ဝါမှထုတ်လုပ်သော အဝတ်အထည်အသုံး အဆောင်များ ထုတ်လုပ်ရန် လိုအပ်ချက်မှာ လူဦးရေ ၅၄ သန်း အတွက် ဝါပိဿာ သန်းပေါင်း (၃၅၀) ကျော်လိုအပ်မည် ဖြစ်၍ နိုင်ငံ အတွင်း ဝတ်ရေး ဖူလုံစေရေးအတွက် ဝါသီးနှံ တိုးတက် စိုက်ပျိုးထုတ်လုပ်မှု ရည်မှန်းချက် ကို စိုက်ဧရိယာဧက (၇)သိန်း စိုက်ပျိုးထုတ်လုပ်ရေး နှင့် တစ်ဧက လျင် ပျမ်းမျှ ဝါပိဿာ (၅၀၀) နှုန်း ရရှိပြီး စုစုပေါင်း ဝါထုတ်လုပ်မှု တန်ချိန်(၅.၆)သိန်းကျော် ရရှိရေးကို ထိထိရောက်ရောက် ဆောင်ရွက် သွားနိုင်ရေး အတွက် ဆွေးနွေးကြရန် ဖြစ်ကြောင်း၊ ယနေ့ကျင်းပ ပြုလုပ် သော စကားဝိုင်း၌ ဝါသီးနှံကဏ္ဍ တစ်ခုလုံး  ဖွံ့ဖြိုးတိုးတက်ရန် ရည်ရွယ်၍ စိုက်ပျိုးထုတ်လုပ် သူတောင်သူများ အား နည်းပညာ ပံ့ပိုးပေးရေး၊ တန်ဖိုးမြှင့် ထုတ်ကုန်များ ထုတ်လုပ် ရောင်းချ နိုင်ရေး၊ ဈေးနှုန်း ဈေးကွက်ခိုင်မာရေး၊ မူဝါဒများ ချမှတ်နိုင်ရေး နှင့် စိန်ခေါ်မှုများကို ရင်ဆိုင် ဖြေရှင်းနိုင်ရေး တို့အတွက် ရှုထောင့် အသီးသီးက ဝိုင်းဝန်းဆွေးနွေးပေး ကြစေလိုကြောင်း နိုဝင်ဘာလ (၃)ရက် နေ့က စိုက်ပျိုးရေး၊မွေးမြူရေး နှင့် ဆည်မြောင်းဝန်ကြီးဌာန ပြည်ထောင်စုဝန်ကြီးရုံး အစည်းအဝေး ခန်းမ၌ ကျင်းပပြုလုပ်သည့် “မြန်မာနိုင်ငံ ဝါသီးနှံ ကဏ္ဍ ဖွံ့ဖြိုးတိုးတက်ရေး ဆိုင်ရာ ဆွေးနွေးအဖြေရှာ” စကားဝိုင်း ဖွင့်ပွဲအခမ်းအနားတွင် ပြည်ထောင်စုဝန်ကြီး ဦးတင်ထွဋ်ဦး က ပြောကြားသည်။

လယ်ယာကဏ္ဍဆိုင်ရာ စီမံကိန်း စီမံချက်များ ရေးဆွဲ အကောင်အထည် ဖော်ရာတွင် လယ်ယာ စီးပွားကို အခြေခံပြီး တောင်သူများ နှင့် ပုဂ္ဂလိက ကဏ္ဍဖွံ့ဖြိုးတိုးတက်ရေးအား ဦးစားပေး ဆောင်ရွက်နိုင်ရန် ၊ သက်ဆိုင်ရာ တာဝန်ရှိသူများအကြား လုပ်ငန်းနယ်ပယ်အလိုက် အမြင်ချင်း ဖလှယ်ဆွေးနွေး၍ ပိုမိုကောင်းမွန်သော လုပ်ငန်းစဉ်များ ချမှတ်အကောင်အထည်ဖော်နိုင်ရန် ရည်ရွယ်၍ လစဉ် ပထမပတ် ဗုဒ္ဓဟူးနေ့တိုင်းကျင်းပသည့် အဆိုပါ စကားဝိုင်း အစီအစဉ်ကို ယနေ့ တတိယအကြိမ် ကျင်းပခြင်းဖြစ်ပြီး အခမ်းအနားသို့ စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန ဒုတိယဝန်ကြီး ဒေါက်တာအောင်ကြီး ၊ အမြဲတမ်းအတွင်းဝန် နှင့် ဦးစီးဌာနများ မှ ညွှန်ကြားရေးမှူးချုပ်များ ၊ ပါမောက္ခချုပ်များ တက်ရောက်ကြပြီး တိုင်းဒေသကြီး ပြည်နယ်များ မှ ကိုယ်စားလှယ်များ က အွန်လိုင်းစနစ်ဖြင့် ပါဝင် တက်ရောက် ခဲ့ကြသည်။

ဈေးကွက်လိုအပ်ချက်နဲ့အညီ အရည်အသွေးပြည့်မီသော ဝါနှင့်ဝါထွက်ပစ္စည်းများ ထုတ်လုပ် ရောင်းချနိုင်ရန် အခြေခံကျသော သွင်းအားစုများ အရည်အသွေးပြည့်မီရေးနှင့် လုံလောက်စွာ ရရှိရေး၊ စိုက်ပျိုးနည်းစနစ်များ ခေတ်မီတိုးတက်ရေး၊ အရည်အသွေး စစ်ဆေး ရေးလုပ်ငန်းများ ဖွံ့ဖြိုးလာရေးတို့ကို သက်ဆိုင်ရာ ဦးစီးဌာနများအကြား ပေါင်းစပ် ညှိနှိုင်း ဆောင်ရွက်ကြရန် လိုအပ် သကဲ့သို့ စက်မှုပိုင်းဆိုင်ရာ ခေတ်မီနည်းပညာ နှင့် ရင်းနှီးမြှုပ်နှံ အဆင့်မြှင့်တင်မှု လိုအပ်ချက်များကို သက်ဆိုင်ရာဝန်ကြီးဌာနများ၊ ပုဂ္ဂလိကအဖွဲ့အစည်းများ နှင့် အကြံပြု ဆွေးနွေးဆောင်ရွက်ရန်လိုအပ်ကြောင်း အဖွင့်အမှာစကားပြောကြားရာ၌ ပြည်ထောင်စုဝန်ကြီး ဦးတင်ထွဋ်ဦး က ထည့်သွင်း ပြောကြားသည်။

မြန်မာနိုင်ငံတွင် ၁၉၉၅-၁၉၉၆ ခုနှစ်မှ ၂၀၁၀-၂၀၁၁ ခုနှစ်အတွင်း နှစ်စဉ် ဝါသီးနှံ ဧက (၇)သိန်းမှ (၈) သိန်းကျော် အထိ စိုက်ပျိုးခဲ့ပြီး  ၂၀၁၁-၂၀၁၂ ခုနှစ်နောက်ပိုင်းမှစ၍ ဝါသီးနှံ စိုက်ပျိုး ထုတ်လုပ်မှု သိသိသာသာ လျော့ကျလာကာ ၂၀၁၉-၂၀၂၀ ခုနှစ် တွင် စိုက်ဧက (၄) သိန်းခန့်သာ စိုက်ပျိုးထုတ်လုပ်ခဲ့ကြောင်း၊ နည်းပညာပိုင်းတွင် အဓိက ဝါသီးလုံးဖောက်ပိုး ဒဏ် ခံနိုင်သည့် မျိုးများကို ထုတ်ပေး နိုင်ခဲ့သဖြင့် ဝါအထွက်နှုန်းများ ပိဿာ၂၀၀ ခန့် မှ ၄၅၀ ပိဿာ ခန့် အထိ ၂ ဆကျော် တက်လာခဲ့သော်လည်း တောင်သူများ၏ ဝါစိုက်ပျိုးလိုမှု နှင့် ရေရှည်တည်တံ့ ခိုင်မာ သော ဝါစိုက်ပျိုးရေးဖြစ်လာစေရေး ဆောင်ရွက်ရန်လိုအပ်လျက်ရှိ နေကြောင်း  သိရသည်။

ဝါသီးနှံသည် အဝတ်အထည်ပစ္စည်းထုတ်လုပ်မှုအတွက် သာမက ပြည်တွင်း ဆီဖူလုံရေးတွက် စားသုံးဆီ နှင့် စက်မှုလုပ်ငန်းသုံးဆီ ကိုဝါစေ့မှ ထုတ်ယူနိုင်ပြီး ဝါစေ့ ကြိတ်ဖတ်များကို အသား ထုတ်လုပ်မှုတိုးတက်ရေးအတွက် တိရစ္ဆာန်အစာအဖြစ်ပါ အသုံးပြု နိုင်၍ စီးပွားရေးအရ အရေးပါသော သီးနှံတစ်ခုဖြစ်ကြောင်း၊ ဝါပိဿာ(၁၀၀)ကို စက်စွမ်းအားပြည့် ကြိတ်ခွဲပါက ဝါဂွမ်း(၃၆)ပိဿာ၊ ဝါစေ့(၆၄) ပိဿာ ရရှိပြီး ၊ ဝါစေ့ (၁၀၀) ပိဿာအား ကြိတ်ခွဲပါက ဝါစေ့ ဆီကြည် (၈.၂) ပိဿာ၊ ဝါစေ့ဆီချေး  (၂.၇၃)ပိဿာ ၊ အစေ့ကပ်ဂွမ်း(၆.၂၅)ပိဿာ နှင့် ဝါစေ့ ကြိတ်ဖတ် (၈၂.၈၁) ပိဿာ ရရှိမည် ဖြစ်၍ အဆိုပါထုတ်ကုန်ကို သက်ဆိုင်ရာ စက်မှုကုန်ထုတ် လုပ်ငန်းများက တန်ဖိုးမြှင့် ထုတ်ကုန်များ အဖြစ် အလေအလွင့်မရှိ ထုတ်လုပ်နိုင်ကြစေရေး အတွက် ပေါင်းစပ် ညှိနှိုင်းရေးနှင့် ရေရှည်တည်တံ့သော ဝါစိုက်ပျိုးထုတ်လုပ်မှု ကွင်းဆက် ဖော်ဆောင်နိုင်ရေး လုပ်ငန်းများကို စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန က ကြိုးပမ်း အကောင်အထည်ဖော် ဆောင်ရွက်သွားမည်ဖြစ်ကြောင်း သတင်းရရှိသည်။