းပေးရေးလုပ်ငန်းများနှင့် တက္ကသိုလ်များ၏ သင်ကြားသင်ယူမှုဆိုင်ရာ လုပ်ငန်းများစသည့် လုပ်ငန်းနယ်ပယ်အရပ်ရပ်တွင် ICT နည်းပညာကို အသုံးချလျက်ရှိသကဲ့သို့ အနာဂတ်ကာလတွင် ပိုမိုအဆင့်မြင့်သော အင်တာနက်ဆိုင်ရာ နည်းပညာများ(Internet of things) အသုံးချ နိုင်ရေး အတွက် လိုအပ်သော အခြေခံအဆောက်အအုံ ပစ္စည်းကိရိယာများနှင့် ကျွမ်းကျင်သော ICT ပညာရှင် လူသားအရင်းအမြစ် များ ဖြည့်ဆည်းဆောင်ရွက်ရန် စိုက်ပျိုးရေး၊ မွေးမြူရေးနှင့်ဆည်မြောင်း ဝန်ကြီးဌာနက ကြိုးပမ်းလျက် ရှိသည်။

        ကိုဗစ်-၁၉ ကပ်ရောဂါ ကြောင့် ပြောင်းလဲလာသည့် နေ့စဉ်လူနေမှုဘဝပုံစံသစ် နှင့် ရာသီဥတုပြောင်းလဲမှုများကြောင့် ICT  နည်းပညာသည် အရေးပါသော အခန်းကဏ္ဍမှ ပါဝင်လျက် ရှိသကဲ့သို့ လယ်ယာကုန်ထုတ်လုပ်မှု ကွင်းဆက် တစ်လျောက် ခေတ်မီဖွံ့ဖြိုးတိုးတက်လာစေရေး အတွက်လည်း ဒီဂျစ်တယ်နည်းပညာကို ပိုမိုတွင်ကျယ် ထိရောက်စွာ အသုံးချရန် လိုအပ်လျက်ရှိကြောင်း၊ ကျေးလက်နေ ပြည်သူများ၊ တောင်သူ လယ်သမားများ အနေဖြင့်လည်း မိုဘိုင်းဖုန်း သုံးစွဲမှု တွင်ကျယ်လာလျက်ရှိရာ ဆက်သွယ်ရေးနည်းပညာအခြေခံသည့်တောင်သူပညာပေးလုပ်ငန်း တိုးချဲ့ ဆောင်ရွက် နိုင်ရေး ကြိုးပမ်းခြင်း ဖြစ်ကြောင်း သတင်းရရှိသည်။