ပြောင်းလဲတိုးတက်လာလျက်ရှိသော ခေတ်ကာလနှင့်အညီ စိုက်ပျိုးနည်းပညာ ပြန့်ပွားရေး လုပ်ငန်းများ၊ တောင်သူ အသိပညာပေး လုပ်ငန်းများတွင် ဒီဂျစ်တယ်နည်းပညာ နှင့် မိုဘိုင်းကွန်ယက် စနစ်များအား အကျိုးရှိထိရောက်စွာ  အသုံးချနိုင်ရန် စိုက်ပျိုးရေးဦးစီးဌာန ဝန်ထမ်းများ အတွက် “ပိုစတာကို အခြေခံ၍ စိုက်ပျိုးပညာပေး ဗီဒီယိုထုတ်လုပ်ခြင်းသင်တန်း” ကို နိုဝင်ဘာလ(၂၂)ရက်နေ့ တွင် အွန်လိုင်းစနစ်ဖြင့် ဖွင့်လှစ်ပို့ချပေးလျက်ရှိသည်။

  လူစိတ်ဝင်စားမှု အားကောင်းသည့် လူမှုကွန်ယက်များပေါ်တွင် အနုပညာမြောက်စွာ တင်ဆက်ပေးနိုင်ခြင်းဖြင့် တောင်သူများနှင့် လယ်ယာကဏ္ဍတွင် ပါဝင်ပတ်သက်သူအားလုံးတို့က စိုက်ပျိုးနည်းပညာနှင့် အသိပညာပေးလုပ်ငန်းများအပေါ် ပိုမိုစိတ်ဝင်တစား ရှိလာကြစေရန် ကြိုးပမ်း ဆောင်ရွက်ခြင်းဖြစ်ကြောင်း၊ တစ်ချိန်တည်းမှာပဲ ဒေသအသီးသီးတွင် တာဝန် ထမ်းဆောင်နေ ကြသော  စိုက်ပျိုးရေးဦးစီးဌာန ဝန်ထမ်းများအနေဖြင့်လည်း ခေတ်မီဆက်သွယ်ရေး နည်းပညာကို ကျွမ်းကျင်စွာ အသုံးချနိုင်သည့် လူသားအရင်းအမြစ်များ အဖြစ် ဖော်ဆောင်ပေးနိုင်ရန် ရည်ရွယ် ဆောင်ရွက်ခြင်းဖြစ်ကြောင်း စိုက်ပျိုးပညာပေးရေးနှင့် ကျေးလက်ဒေသဖွံ့ဖြိုးရေး သင်တန်းကျောင်း (AERDTC) ကျောင်းအုပ်ကြီး ဒေါက်တာညီညီ က ပြောသည်။

တိုင်းဒေသကြီး ပြည်နယ် အသီးသီးတွင် တာဝန်ထမ်းဆောင်လျှက်ရှိကြသည့် စိုက်ပျိုးရေး ဦးစီးဌာန ဝန်ထမ်းများအား ပုံနှိပ်မီဒီယာမှ  ဗီဒီယိုမီဒီယာသို့ ပြောင်းလဲဖန်တီးခြင်းနည်းပညာများကို ပို့ချပေးမည့် အဆိုပါသင်တန်း အား နိုဝင်ဘာလ(၂၂)ရက်နေ့မှ(၂၆)ရက်နေ့အထိ နေပြည်တော် ရေဆင်းရှိ စိုက်ပျိုးပညာပေးရေးနှင့်ကျေးလက်ဒေသဖွံ့ဖြိုးရေးသင်တန်းကျောင်း (AERDTC)ကို အခြေပြု၍ ဒီဂျစ်တယ် မီဒီယာအတတ်ပညာ ၊ တင်ပြမှုအတတ်ပညာ နှင့် လက်တွေ့ ဇာတ်ညွှန်း ရေးသားနည်း၊ ကင်မရာအသုံးပြုနည်း နှင့် လက်တွေ့ရိုက်ကူးခြင်း၊ တည်းဖြတ်ခြင်းနည်းပညာ ၊ ဆန်းသစ်တီထွင် ဖန်တီးခြင်း၊ သတင်းရေးသားနည်း ၊ အင်တာနက်အသုံးပြု လူမှုကွန်ယက်များပေါ်သို့ လွှင့်တင်ခြင်း နည်းပညာများကို အွန်လိုင်းစနစ်ဖြင့် ပို့ချဆွေးနွေးသွားမည်ဖြစ်ကြောင်း၊

ယခု သင်တန်းသည် ဒုတိယအကြိမ် ဖွင့်လှစ်ခြင်းဖြစ်ပြီး တိုင်းဒေသကြီး ပြည်နယ်(၈)ခုတို့မှ သင်တန်းသူ သင်တန်းသား (၄၈)ဦး တက်ရောက်လေ့လာလျက်ရှိကြောင်း၊ နိုဝင်ဘာလ(၉)ရက်နေ့မှ (၁၂)ရက်နေ့ အထိ ပထမအကြိမ် ဖွင့်လှစ်ခဲ့သည့် သင်တန်းတွင် တိုင်းဒေသကြီး ပြည်နယ်(၇)ခုတို့မှ သင်တန်းသူ သင်တန်းသား(၄၂)ဦးတို့ တက်ရောက်လေ့လာခဲ့ကြကြောင်း ၊ သင်းတန်းနှစ်ကြိမ် ဖွင့်လှစ် ပို့ချ ပေးခြင်းကြောင့် နေပြည်တော် အပါအဝင် တိုင်းဒေသကြီး ပြည်နယ်အားလုံးတို့မှ စိုက်ပျိုးရေး ဝန်ထမ်း စုစုပေါင်း (၉၀)ဦး တို့ကို ဒီဂျစ်တယ် မီဒီယာနည်းပညာများ ပို့ချပေးနိုင်ခဲ့ကြောင်း သတင်း ရရှိသည်။