စိုက်ပျိုးရေးကဏ္ဍ ဖွံ့ဖြိုးတိုးတက်ရေးအတွက် စိုက်ပျိုးပညာပေးရေးဝန်ထမ်းများ နှင့် မြေအသုံးချရေး ၊ မျိုးစေ့ ၊ ပိုးမွှားရောဂါ ကာကွယ်နှိမ်နင်းရေး ဘာသာရပ်ဆိုင်ရာ ကျွမ်းကျင်သူများ အချင်းချင်းကြား နည်းပညာဖလှယ်ရေး အစီအစဉ်များ ဆောင်ရွက်ခြင်း၊ အပြန်အလှန် ဟန်ချက်ညီ ပူးပေါင်းဆောင်ရွက်ခြင်း တို့ဖြင့် လုပ်ငန်းအောင်မြင်မှု ရလဒ်များ ပိုမို အားကောင်းလာရေး ကြိုးပမ်းကြစေလိုကြောင်း၊ ရာထူးတိုး ခန့်ထားရာတွင် ကျွမ်းကျင်မှု အရည်အချင်း နှင့် အရည်အသွေး အပေါ်သုံးသပ်၍ တာဝန်ပေးအပ်နိုင်ရေး ဆောင်ရွက်လျက် ရှိကြောင်း၊ ဘာသာရပ် ဆိုင်ရာ ကျွမ်းကျင်သူ Subject Matter Specialist (SMS)များ အား စနစ်တကျ တာဝန် ပေးအပ်နိုင်ရေး ၊ ကြီးကြပ်သူ နှင့် လုပ်ငန်းအကောင် အထည်ဖော် ဆောင်ရွက် မည့်သူ အချိုးမှန်ကန်ရေး ၊ ကျွမ်းကျင်မှု နှင့် လုပ်ငန်းတာဝန် ကိုက်ညီရေး တို့ကို လည်း စိစစ်ဆောင်ရွက်သွားမည်ဖြစ်ကြောင်း၊ နိုဝင်ဘာလ ၁၉ရက်နေ့ နေ့လည်ပိုင်းက ရန်ကုန်မြို့ အင်းစိန်မြို့နယ်ရှိ မြေအသုံးချရေးဌာနခွဲ အစည်းအဝေးခန်းမ၌ ကျင်းပပြုလုပ်သည့် ရန်ကုန်တိုင်းဒေသကြီး ၏ စိုက်ပျိုးထုတ်လုပ်မှု အရှိန်အဟုန် ပိုမိုအားကောင်းလာရေးလုပ်ငန်း ညှိနှိုင်းအစည်းအဝေးတွင် စိုက်ပျိုးရေးဦးစီးဌာန ညွှန်ကြားရေးချုပ် ဒေါက်တာရဲတင့်ထွန်း က ပြောကြားသည်။

အစည်းအဝေးသို့ သီးနှံကာကွယ်ရေး ညွှန်ကြားရေးမှူး ၊ ရန်ကုန်တိုင်းဒေသကြီးဦးစီးမှူး  နှင့် မြေအသုံးချရေးဌာနခွဲ၊ မျိူးစေ့ဌာနခွဲ ၊ သီးနှံကာကွယ်ရေးဌာနခွဲ တို့မှ တာဝန်ရှိသူများ တက်ရောက်ကြသည်။

အစည်းအဝေးတွင် ညွှန်ကြားရေးမှူးချုပ်က တောင်သူများ၏ လိုအပ်ချက် နှင့် ကိုက်ညီ ပြီး ရလဒ်ကောင်းပေးနိုင်သည့် စမ်းသပ်ကွက်များဖြစ်စေရေး မျှော်မှန်း အားစိုက် ဆောင်ရွက်ရန် လိုအပ်ချက်များ၊ စံပြကွက်များ ဆောင်ရွက်ရာ၌ အောင်မြင်မှုများ ထင်သာ မြင်သာဖြစ်စေပြီး တောင်သူများ အမှန်တကယ် အားကိုးလာသည့် စံနမူနာပြ စိုက်ခင်းများ ဖြစ်ရန် လိုအပ် ချက်များ၊ GAP စနစ် အားကောင်းလာစေရေး ဆောင်ရွက်ရန် လိုအပ်ချက်များ ကိုလည်းကောင်း ဆွေးနွေးပြောကြားပြီး အစည်းအဝေးတက်ရောက် လာကြသူများက သက်ဆိုင်ရာလုပ်ငန်းကဏ္ဍ များအလိုက် ရှင်းလင်းတင်ပြကြသည်။

တင်ပြချက်များအပေါ် ညွှန်ကြားရေးမှူးချုပ်က ပြန်လည်ဆွေးနွေး ပြောကြားရာ၌ သွင်းအားစု များ ဈေးနှုန်းကြီးမြင့်လာလျက်ရှိရာ တောင်သူများ စိုက်ပျိုးစရိတ်အရင်းအနှီး သက်သာစေရေး အတွက် ဓာတ်မြေဩဇာ လျော့ချသုံးစွဲခြင်းကြောင့် အထွက်နှုန်းကို ထိခိုက်မှု မရှိစေရန် သဘာဝ မြေဩဇာများ ပြုလုပ်သုံးစွဲခြင်း၊ ပိုက်ဆံလျော် သစ်စိမ်းမြေဩဇာများ ထည့်သွင်း သုံးစွဲခြင်း၊ ပိုးသတ်ဆေး လျော့ချသုံးစွဲနိုင်ရေးအတွက် စံပြကွက်များ ပြုလုပ်၍ တောင်သူများ လိုက်နာ ဆောင်ရွက်နိုင်ရန် ပညာပေးလုပ်ငန်းများ ဆောင်ရွက်ခြင်း တို့ကို နိုင်ငံတစ်ဝန်း ကျယ်ကျယ် ပြန့်ပြန့် နည်းပညာပေး လုပ်ငန်းများ ဆောင်ရွက်ရန်လိုအပ်ကြောင်း၊  တောင်သူများအား နည်းပညာ ဖလှယ်ရန် အတွက် အိုင်တီနည်းပညာကို အသုံးပြု၍ “တောင်သူ့ ရေးရာ အဖြေရှာ” အစီအစဉ်များ ဆောင်ရွက်စေလိုကြောင်းဖြင့် ဆွေးနွေးမှာကြားခဲ့သည်။

အလားတူ ညွှန်ကြားရေးမှူးချုပ် နှင့် တာဝန်ရှိသူများသည် အင်းစိန်မြို့နယ်ရှိ သီးနှံကာကွယ်ရေးဌာနခွဲ ၏ ဆောင်ရွက်ပြီး ဆောင်ရွက်ဆဲလုပ်ငန်းများကို ကြည့်ရှုစစ်ဆေးပြီး ဆက်လက် အကောင်အထည်ဖော်ဆောင်ရွက်မည့် လုပ်ငန်းများ ထိရောက် အောင်မြင်စွာ ဆောင်ရွက်နိုင်ရေး ဆွေးနွေးခဲ့ကြသည်။

စိုက်ပျိုးရေးဆိုင်ရာ သွင်းကုန်ထုတ်ကုန်များ ကုန်သွယ်မှုချောမွေ့စေရေးအတွက် အပင် ပိုးမွှား ရောဂါ ပျံ့ပွားမှု ထိန်းချုပ်ရေးလုပ်ငန်းများ ဆောင်ရွက်ခြင်း၊ ကုန်သွယ်မှုလွယ်ကူ လျင်မြန်ရေး အတွက် လိုအပ်သည့် အပင်ပိုးမွှားရောဂါကင်းရှင်းကြောင်း ထောက်ခံချက် လက်မှတ် ထုတ်ပေး ခြင်း တို့ကို စိုက်ပျိုးရေးဦးစီးဌာန သီးနှံကာကွယ်ရေးဌာနခွဲ က တာဝန်ယူ ဆောင်ရွက်လျက် ရှိရာ ပုဂ္ဂလိက လုပ်ငန်းရှင်များနှင့် သက်ဆိုင်သူ အားလုံးတို့က သတ်မှတ်ထားသော ဥပဒေ၊ နည်းဥပဒေ၊ စည်းမျဉ်း စည်းကမ်းများကို တိတိကျကျ  လိုက်နာ ဆောင်ရွက်ကြရန် လိုအပ် ကြောင်း၊ နယ်စပ်ကုန်သွယ်ရေးဓါတ်ခွဲခန်းများနှင့် ဗဟိုဓါတ်ခွဲခန်းများတွင် လိုအပ်လျက် ရှိသည့် ဓါတ်ခွဲခန်းသုံး ပစ္စည်းများကို ဖြည့်ဆည်းလျက်ရှိပြီး နိုင်ငံတကာ အသိအမှတ်ပြု (ISO) လက်မှတ် ရရှိရေးကြိုးပမ်းလျက်ရှိကြောင်း၊ လယ်ယာထွက်ကုန်များ တင်သွင်း တင်ပို့မှု နိုင်ငံများ အလိုက် သတ်မှတ်ထားသည့် စံချိန်စံညွှန်းများနှင့်ညီညွတ်စေရေး အတွက် မျက်ခြေ မပြတ် လေ့လာ ဆောင်ရွက်ပေးလျက် ရှိကြောင်း၊ သီးနှံအလိုက် ကျရောက်တတ်သည့် ဖျက်ပိုးများ နှင့် ပတ်သက်၍ ကြိုတင်အသိပေးခြင်း သတိပေးခြင်းလုပ်ငန်းများကို အီလက်ထရောနစ် ဆက်သွယ်ရေး နည်းပညာ အသုံးပြုပြီး တောင်သူများထံ အချိန်နှင့် တပြေးညီ ရောက်ရှိရေး စီမံဆောင်ရွက်လျက်ရှိကြောင်း စိုက်ပျိုးရေးဦးစီးဌာန ၊ သီးနှံ ကာကွယ်ရေးဌာနခွဲ က သိရှိရသည်။